Read Мукъаддес Китап къырымтатар тилинде, Лука 21 Bible Online

Лука 21 - Мукъаддес Китап къырымтатар тилинде, bible

Лука 21

¹Иса бакъып, садакъа сандыгъына акъча бахшышларыны ташлагъан зенгинлерни корьди.

²Олардан гъайры, бир фукъаре тул къадыннынъ эки капик [9] ташлагъаныны да корьди.

³Иса: — Сизлерге догърусыны айтам: бу фукъаре тул къадын эписинден чокъ акъча ташлады.

⁴Чюнки оларнынъ эписи озьлерининъ буюк барлыгъынынъ кучюк бир къысмыны бахшыш оларакъ бердилер. Амма бу къадын, фукъаре олса да, озюнинъ яшамакъ ичюн олгъан бутюн парасыны багъышлады, — деди.

⁵Базы адамлар Алланынъ Сарайы не къадар гузель ташларнен къурулгъаны ве насыл зенгин бахшышларнен яраштырылгъаны акъкъында айта эдилер. Иса исе:

⁶— Ойле куньлер келеджек ки, сиз шу ерде корьген биналар эписи бозуладжакъ, мында таш устюнде таш биле къалмайджакъ, — деди.

⁷Олар Исадан: — Оджа, бу ишлер не вакъыт оладжакъ? Буларнынъ якъында оладжагъыны къайдан биледжемиз? Бельги насыл оладжакъ? — деп сорадылар.

⁸Иса оларгъа: — Ич кимсе сизлерни алдатмасын деп, сакът олунъыз! Чокъ адамлар: «Мен Месихим» ве «Вакъыт кельди», — деп Меним адым иле келеджеклер. Оларнынъ артындан барманъыз.

⁹Дженк ве исьянлар акъкъында эшиткенде, къоркъманъыз, чюнки булар эвельден олып кечмелери керек, лякин сонъу бирден кельмейджек, — деди.

¹⁰Сонъ Иса девам этип: — Халкъ халкъкъа къаршы, падишалыкъ падишалыкъкъа къаршы котериледжеклер.

¹¹Шиддетли ер тепренювлери ве тюрлю топракъларда ачлыкълар ве веба хасталыкълары оладжакъ. Къоркъунчлы вакъиалар ве буюк бельгилер коклерде корюнеджеклер.

¹²Лякин буларнынъ эписинден эвель сизни якъалайджакъ ве къувалайджакълар, синагогаларгъа береджеклер ве зинданларгъа ташлайджакълар. Меним адым ичюн сизни падишалар ве акимлернинъ алдына алып бараджакълар.

¹³О вакъыт Меним акъкъымда шаатлыкъ этерсиз.

¹⁴Акъылынъызда буны тутунъыз: озюмизни насыл къорчалайыкъ, деп эвельден азырланманъыз.

¹⁵Чюнки Мен сизни ойле бир лафкъа уста ве икметли этерим ки, сизге къаршы чыкъкъанлардан ич бириси къаршынъызгъа турып ич бир шей айтып оламаз.

¹⁶Ана-бабаларынъыз, агъа-къардашларынъыз, достларынъыз ве сой-сопларынъыз биле сизни сатаджакълар, базыларынъызны исе ольдюреджеклер.

¹⁷Меним адым ичюн эписи сизден нефретленеджеклер.

¹⁸Амма башынъыздан бир дане сач биле гъайып олмайджакъ.

¹⁹Сабырлы олсанъыз, озь джанынъызны къуртараджакъсыз, — деди.

²⁰— Ерусалимни ордулар сарып алгъаныны корьгенде, билинъиз: шеэрнинъ гъайып оладжакъ вакъты якъынлашкъан.

²¹О вакъыт Еудиеде олгъан адамлар дагъларгъа къачсынлар, шеэрнинъ ичинде олгъанлар андан чыкъсынлар, этрафларында олгъанлар шеэрге асыл къайтмасынлар.

²²Чюнки бу куньлер — Алланынъ Китабында язылгъаны ерине келеджек, акъкъыны аладжакъ куньлери оладжакълар.

²³О куньлерде юклю ве бала эмиздирген къадынларгъа беля оладжакъ! Чюнки ер юзюни буюк мусибетлер беклей. Бу халкънынъ башына Алланынъ гъазабы ягъаджакъ.

²⁴Базылары къылычтан кечирилип оледжеклер, башкъаларыны эсирге алып тюрлю мемлекетлерге ёллайджакълар. Алланы бильмеген миллетлернинъ вакъты битмегендже, олар Ерусалимни аякъ астында тутаджакълар.

²⁵Кунеш, ай ве йылдызларда бельгилер пейда оладжакълар. Денъиз ве буюк далгъалар шувулдагъаныны эшитип, ер юзюндеки халкълар гъам-къасеветленип чаресизликке тюшеджеклер.

²⁶Адамлар, ер юзюне келеяткъан мусибетлерни беклеп, къоркъудан нефес алмайып йыкъыладжакълар, чюнки о вакъыт коклердеки кучьлер сарсыладжакълар.

²⁷О вакъытта булут устюнде, къудрет ве буюк шан-шурет иле келеяткъан Инсан Огълуны кореджеклер.

²⁸Бу вакъиалар юзь берип башлагъанда, энди къуртуладжакъ вакътынъызны якъынлашкъаныны билип, догъру турып башынъызны котеринъиз!

²⁹Иса оларгъа бир кинаели икяе айтып берди: — Инджир ве башкъа тереклерге бакъынъыз.

³⁰Оларнынъ япракълары корюнгенде, сиз бакъып, яз энди якъынлашкъаныны билесиз.

³¹Сиз де, буларнынъ эписи мейдангъа кельгенини корсенъиз, билинъиз: Алланынъ Падишалыгъы энди якъын.

³²Сизлерге догърусыны айтам: шимдики несиль ёкъ олмаздан эвель, буларнынъ эписи оладжакъ.

³³Кок ве ер из къалдырмайып кечерлер, лякин Меним сёзлерим кечмез.

³⁴Озюнъизге бакъынъыз, юреклеринъиз ахлякъсыз ишлер, сархошлыкъ ве аят къайгъылары ичюн агъыр олмасынлар. О кунь, тузакъ киби, апансыздан сизге кельмесин!

³⁵О кунь ер юзюнде яшагъан эр бир адамны басып аладжакъ.

³⁶Шу себептен эр вакъыт козь-къулакъ олып турунъыз. Бу келеджек мусибетлерден къуртулмагъа кучь тапып, Инсан Огълунынъ алдында турмагъа ляйыкъ олмакъ ичюн эр вакъыт дува окъунъыз.

³⁷Иса куньдюз Алланынъ Сарайында адамларны огрете эди. Акъшам кельгенде исе шеэрден чыкъып, геджесини Зейтюн дагъында кечире.

³⁸Бутюн халкъ исе Исаны динълемек ичюн саба эрте Сарайгъа, Онынъ алдына келе эди.