Read Мукъаддес Китап къырымтатар тилинде, Лука 16 Bible Online

Лука 16 - Мукъаддес Китап къырымтатар тилинде, bible

Лука 16

¹Сонъ Иса Озь шегиртлерине: — Бир зенгин адамнынъ эв идареджиси бар экен. Бир кунь зенгинге, эв идареджиси онынъ мал-мулькюни сарф эткенини айтып, оны къабаатлайлар.

²Эфенди эв идареджисини чагъырып: «Сенинъ акъкъынъда эшиткенлерим недир? Ишлеринънинъ эсабыны бер, сен энди эвимде идарелик япмайджанъ», — дей.

³Эв идареджиси озь-озюне: «Не япайым экен? Эфендим идареликни къолумдан ала. Ер къазмагъа кучюм етмей, тиленмеге утанам», — дей.

⁴Сонъ: «Анъладым, не япаджагъымны билем. Ойле япмакъ керек ки, эв идареджилигинден бошатылгъанымдан сонъ адамлар мени озь эвлерине къабул этсинлер», — дей.

⁵О, эфендисине борджлу олгъанларыны бирер-бирер янына чагъыра. Биринджисинден: «Эфендиме не къадар борджунъ бар?» — деп сорай.

⁶О: «Юз буюк бардакъ зейтюн ягъы», — деп джевап бере. Эв идареджиси онъа: «Бордж кягъытынъны ал, тез отур да, элли бардакъ [6] деп яз», — дей.

⁷Сонъ башкъасындан: «Я сенинъ не къадар борджунъ бар?» — деп сорай. О: «Бинъ чувал богъдай», — деп джевап бере. Эв идареджиси: «Бордж кягъытынъны ал, секиз юз чувал [7] деп яз», — дей.

⁸Эфенди исе бу намуссыз эв идареджисини, акъылнен иш япкъаны ичюн макътагъан. Чюнки бу дюньянынъ адамлары озьлерине ошагъанлар арасында иш алып баргъанда, ярыкънынъ огъулларына коре акъыллыджа олалар.

⁹Мен сизге айтам: намуссыз байлыкъ ярдымынен, достларынъызны чокълаштырынъыз. Сонъ, акъчанъыз къалмагъанда, сизни эбедий тургъан эвлерге къабул этеджеклер.

¹⁰Кучюк иште ишанчлы олгъан адам буюк иште де ишанчлы олур. Кучюк иште инсафсыз олгъан адам буюк иште де инсафсыз олур.

¹¹Эгер сизге бу намуссыз байлыкъны ишанып олмасалар, акъикъий байлыкъны сизге ким ишанаджакъ?

¹²Эгер сиз башкъасынынъ малынен ишанчлы олмасанъыз, озь малынъызны сизге ким береджек?

¹³Ич бир хызметчи бирден эки эфендиге хызмет эталмаз. О, я бирисинден нефретленип, башкъасыны север, я да бирисине садыкъ олып, башкъасыны кореджек козю олмаз. Сиз де эм Аллагъа, эм зенгинликке хызмет этип оламайсыз, — деди.

¹⁴Пара севген фериселер буны эшитип, Исаны мыскъыллап башладылар.

¹⁵Амма Иса оларгъа: — Сиз адамларнынъ огюнде озюнъизни инсафлы этип косьтересиз, лякин Алла юреклеринъизни биле. Адамларда кокке котерильген шей, Алланынъ огюнде пистир, — деди.

¹⁶— Къанун ве Пейгъамберлернинъ Язылары Ягъя кельгендже девам этти. О вакъыттан сонъ Алла Падишалыгъы акъкъында Къуванчлы Хабер илян этиле ве эписи бу Падишалыкъкъа кирмеге тырыша.

¹⁷Амма Къанундан бир чызычыкъ ёкъ олгъанындан коре, ер ве кокнинъ ёкъ олувы къолайдыр.

¹⁸Кимде-ким озь апайындан айырылып, башкъасына эвленсе, аиле садыкълыгъыны бозып, гуна япа. Акъайындан айырылгъан къадынгъа эвленген адам да бойле гунагъа огърай.

¹⁹Индже кетенден япылгъан мор урбалар кийип, эр кунь кейф-сефа сюрип яшагъан бир зенгин адам бар экен.

²⁰Зенгиннинъ араба къапусы огюнде, бутюн тенини къотур къаплагъан Лазар адлы бир фукъаре ята экен.

²¹О зенгиннинъ софрасындан тюшкен уфакъларнен къурсагъыны тойдурмагъа арзу эткен, копеклер исе келип онынъ къотурларыны ялай экенлер.

²²Бир кунь фукъаре ольген. Мелеклер оны Ибраимнинъ янына алып баргъанлар. Сонъ зенгин де ольген. Оны комьгенлер.

²³Олюлер дюньясында, азапларны чеккенде, зенгин башыны котерип узакъта Ибраимни ве онынъ янындаки Лазарны корьди.

²⁴О къычырып: «Эй Ибраим баба! Мерамет эт, манъа Лазарны йибер, о, пармагъынынъ уджуны сувгъа батырып, тилиме сув тамызсын. Чюнки мен бу атеште чокъ азап чекем», — деди.

²⁵Ибраим онъа шойле джевап берди: «Унутма, огълум, сен аятынъда яхшылыкъ пайынъны алып олдынъ, Лазар исе — яманлыкъ пайыны. Энди о бу ерде теселли тапа, сен исе азап чекесинъ.

²⁶Бундан гъайры, сизнен бизим арамызда тюбю олмагъан чукъур бар. Бу ерден сизинъ тарафынъызгъа кечмеге истегенлер кечип оламазлар, ве о ерден бизим тарафымызгъа да кечмезлер».

²⁷Зенгин адам: «Ойле олса, эй баба, сенден ялварып сорайым, Лазарны бабамнынъ эвине ёлла.

²⁸Меним беш агъа-къардашым бар. Олар да бу азаплы ерге тюшмемек ичюн, оларны барып тенбилесин», — деди.

²⁹Ибраим онъа: «Оларда Муса ве пейгъамберлер бар, оларны динълесинлер», — деди.

³⁰Зенгин исе: «Ёкъ, Ибраим баба! Тек ольгенлерден бириси оларнынъ алдына барса, о вакъыт тёвбе этерлер», — деди.

³¹Ибраим онъа: «Эгер Муса ве пейгъамберлерни динълемеселер, ольгенлерден бириси тирилип барса да, инанмазлар», — деди.