Read Мукъаддес Китап къырымтатар тилинде, Лука 24 Bible Online

Лука 24 - Мукъаддес Китап къырымтатар тилинде, bible

Лука 24

¹Афтанынъ биринджи кунюнде саба эрте, къадынлар азырлагъан къокъулы ягъларыны алып къабирге кельдилер.

²Анда келип, къабирнинъ агъзыны къапаткъан ташнынъ четке сюрип ташлангъаныны корьдилер.

³Къабирге кирип, Рабби Исанынъ беденини тапмадылар.

⁴Къадынлар шашып тургъан вакъытта, апансыздан оларнынъ огюнде парылдагъан беяз урба кийген эки адам пейда олды.

⁵Къадынлар къоркъудан ерге бакъып тургъанда, мелеклер оларгъа: — Тири Олгъанны не ичюн олюлер арасында къыдырасыз?

⁶О мында ёкъ, О тирильди. Даа Галилеяда олгъанда, О сизге не айткъаныны хатырланъыз:

⁷«Инсан Огълу гуналыларнынъ элине берильмек, хачкъа керип асылмакъ, амма учюнджи куню тирильмек керектир», — деген эди, — дедилер.

⁸Къадынлар Исанынъ бу сёзлерини хатырладылар.

⁹Къабирден къайтып, олар бутюн бу олгъан шейлерни он бир шегиртине ве о ерде олгъан башкъаларнынъ эписине бильдирдилер.

¹⁰Бу къадынлар — магдалалы Мерьем, Ёанна, Якъупнынъ анасы Мерьем ве оларнен бирликте олгъан башкъа къадынлар да эльчилерге шуны айта эдилер.

¹¹Амма бу сёзлер оларгъа бош уйдурма киби корюндилер, олар къадынларгъа инанмадылар.

¹²Пётр исе бирден къабирге чапты. Эгилип бакъса, тек дженазе безлеринден башкъа бир шей корьмеди. О олгъан шейден пек шашып, эвине къайтып кельди.

¹³Шу куню шегиртлерден экиси Ерусалимден он километр [10] къадар узакълыкъта олгъан Эммаус коюне кетип,

¹⁴бутюн бу олгъан шейлер акъкъында озь ара лакъырды эте эдилер.

¹⁵Олар бойле лаф эткен вакъытта, Иса Озю оларгъа якъынлашып, янларында кетти.

¹⁶Амма олар Оны танымадылар, чюнки козьлери кёр киби эди.

¹⁷Иса оларгъа: — Ёл бою не акъкъында лаф этесинъиз? — деди. Олар кедерли корюнип, токътадылар.

¹⁸Шегиртлеринден бириси Клеопас Онъа: — Сен Ерусалимде ябанджысынъ? Шунынъ ичюн де анда бу куньлерде олып кечкен шейлерни бильмейсинъ? — деди.

¹⁹Иса олардан: — Я не олды? — деп сорады. — Назаретли Исанен олып кечкен шейлер, — дедилер Онъа. — О, Алланынъ ве бутюн халкънынъ огюнде сёзюнен ве ишинен къудретли олгъан бир пейгъамбер эди.

²⁰Лякин бизим баш руханийлеримиз ве Шура азаларымыз Оны олюмге бердилер ве Оны хачкъа мыхлаттылар.

²¹Биз исе Оны Исраильни къуртараджакъ Месих, деп умют эте эдик. Амма даа бир шей олды: энди учь кунь кечкенде,

²²бизим къадынлар бизни шашырдылар. Саба эрте къабирге барып,

²³олар Онынъ тенини тапамагъанлар, къайтып бизге, мелеклерни корьгенлерини айттылар. Мелеклер оларгъа Исанынъ тири олгъаныны айткъанлар.

²⁴О вакъыт бизимкилерден базылары къабирге барып, эписини шу къадынлар айткъанлары киби тапкъанлар, амма Исанынъ Озюни корьмегенлер.

²⁵Иса оларгъа: — Эй акъылсызлар! Пейгъамберлернинъ айткъанларына иманы агъыр адамлар!

²⁶Месих бу азаплардан кечип, Озь шерефине кирмек керекмей эдими? — деди.

²⁷Сонъ Муса ве эписи Пейгъамберлернинъ Языларындан башлап, Иса анда Озю акъкъында язылгъан шейлерни оларгъа анълатты.

²⁸Олар ёл туткъан койге якъынлашкъанда, Иса Озь ёлуны девам этеджек киби олды.

²⁹Лякин олар: — Бизнен къал, чюнки кунь битеята, энди акъшам олды, — деп Онъа ялвардылар. Иса эвге кирип, оларнен къалды.

³⁰Оларнен софрада ер алып, Иса отьмекни алып шукюр этти ве парчалап оларгъа берди.

³¹О дакъкъасы шегиртлернинъ козьлери ачылды, ве олар Оны таныдылар. Амма Иса бирден оларнынъ козьлеринден гъайып олды.

³²Олар бир-бирине: — О бизнен ёл бою лаф эткенде ве Языларны анълаткъанда, юрегимиз къуванып янмай эдими?! — дедилер.

³³Олар шу ань ерлеринден турып, Ерусалимге къайттылар. Он бири ве аркъадашларынынъ топлангъан ерине келип киргенлерде,

³⁴анда топлашкъанлар: «Раббимиз акъикъатен тирилип Симонгъа корюнген», — дедилер.

³⁵Кельген шегиртлер де ёлда олып кечкен шейлерни, отьмекни парчалагъан дакъкъасы Исаны насыл таныгъанларыны айттылар.

³⁶Олар буны тариф эткенде, Исанынъ Озю келип ортагъа турды да, оларгъа: — Селям алейкум! — деди.

³⁷Олар шашып, бир хаялет корьгенлерини тюшюнип, пек къоркътылар.

³⁸Иса оларгъа: — Сизни неден къоркътынъыз? Юреклеринъизде не ичюн бойле шубелер бар?

³⁹Эллериме, аякъларыма бакъынъыз — бу Меним! Манъа тийип бакъсанъыз, корерсиз. Рухта эт ве кемик олмай, Менде исе бар, — деди.

⁴⁰Буны айткъан сонъ, оларгъа къолларыны ве аякъларыны косьтерди.

⁴¹Къуванып тааджипленген ве даа инанып оламагъан шегиртлеринден Иса: — Сизде ашаладжакъ бир шей бармы? — деп сорады.

⁴²Олар Онъа пишкен балыкъ кесеги бердилер.

⁴³Иса оны алып козьлери огюнде ашады.

⁴⁴Сонъ оларгъа шойле деди: — Мен даа сизнен берабер олгъанда, Мусанынъ Къанунында, Пейгъамберлернинъ Языларында ве Зебур Китабында Меним акъкъымда язылгъанларнынъ эписи беджерильмек керектир, деген эдим.

⁴⁵Сонъ Иса оларны Мукъаддес Языларны анъламагъа огретти.

⁴⁶О оларгъа: — Мукъаддес Языларда, Месих азаплар чекеджек ве учюнджи куню олюлер арасындан тураджакъ, деп бильдирильгендир.

⁴⁷Ерусалимден башлап эписи халкъларгъа: гуналарынъызны багъышланмасы ичюн Месихнинъ адынен тёвбе этинъиз, деп илян этиледжектир.

⁴⁸Сиз бу шейлерге шаат оладжакъсыз.

⁴⁹Мен сизге Бабам ваде эткен шейни берейим. Сиз юкъарыдан келеджек къудреттен кучь алмагъандже, шеэрде къалынъыз, — деди.

⁵⁰Иса шегиртлерини шеэрден тышарыгъа чыкъарып, Бетаниягъадже алып кельди. Анда эллерини котерип, оларгъа хайыр дувасыны окъуды.

⁵¹Дува окъугъанда, олардан узакълашып кокке котерильди.

⁵²Шегиртлери Онъа бель букип, буюк къуванчнен Ерусалимге къайтып кельдилер.

⁵³Бутюн вакъыт Алланынъ Сарайында олып, Алланы шерефлей эдилер.