Read Мукъаддес Китап къырымтатар тилинде, Лука 7 Bible Online

Лука 7 - Мукъаддес Китап къырымтатар тилинде, bible

Лука 7

¹Иса сёзюни халкъкъа айтып битирген сонъ, Кафарнаум шеэрине келип чыкъты.

²Анда бир юзбашынынъ энъ севимли къулу хасталанып, олюм алында экен.

³Юзбашы, Иса акъкъында эшитип, О, келип къулумны къуртарсын деп риджа этмек ичюн, еудийлернинъ акъсакъалларыны Онынъ алдына ёллады.

⁴Олар Исанынъ янына кельдилер ве гъайретнен риджа этип: — Бу адам Сенинъ ярдымынъа ляйыкътыр.

⁵О, халкъымызны севе ве бизге синагога къурды, — дедилер.

⁶Иса оларнен кетти. Олар юзбашынынъ эвине якъынлашкъанда, о, достларынен бойле хабер ёллады: — Эфендим, замет этме, Сен эвиме киргенинъе мен ляйыкъ дегилим.

⁷Шунынъ ичюн Сенинъ алдынъа озюм бармадым, чюнки озюмни, бунъа ляйыкъ дегилим, деп саям. Сен тек буюрсанъ, къулум тедавийленир.

⁸Чюнки мен де бойсунам, манъа да бойсунгъан аскерлер бар. Бирисине: «Кет», — десем, кете. Башкъасына: «Кель мында», — десем, келе. Хызметчиме: «Шуны яп», — десем, япа, — деди.

⁹Иса бу сёзлерни эшитип, тааджипленди ве артындан кельген адамларгъа айланып: — Сизге айтам: Мен бойле иманны Исраильде биле тапмадым, — деди.

¹⁰Ёлланылгъанлар исе, эвге къайтып кельгенде, къулнынъ тюзельгенини корьдилер.

¹¹Арадан чокъ вакъыт кечмей, Иса Наин деген шеэрге кетти. Онен берабер шегиртлери ве пек чокъ адам юре эди.

¹²Иса шеэрнинъ къапусына якъынлашкъанда, бир ольген адамны чыкъара эдилер. О, тул къадыннынъ бирден-бир огълу эди. Шеэрнинъ чокъ адамлары о къадыннен берабер кете.

¹³Рабби шу къадынны корьгенинен, аджыды ве: — Агълама! — деди де,

¹⁴дженазе табутына якъынлашып, къолунен тийди. Табутны алып кеткен адамлар токътадылар. Иса исе: — Эй йигит, санъа айтам: тур еринъден! — деди.

¹⁵Олю котерилип отурды да, лаф этип башлады. Иса оны анасына къайтарды.

¹⁶Эр кесни буюк бир къоркъу басты. Олар Алланы шуретлеп: — Арамызда буюк пейгъамбер пейда олды. Алла Озь халкъына ярдым этмеге кельди, — дедилер.

¹⁷Иса акъкъында бу хабер бутюн Еудие ве онынъ этрафларына даркъалды.

¹⁸Ягъянынъ шегиртлери онъа бутюн олып кечкен вакъиалар акъкъында хабер эттилер. Ягъя шегиртлеринден экисини чагъырып:

¹⁹«Келеджек Бириси Сенсинъми? Я да биз башкъасыны беклейикми?» — деп сорамакъ ичюн оларны Раббининъ алдына ёллады.

²⁰Акъайлар, Онынъ алдына келип: — Бизни Сувгъа Батырыджы Ягъя ёллады. О Сенден: «Келеджек Бириси Сенсинъми? Я да биз башкъасыны беклейикми?» — деп сорай, — дедилер.

²¹О вакъыт Иса чокъ адамларны хасталыкълардан ве оларны чекиштирген дертлерден тедавийлей, яман рухлардан къуртара, чокъ сокъурларнынъ козьлерини ача эди.

²²Иса джевап берип: — Барынъ да, корип эшиткенлеринъизни Ягъягъа айтынъыз: кёр адамлар кене корелер, топаллар юрелер, лепра хасталыгъына огърагъанлар элялланып тедавийленелер, сагъырлар эшителер, олюлер тири олалар ве фукъарелер Къуванчлы Хаберни эшителер.

²³Мен ичюн ёлдан урулмагъан адам бахтлыдыр! — деди.

²⁴Ягъянынъ ёллагъан адамлары кеткен сонъ, Иса халкъкъа Ягъя акъкъында айтып башлады: — Сиз не ичюн сахрагъа бардынъыз? Ельде саллангъан къамышны корьмегеми?

²⁵Айса, сахрагъа не ичюн бардынъыз? Паалы урба кийген адамны корьмегеми? Лякин паалы урба кийип, байлыкъта яшагъанлар падишалар сарайларында олалар.

²⁶Айса, кимни корьмеге бардынъыз? Пейгъамберними? Эбет, пейгъамберни! Сизге Мен айтам: о, пейгъамберден де буюк.

²⁷Алланынъ Китабында бу адам акъкъында язылгъан эди: «Сенден эвель хаберджимни ёллайым. О Сенинъ огюнъде ёл азырлайджакъ».

²⁸Сизге айтам: эписи догъгъан адамлардан Ягъядан буюк олгъаны ёкътыр. Бунъа бакъмадан, Алланынъ Падишалыгъында энъ кучюк сайылгъан биле ондан буюктир.

²⁹Буны эшиткен бутюн халкъ, салым топлайыджылар биле, Аллагъа, догъру деп, бойсундылар ве Ягъянынъ алдына сувгъа батырылып чыкъмакъ ичюн кельдилер.

³⁰Фериселер ве Къанун оджалары исе Алланынъ ирадесини ред этип, Ягъягъа барып сувгъа батырылып чыкъмагъа разы олмадылар.

³¹Иса девам этип: — Бу адам несилини неге ошатайым? Олар кимге ошайлар?

³²Олар мейданда отурып, бир-бирине: «Биз сизге къавал чалдыкъ, сиз исе ойнамадынъыз. Биз такъмакълар окъудыкъ, сиз исе агъламадынъыз», — деп къычыргъан балаларгъа ошайлар.

³³Чюнки Сувгъа Батырыджы Ягъя келип, аш ашамады, шарап ичмеди. Сиз исе: «Онда джин яшай», — дейсиз.

³⁴Инсан Огълу келип, эм ашай, эм иче, ве сиз: «Бу ачкозь ве ичкиджиге бакъынъыз! О — салым топлайыджылары ве гуналыларнынъ досту!» — дейсиз.

³⁵Лякин икмет бутюн озь балаларынен тасдыкълана, — деди.

³⁶Фериселерден бири Исаны онен аш ашамагъа давет этти. Иса, ферисенинъ эвине кирип, софра башында ер алды.

³⁷Шу арада, шеэрде гуналы деп белли олгъан бир къадын, Иса ферисенинъ эвинде ашагъаныны билип, алебастрдан ясалгъан савут ичинде паалы къокъулы ягъ алып кельди.

³⁸О, Исанынъ артында, Онынъ аякълары янында турып, окюр-окюр агълады. Къадыннынъ козь яшлары Исанынъ аякъларына тамлай, о, исе озюнинъ сачларынен Онынъ аякъларыны сюртти ве опе-опе къокъулы ягънен ягълады.

³⁹Исаны давет эткен ферисе буны корип: «Эгер бу адам пейгъамбер олса, Онъа тийген шу къадыннынъ ким олгъаныны билир эди, чюнки о гуналы да», — деп тюшюнди.

⁴⁰Иса, онъа айланып: — Симон, санъа бир айтаджакъ шейим бар, — деди. — Айт, Оджам, — деди о.

⁴¹— Эки адам бир инсандан акъча борджкъа алгъан. Бирисининъ борджу беш юз, башкъасынынъ — элли динар эди.

⁴²Амма олар борджларыны къайтарып оламагъанлары ичюн, о, экисининъ борджларыны багъышлады. Айт манъа, олардан къайсы бири оны чокъча севеджек? — деди Иса.

⁴³Симон джевап берип: — Меним фикиримдже, чокъ борджу багъышлангъан сою, — деди. — Сенинъ къарарынъ догъру, — деди Иса.

⁴⁴Сонъ къадынгъа таба айланып, Симонгъа: — Бу къадынны коресинъми? Мен сенинъ эвинъе кельгенимде, аякъларымны ювмагъа сув бермединъ. О исе, озюнинъ козь яшларынен аякъларымны ювып, сачларынен сюртти.

⁴⁵Сен Мени къаршылагъанда опьмединъ. Амма бу къадын, кельгенимден берли аякъларымны опип токътамай.

⁴⁶Сен Меним башымны зейтюн ягъынен ягъламадынъ, о исе, паалы къокъулы ягънен аякъларымны ягълады, — деди.

⁴⁷— Шунынъ ичюн Мен санъа айтам: онынъ чокъ гуналары багъышланды, чюнки онынъ севгиси буюк. Кимге аз багъышланса, о, аз севе.

⁴⁸Сонъ Иса къадынгъа: — Гуналарынъ багъышланды, — деди.

⁴⁹Башкъа мусафирлер исе озьара: «Ким олгъан бу, гуналарны биле багъышлай?» — деп тюшюндилер.

⁵⁰Иса исе къадынгъа: — Сени иманынъ къуртарды. Тынч олып бар, — деди.