Read Мукъаддес Китап къырымтатар тилинде, Лука 3 Bible Online

Лука 3 - Мукъаддес Китап къырымтатар тилинде, bible

Лука 3

¹Император Тиберийнинъ падишалыгъынынъ он бешинджи йылында, Понтий Пилат — Еудиеде акимлик япкъанда, Ирод — Галилеяда, онынъ къардашы Филип — Итурея ве Трахонит виляетлеринде, Лисаний — Абиленеде укюмдарлыкъ эте эдилер.

²Аннас ве Каяфа баш руханий вазифесинде эдилер. О вакъыт Зекарьянынъ огълу Ягъя сахрада олгъанда, Алланынъ Сёзю онъа кельди.

³Ягъя Иордан озенининъ этрафларыны айланып юрди ве гуналары багъышланмасы ичюн адамларны тёвбе этмеге ве сувгъа батырылып чыкъмагъа давет этти.

⁴Бу акъкъында Ешая пейгъамбернинъ китабында язылгъан эди: «Сахрада бир сес гудюрдей: „Раббининъ ёлуны азырланъыз, Кечеджек ерлерини тюм-тюз этинъиз!

⁵Эписи вадийлер толдурылсынлар, байырлар ве дагълар алчакъ этильсинлер. Къыйыш ёллар догърултылсын, чукъурлы ёлчыкълар тегиз этильсинлер!

⁶О вакъыт, яшагъанларнынъ эписи Алладан къуртарув кореджеклер”».

⁷Сувгъа батырылып чыкъмакъ ичюн, онъа топларнен кельген адамларгъа Ягъя: — Эй йылан союндан олгъанлар! Башынъызгъа келеяткъан Алланынъ гъазабындан къачып къуртуладжагъынъызны сизге ким огретти?

⁸Тёвбе эткенинъизни озь ишлеринъизнен исбат этинъиз! Тек ичинъизден: «Ибраим бизим бабамыз!» — деп отурманъыз. Мен сизлерге шуны айтам: Алланынъ мына бу ташлардан Ибраимге бала япмагъа къудрети бар.

⁹Шимди тереклернинъ тамырлары янында балта азыр ята. Яхшы мейва бермеген эр бир терекни кесип, атешке ташлайлар, — дей эди.

¹⁰Халкъ ондан: — Биз не япмакъ керекмиз? — деп сорай.

¹¹Ягъя оларгъа: — Кимде эки чифт тюп урбасы олса, мухтадж олгъаннен пайлашсын. Кимнинъ ашы олса, о да бойле япсын, — деди.

¹²Салым топлайыджылар да сувгъа батырылмагъа кельдилер ве ондан: — Оджамыз, биз не япайыкъ? — деп сорадылар.

¹³Ягъя оларгъа: — Ольчюсинден зияде салым алманъыз, — деди.

¹⁴Аскерлер де ондан: — Я биз не япайыкъ? — деп сорадылар. — Зорнен параларыны тутып алманъыз, ялан шаатлыкъ берменъиз, озь къазанчынъызгъа разы олунъыз, — деди Ягъя.

¹⁵Халкъ Месихни пек беклей эди. Эписи адамларнынъ гонълюнде: «Ягъя Месих дегиль экенми?» — деген тюшюнджелер бар эди.

¹⁶Ягъя исе эписине: — Мен сизни сувгъа батырып чыкъарам. Амма менден къудретлиси келеята, мен Онынъ аякъкъапларынынъ багъыны чезмеге биле ляйыкъ дегилим. О сизни Мукъаддес Рухкъа ве атешке батыраджакъ.

¹⁷Онынъ къолунда махсус куреги бар. О, Озь арманыны темизлейджек: богъдайны анбарына топлап, кепекни исе сёнмез атеште якъаджакъ, — деп джевап берди.

¹⁸Ягъя пейгъамбер бойле ве чокъ башкъа сёзлернен халкъкъа Къуванчлы Хаберни бильдирди.

¹⁹Ягъя, виляет укюмдары Иродны, озь къардашынынъ сабыкъ апайы Иродиягъа эвленгени ве эписи яман япкъан ишлери ичюн, къабаатлады.

²⁰Ирод исе сонъунда Ягъяны зиндангъа атты ве бунынънен даа бир джинает япты.

²¹Бутюн халкъ сувгъа батырылып чыкъкъанда, Иса да шуны япты. О, дува окъугъанда, кок ачылды да,

²²Мукъаддес Рух беден корюнишинде, гогерджин сымасында Онынъ устюне энди. Коктен: «Сен Меним севимли Огълумсынъ, Мен Сенден разым», — деген сес эшитильди.

²³Иса Озь хызметини башлагъанда, къарарнен отуз яшларында эди. Адамлар Оны Юсуфнынъ огълу беллей эдилер. Юсуф исе Элининъ огълу,

²⁴Эли — Маттатнынъ огълу, Маттат — Левийнинъ огълу, Левий — Мелхининъ огълу, Мелхи — Яннайнынъ огълу, Яннай — Юсуфнынъ огълу,

²⁵Юсуф — Маттатиянынъ огълу, Маттатия — Амоснынъ огълу, Амос — Наумнынъ огълу, Наум — Эслининъ огълу, Эсли — Наггайнынъ огълу,

²⁶Наггай — Маатнынъ огълу, Маат — Маттатиянынъ огълу, Маттатия — Шимийнинъ огълу, Шимий — Ёсехнинъ огълу, Ёсех — Ёданынъ огълу,

²⁷Ёда — Ёананнынъ огълу, Ёанан — Ресанынъ огълу, Реса — Зеруббавелнинъ огълу, Зеруббавел — Шеалтиэльнинъ огълу, Шеалтиэль — Нерининъ огълу,

²⁸Нери — Мелхининъ огълу, Мелхи — Аддининъ огълу, Адди — Къосамнынъ огълу, Къосам — Эльмадамнынъ огълу, Эльмадам — Эрнинъ огълу,

²⁹Эр — Ёшуанынъ огълу, Ёшуа — Элиезернинъ огълу, Элиезер — Ёримнинъ огълу, Ёрим — Маттатнынъ огълу, Маттат — Левийнинъ огълу,

³⁰Левий — Шимеоннынъ огълу, Шимеон — Ехуданынъ огълу, Ехуда — Юсуфнынъ огълу, Юсуф — Ёнамнынъ огълу, Ёнам — Эльякимнинъ огълу,

³¹Эльяким — Мелеанынъ огълу, Мелеа — Меннанынъ огълу, Менна — Маттатанынъ огълу, Маттата — Натаннынъ огълу, Натан — Давутнынъ огълу,

³²Давут — Йишайнынъ огълу, Йишай — Оведнинъ огълу, Овед — Боазнынъ огълу, Боаз — Салмоннынъ огълу, Салмон — Нахшоннынъ огълу,

³³Нахшон — Амминадавнынъ огълу, Амминадав — Админнинъ огълу, Админ — Арнининъ огълу, Арни — Хецроннынъ огълу, Хецрон — Парецнинъ огълу, Парец — Ехуданынъ огълу,

³⁴Ехуда — Якъупнынъ огълу, Якъуп — Исхакънынъ огълу, Исхакъ — Ибраимнинъ огълу, Ибраим — Терахнынъ огълу, Терах — Нахорнынъ огълу,

³⁵Нахор — Серугнынъ огълу, Серуг — Реунынъ огълу, Реу — Пелегнинъ огълу, Пелег — Эвернинъ огълу, Эвер — Шелахнынъ огълу,

³⁶Шелах — Кенаннынъ огълу, Кенан — Арпакъшаднынъ огълу, Арпакъшад — Шемнинъ огълу, Шем — Нухнынъ огълу, Нух — Ламехнинъ огълу,

³⁷Ламех — Метушелахнынъ огълу, Метушелах — Ханохнынъ огълу, Ханох — Ереднинъ огълу, Еред — Махалалэлнинъ огълу, Махалалэл — Кенаннынъ огълу,

³⁸Кенан — Эношнынъ огълу, Энош — Шетнинъ огълу, Шет — Адемнинъ огълу, Адем — Алланынъ огълу эди.