Read Мукъаддес Китап къырымтатар тилинде, Лука 13 Bible Online

Лука 13 - Мукъаддес Китап къырымтатар тилинде, bible

Лука 13

¹О вакъыт бир къач адам Исагъа келип, галилеялылар акъкъында айттылар. Бу галилеялылар къурбан чалгъан вакъытта, Пилат оларны ольдюрди ве бойле, къурбанларнынъ къаныны оларнынъ къанынен къарыштыргъан эди.

²Иса адамларгъа джевап берип: — Сиз, бу адамлар эписи башкъа галилеялылардан гуналы олгъаны ичюн оларнен бойле шей олды, деп тюшюнесизми?

³Ёкъ! Лякин тёвбе этмесенъиз, эпинъиз олар киби гъайып олурсыз.

⁴Я анавы он секиз адамнынъ устюне Силоам шеэриндеки къулле йыкъылып, ольдюргени? Сиз оларны Ерусалимде яшагъан эписи адамлардан даа къабаатлы деп тюшюнесизми?

⁵Сизге ёкъ дейим. Лякин тёвбе этмесенъиз, эпинъиз олар киби гъайып олурсыз, — деди.

⁶Иса бойле бир кинаели икяе айтты: — Бир адамнынъ юзюм багъында инджир тереги сачылгъан экен. О адам анда барып, терекнинъ устюнде мейва къыдыра, лякин тапалмай.

⁷Сонъ юзюмджиге: «Мен учь йыл девамында мында келип, бу инджирнинъ устюнде мейва къыдырам, лякин оны тапмайым. Оны кесип ташла, топракънынъ кучюни не ичюн алсын?» — дей.

⁸Юзюмджи исе онъа джевап берип: «Эфенди, оны даа бир йылгъа къалдырса. Мен онынъ чевре-четини къазып, топракъны кубрелерим,

⁹бельки келеджек йылгъа мейва берип башлар. Эгер бермесе, кесип ташларсынъ», — дей.

¹⁰Раатлыкъ куню Иса бир синагогада адамларны огрете эди.

¹¹О ердеки бир къадын он секиз йыл девамында арам рухтан къыйналып хасталангъан, дёрт букюльген, белини догъуртып оламай экен.

¹²Иса оны корьгенинен, янына чагъырып: — Сен хасталыгъынъдан къуртарылдынъ, — деди.

¹³Сонъ къолларыны къадыннынъ башына къойды. О исе бирден догърулып, Аллагъа шукюр этти.

¹⁴Иса раатлыкъ куню къадынны тедавийлегенине ачувланып, синагоганынъ башлыгъы халкъкъа: — Иш ичюн алты кунь бар. Тедавийленмеге раатлыкъ куню дегиль, шу куньлери келинъиз, — деди.

¹⁵Рабби Иса исе онъа джевап берип: — Эй экиюзьлюлер! Раатлыкъ куню олгъанына бакъмайып, эр биринъиз огюзинъизни я да эшегинъизни ашлавдан чезип сувармагъа алып бармаймы?

¹⁶Я бу къадын Ибраимнинъ къызы. Иблис оны он секиз йыл девамында багълап туткъан. Аджеба онынъ багъларыны раатлыкъ кунюнде чезмек мумкюн дегильми? — деди.

¹⁷Исанынъ бу сёзлери Онъа къаршылыкъ косьтергенлернинъ эписини утандырды. Бутюн халкъ исе Иса япкъан эписи аджайип ишлерге къувана эди.

¹⁸Иса: — Алланынъ Падишалыгъы неге ошай? Оны ненен тенъештирейим?

¹⁹О, бир хардал урлугъына ошай. Бир адам оны алып озь багъчасында сачкъан. Урлукъ осип терек киби юксек олгъан. Онынъ пытакълары арасында къушлар ювалар ясагъан, — деди.

²⁰Иса даа къошты: — Алланынъ Падишалыгъыны ненен тенъештирейим?

²¹О, маягъа ошай. Къадын оны алып, учь буюк чанакъ [5] унгъа ташлай ве бутюн хамырыны къабарта.

²²Иса Ерусалим тарафына ёл алып, шеэр-койлерден кечип адамларны огрете эди.

²³Насылдыр бир адам Онъа суаль берди: — Рабби, тек аз адамлар къуртарыладжакълар? — деди. Иса оларгъа:

²⁴— Тар къапудан кирмек ичюн арекет этинъиз. Сизге айтам: чокъ адам анда кирмеге арекет этеджеклер, амма кирип оламайджакълар.

²⁵Эв Саиби турып къапуны къапаткъанда, сиз тышарыда къалып: «Рабби! Бизге ачып бер!» — деп къапуны такъылдата башлайджакъсыз. Лякин О сизге: «Ким ве къайдан олгъанынъызны бильмейим», — деп джевап береджек.

²⁶О вакъыт сиз: «Биз Сеннен берабер ашап-ичтик. Сен бизим мейданларымызда огреттинъ», — дейджексиз.

²⁷О исе: «Сизге айтам: ким ве къайдан олгъанынъызны бильмейим. Эй инсафсыз шейлерни япкъанлар, козюмден ёкъ олунъыз!» — деп джевап береджек.

²⁸Сиз Ибраимни, Исхакъны, Якъупны ве эписи пейгъамберлерни — Алланынъ Падишалыгъында, озюнъизни исе — тышарыгъа къувулгъанынъызны корьген вакъытта агълап тишлеринъизнен гъыджыртаджакъсыз.

²⁹Шаркъ ве гъарптан, шималь ве дженюптен адамлар келип, Алланынъ Падишалыгъында софра башында ер аладжакълар.

³⁰О вакъыт бир къач сонъундакилер биринджи, биринджилер исе сонъунда оладжакълар, — деди.

³¹Шу вакъыт бир къач ферисе келип: — Чыкъ, кет мындан, чюнки Ирод Сени ольдюрмеге истей, — дедилер.

³²Иса оларгъа: — Барып, о тилькиге айтынъ: Мен бугунь ве ярын джинлерни къувып, адамларны тедавийлейджем. Учюнджи куню исе Озь ишимни битиреджем.

³³Амма бугунь, ярын ве о бир кунь Озь ёлумны девам этмек керегим, чюнки пейгъамберни Ерусалимден башкъа ерде ольдюрильмеси олмайджакъ шейдир, — деди.

³⁴— Эй Ерусалим, Ерусалим! Пейгъамберлерни ольдюрген ве онъа ёлланылгъан адамларны ташларнен ургъан шеэр! Тавукъ озь чипчелерини къанатлары астында насыл топласа, Мен де къач кере сенинъ балаларынъны Озь яныма топламагъа истедим, сизлер исе истемединъиз.

³⁵Мына, сизинъ эвинъиз сизге къалдырылгъан тура! Сизге айтам: «Раббининъ ады иле Келеяткъанны шуретленъиз!» — демегендже, Мени корьмейджексиз.