Read Мукъаддес Китап къырымтатар тилинде, Лука 15 Bible Online

Лука 15 - Мукъаддес Китап къырымтатар тилинде, bible

Лука 15

¹Эписи гуналы адамлар ве салым топлайыджылары Исаны динълемек ичюн Онынъ алдына келе эдилер.

²Фериселер ве Къанун оджалары мырылдап: — Бу адам гуналыларны къабул этип, оларнен берабер аш да ашай! — дей эдилер.

³Иса исе оларгъа бойле бир кинаели икяе айтып берди:

⁴— Сизден биринъиз юз къой саиби олып, оларнынъ бирисини джойса, докъсан докъуз къоюны чёльде къалдырып, гъайып олгъаныны тапмагъандже къыдырмагъа кетмезми?

⁵Тапкъан сонъ исе, оны къуванчнен елькесине ала

⁶ве эвине къайтып, достларыны, къомшуларыны чагъыра да: «Меннен берабер къуванынъыз, мен джоюлгъан къоюмны таптым!» — дей.

⁷Сизге догърусыны айтам: Коклерде де шойле, тёвбе эткен бир гуналы адам ичюн къуванч, докъсан докъуз тёвбеге мухтадж олмагъан инсафлылар ичюн къуванчтан буюк оладжакъ, — деди.

⁸— Я да он кумюш акъчасы олгъан ве олардан бир данесини джойгъан къадынны алайыкъ. О, чыракъ якъып, акъчаны тапмагъандже эвини сипирип, оны гъайретнен къыдырмазмы?

⁹Тапкъан сонъ исе, достларыны ве къомшуларыны чагъырып: «Меннен берабер къуванынъыз, мен джоюлгъан акъчамны таптым», — дер.

¹⁰Сизге айтам: бойле де тёвбе эткен бир гуналы ичюн Алланынъ мелеклери къуванаджакълар.

¹¹Иса девам этип шойле деди: — Бир адамнынъ эки огълу бар экен.

¹²Кучюги бабасына: «Баба, мал-мулькюнъден манъа тиеджек пайымны айырып бер», — дей. О адам бутюн мал-мулькюни огъулларына болип бере.

¹³Бир къач куньден сонъ кучюк огълу барлыгъыны топлап, узакъ бир мемлекетке кете. О ерде бозукъ ёлгъа тюшип, олгъан параларыны кокке савурып битире.

¹⁴Эр шейни масраф эткен сонъ, о яшагъан мемлекетте кучьлю бир ачлыкъ башлана, йигит исе ёкъсузлыкъкъа огърай.

¹⁵О, ерли сакинлеринден бирисине ыргъатлыкъкъа бара. О исе йигитни озь тарласындаки домузларны бакъмагъа ёллай.

¹⁶Яш огълан домузларнынъ емини тойгъандже ашамагъа пек истей эди, амма онъа ич бир шей бермей эдилер.

¹⁷О вакъыт акъылыны топлап, озь озюне: «Меним бабамнынъ о къадар чокъ ыргъаты бар, олар эписи тойгъандже аш ашайлар, даа артып къала, мен исе бу ерде ачлыкътан олеятам.

¹⁸Барып, бабама къайтайым ве онъа: „Бабам, мен Коклер ве сенинъ алдынъда гуна яптым.

¹⁹Эндиден сонъ сенинъ огълунъ денильмеге ляйыкъ дегилим. Мени озюнънинъ бир ыргъатынъ, деп сай”, — дейим», — дей.

²⁰Бундан сонъ о, бабасына къайта. О даа узакъта келеяткъанда, бабасы огълуны коре ве аджый. О, чапып барып, огълунынъ бойнундан къучакълап опе.

²¹Огълу исе онъа: «Бабам, мен Коклер ве сенинъ алдынъда гуна яптым. Эндиден сонъ сенинъ огълунъ денильмеге ляйыкъ дегилим», — дей.

²²Амма бабасы къулларына: «Тез олунъ, энъ яхшы урба кетирип, оны кийиндиринъиз, къолуна юзюк такъынъыз, аякъларына аякъкъап кийсетинъиз.

²³Сонъ, бесленген бир бузавчыкъны кетирип, союнъыз: ашайыкъ да къуванайыкъ.

²⁴Чюнки меним бу огълум олю эди — тирильди, гъайып олгъан эди — тапылды», — дей. Бойлеликнен олар байрам яптылар.

²⁵Буюк огълу о вакъытта тарлада экен. Къайтып эвине якъынлашкъанда, чалгъы ве оюн-кулькю давушларыны эшите.

²⁶Къулларындан бирини чагъырып, не олаяткъаныны сорай.

²⁷О: «Къардашынъ къайтып кельди, бабанъ оны сагъ-селямет корьгени ичюн, бесленген бузавчыкъны сойды», — дей.

²⁸Агъасы пек ачувланып, эвнинъ ичине кирмеге истемей. Бабасы тышарыгъа чыкъып, онъа ялвара.

²⁹Амма о бабасына джевап берип: «Мен къач йылдан берли санъа къул киби хызмет этем, бир кере биле сёзюнъден чыкъмадым. Лякин достларымнен шенъленмек ичюн сен манъа ич бир вакъыт улачыкъны биле бермединъ.

³⁰Амма бутюн мал-мулькюнъни ороспуларнен берабер сарф эткен анавы огълунъ къайткъанда, сен онъа бесленген бузавчыкъны сойгъансынъ!» — дей.

³¹Сонъ бабасы онъа: «Огълум! Сен бутюн вакъыт янымдасынъ, меним эр шейим сенинъки.

³²Бизге къуванмакъ ве шенъленмек керек эди, чюнки сенинъ бу къардашынъ олю эди — тирильди, гъайып олгъан эди — тапылды», — дей.