Read Мукъаддес Китап къырымтатар тилинде, Къануннынъ текрары 10 Bible Online

Къануннынъ текрары 10 - Мукъаддес Китап къырымтатар тилинде, bible

Къануннынъ текрары 10

¹О вакъыт РАББИ манъа бойле деди: «Эки таш левасы кес. Олар биринджилерине ошасын. Сонъ Манъа дагъгъа котериль. Даа агъачтан сандыкъ яп.

²Левалар устюнде Мен, сен сындыргъан биринджи леваларда олгъан сёзлерни язаджагъым. Леваларны сандыкъкъа къой».

³Мен акация терегинден бир сандыкъ яптым ве биринджи олгъаны киби таш левалары кестим. Сонъ дагъгъа котерилип башладым. Къолумда левалар бар эди.

⁴Левалар устюнде РАББИ, биринджи кере язгъаны киби, он эмирни язды ве манъа берди. Сиз дагънынъ янында топлашкъан куню РАББИ атеш ичинден шу он эмирни сизге айткъан эди.

⁵Сонъ мен айланып дагъдан тюштим ве леваларны мен япкъан сандыкъкъа къойдым. РАББИ манъа эмир эткени киби, олар бугунь де андадыр.

⁶Исраиллилер Беэрот Бене-Яакъандан Мосерагъа ёл алдылар. Анда Харун ольди ве дефн этильди. Онынъ ерине огълу Элазар руханий олды.

⁷Андан Гудгодагъа, Гудгодадан исе сув акъымлары олгъан Ётватагъа ёл алдылар.

⁸О заман РАББИ Левий къабилесини айырды. Олар РАББИнинъ Васиети Сандыгъыны ташымакъ, РАББИнинъ огюнде турып Онъа хызмет этмек ве Онынъ адындан хайыр дуасыны окъумакъ керек оладжакъ эди. Бугунь де о, девам эте.

⁹Онынъ ичюн левийлининъ агъа-къардашларынынъ арасында пайы ве мулькю ёкътыр. Алланъ олгъан РАББИ онъа айткъаны дайын, РАББИ Озю — онынъ мулькюдир.

¹⁰Мен, эвельдеки киби, дагъ устюнде 40 кунь ве 40 гедже эдим. Бу сефер де РАББИ мени динъледи ве сизни ёкъ этмеге истемеди.

¹¹РАББИ манъа бойле деди: «Бар да, халкънынъ огюнде кетип, ёлгъа чыкъ. Мен баба-деделерине бермеге ант эткен топракъкъа барсынлар ве онынъ саиплери олсунлар».

¹²Демек, Исраиль, Алланъ олгъан РАББИ сенден нени истей? Алланъ олгъан РАББИден къоркъ, Онынъ эписи ёлларындан кет, сев Оны ве бутюн гонълюнънен ве бутюн джанынънен Алланъ олгъан РАББИге хызмет эт.

¹³РАББИнинъ эмирлерини ве бугунь мен санъа буюргъан къарарларны тут. Сонъ санъа яхшы олур.

¹⁴Бакъ! Коклер ве коклернинъ коклери, ер юзю ве ер юзюнде олгъан эписи шейлер — Алланъ олгъан РАББИнинъдир.

¹⁵Лякин РАББИ баба-деделеринъе ашыкъ олгъан, сизни севген ве эписи халкълардан сизни, оларнынъ эвлятларыны сайлап алгъан эди. Бугунь де ойледир.

¹⁶Бойлеликнен, юреклеринъизни сюннет этинъиз де, энъсеси къаткъан адамлар олманъыз.

¹⁷Чюнки Алланъыз олгъан РАББИ — аллаларнынъ Алласы, раббилернинъ РАББИсидир, улу, къудретли ве къоркъунчлы Алладыр! О адамларнынъ бетине бакъмай, къапарлар алмай.

¹⁸О, оксюзлернинъ ве тул къадынларнынъ даваларыны адалетли суд эте, ят халкълардан олгъанларны севе ве оларгъа питенен урба бере.

¹⁹Аранъызда яшагъан ят халкъларындан олгъан адамларны севинъиз, чюнки Мысыр топрагъында озьлеринъиз де ят эдинъиз.

²⁰Алланъ олгъан РАББИден къоркъ, Онъа хызмет эт, япыш Онъа ве Онынъ Адынен ант эт.

²¹Макъта Оны! О — сенинъ Алланъ. Сен козьлеринънен корьген эписи къудретли ве къоркъунчлы ишлерни япкъан — Алладыр!

²²Баба-деделеринъ Мысыргъа 70 джан олып кельген эди. Шимди исе Алланъ олгъан РАББИ сени кок йылдызлары киби чокъ сайылы япкъандыр!