Read Мукъаддес Китап къырымтатар тилинде, Лука 14 Bible Online

Лука 14 - Мукъаддес Китап къырымтатар тилинде, bible

Лука 14

¹Бир раатлыкъ куню Иса ферисе башлыкъларындан бирининъ эвине ашамагъа кельди. Анда адамлар Онынъ артындан дикъкъатнен бакъа эди.

²Исанынъ къаршысында сув хасталыгъынен чекишкен бир адам отургъан.

³Иса Къанун оджаларына ве фериселерге мураджаат этип: — Къанунгъа коре раатлыкъ куню тедавийлемек мумкюнми, я да мумкюн дегильми? — деп сорады.

⁴Олар индемедилер. Иса исе хастагъа тийип, оны тедавийледи де, йиберди.

⁵Сонъ Къанун оджаларына: — Сизден биринъизнинъ огълу я да огюзи къуюгъа тюшип кетсе, раатлыкъ куню олгъанына бакъмайып, оны шу ань чыкъарып алмаз эдинъизми? — деди.

⁶Олар исе бунъа ич бир джевап тапып оламадылар.

⁷Мусафирлер энъ сайгъылы ерлерде отурмагъа тырышкъаныны корьген Иса оларгъа кинаели икяе айтты:

⁸— Эгер сени тойгъа чагъырсалар, сайгъылы ер алма, чюнки мусафирлер арасында сенден урьметли адам олмакъ мумкюн.

⁹О вакъыт экинъизни чагъыргъан эв саиби келип санъа: «Бу ерни онъа бошатып бер», — дер. Сен исе утана-утана, энъ арттаки ерге кечмеге меджбур оладжанъ.

¹⁰Аксине, давет олунгъан сонъ, барып ашагъыдаки ерге ерлеш. О вакъыт сени чагъыргъан адам келип, санъа: «Достум, мында, тёрге чыкъ», — дер. Сонъ башкъа мусафирлернинъ козюнде сенинъ урьметинъ артаджакъ.

¹¹Эр бир озюни юксельткен адам алчакълатыладжакъ. Озюни алчакълаткъан исе юксельтиледжек, — деди.

¹²Сонъ Иса Оны чагъыргъан ферисеге: — Уйлелик я да акъшамлыкъ япкъанда, достларынъны, агъа-къардашларынъны, сой-сопларынъны ве зенгин къомшуларынъны давет этме. Чюнки олар да сонъ сени чагъырып къаршылыгъынъны берирлер, ве о, санъа мукяфат олур.

¹³Аксине, байрам япкъанда, фукъаре, сакъат, топал ве кёрларны чагъыр.

¹⁴О вакъыт сен бахтлы олурсынъ, чюнки олар санъа яхшылыкъ къайтарып оламазлар, лякин инсафлы адамлар тирильгенде, санъа яхшылыкъ къайтаджакъ, — деди.

¹⁵Мусафирлерден бириси буны эшитип, Исагъа: — Алланынъ Падишалыгъында ашап-ичеджек адам бахтлыдыр! — деди.

¹⁶Иса исе онъа: — Бир адам буюк акъшам ашы берип, чокъ мусафир чагъыргъан.

¹⁷Акъшам ашыны ашамагъа вакъыт кельгенде: «Буюрынъыз, эр шей азыр», — деп, чагъырылгъан адамларны давет этмек ичюн къулуны ёллагъан.

¹⁸Амма эписи бир-бири артындан афу сорап башладылар. Биринджиси онъа: «Мен тарла сатын алдым, оны барып бакъмакъ керегим. Риджа этем, мени багъышла», — деген.

¹⁹Экинджиси: «Мен беш чифт огюз сатын алдым, яхшы экенлерми, деп оларны сынамакъ керегим. Риджа этем, мени багъышла», — деген.

²⁰Учюнджиси: «Мен эвлендим, шунынъ ичюн келялмайджам», — деген.

²¹Къул къайтып келип, эфендисине буларны айта. Эв саиби ачувланып, къулуна: «Тез ол, шеэрнинъ сокъакъ ве сокъачыкъларына бар да, фукъаре, сакъат, кёр ве топалларны бу ерге алып кель», — дей.

²²Къул барып келип: «Эфендим, буюргъанынъны беджердим, амма даа бош ерлер бар», — дей.

²³О вакъыт эфенди къулуна: «Ёллар ве ёлчыкълар бою кечип, эписини мында кельсинлер, деп къандыр. Эвим толсун», — дей.

²⁴Сизге айтам: башында чагъырылгъан адамлардан ич бириси меним акъшамлыкъ ашымны ашамайджакъ! — деди.

²⁵Исанен берабер чокътан-чокъ адам юре экен. О оларгъа таба чевирилип:

²⁶— Эгер Манъа кельген адам озюнинъ ана-бабасыны, апайыны, бала-чагъасыны, агъа-къардашыны, тата-къыз къардашыны ве озь джаныны биле кореджек козю олмаса, о, Меним шегиртим оламаз.

²⁷Ким озь хачыны котерип артымдан юрмесе, Меним шегиртим оламаз.

²⁸Сизден биринъиз къулле къурмагъа истесе, оны битирмек ичюн пара етерми, деп башта отурып чекеджек масрафларыны саймазмы?

²⁹Ойле олмаса темельни къойып, ишни битирмек къолундан кельмесе, буны корьген эписи адамлар:

³⁰«Бу адам къуруджылыкъны башлады да, битирип оламады», — деп масхара этеджеклер.

³¹Я да бир падиша башкъа падишагъа къаршы дженк этмеге азырланса, он бинъ аскеримнен манъа къаршы кельген падишанынъ йигирми бинъ аскеринен дженклешмеге кучюм етер экенми, деп баштадан отурып тюшюнмек керек.

³²Кучю етмесе, душман даа узакъ олгъанда, онынъ алдына эльчилерни ёллап барышыкъ сорар.

³³Шойле де, сизден ич биринъиз озюнинъ бутюн барлыгъыны къалдырмагъандже, Меним шегиртим оламаз.

³⁴Туз — яхшы шей. Амма туз тузлугъыны джойса, онынъ лезетини насыл къайтармакъ мумкюн?

³⁵Бойле тузны не топракъкъа, не кубреге къошмагъа ярашмай. Оны алып аталар. Къулагъы барлар буны эшитсинлер! — деди.