Read Мукъаддес Китап къырымтатар тилинде, Къануннынъ текрары 14 Bible Online

Къануннынъ текрары 14 - Мукъаддес Китап къырымтатар тилинде, bible

Къануннынъ текрары 14

¹Сиз — Алланъыз олгъан РАББИнинъ огъулларысынъыз. Тенинъизни кесменъиз, олюлер ичюн янып козьлеринъизнинъ устюнден сачларынъызны къыркъманъыз.

²Чюнки Алланъ олгъан РАББИнинъ сен — азиз халкъысынъ. Ер юзюнде олгъан эписи халкълардан РАББИ сени Озь шахсий халкъы этип сайлагъан.

³Бир тюрлю пис шейни ашама.

⁴Сизге ашамагъа мумкюн олгъан айванлар мына: бугъа, къой, эчки,

⁵сыгъын, гъазель, ала кийик, кийик теке, антилоп, джейран, дагъ къою.

⁶Туякълары болюнген, я да экиге айырылгъан ве кевшекни кевшеген айванларнынъ эписини ашанъыз.

⁷Лякин кевшекни кевшеген ве туякълары экиге болюнген айванлардан мына буларны ашаманъыз: девени, тавшанны ве къая къоянны. Чюнки олар кевшеселер де, туякълары экиге болюнмеген. Олар сиз ичюн арамдыр.

⁸Домузны да ашаманъыз. Онынъ туякълары экиге болюнген, амма о кевшемей. Домуз сиз ичюн арамдыр. Бу айванларнынъ этини ашаманъыз, лешине де токъунманъыз.

⁹Сувда яшагъанларнынъ эписинден ялдавучларынен пуллары олгъанларнынъ эр тюрлю сойларыны ашанъыз.

¹⁰Пулларынен ялдавучлары олмагъан сойларыны исе ашаманъыз — олар сиз ичюн арамдыр.

¹¹Эр бир элял къушны ашанъыз.

¹²Лякин буларны сизге ашамагъа мумкюн дегиль: къарталны, акъбабаны, денъиз къарталыны,

¹³чайлакъны, шаинни, санкъурны ве онынъ ич бир союны,

¹⁴къузгъунны ве онынъ ич бир союны,

¹⁵деве къушуны, миявкъушны, чагъаланы, къыргъыйны ве онынъ ич бир союны,

¹⁶пугъуны, аджибабаны, акъ байкъушны,

¹⁷къашыкъ къушны, леш къарталыны, бакъланны,

¹⁸лейлекни, балыкъ чильни ве онынъ ич бир союны, опепопны ве яркъанатны.

¹⁹Учкъан боджеклернинъ эписи сиз ичюн арамдыр, оларны ашаманъыз.

²⁰Эр бир элял къушны ашанъыз.

²¹Ич бир тюрлю ольген шейни ашаманъыз. Сизинъ шеэрлеринъизде ят халкълардан олгъанларгъа беринъиз оны. О, оны ашасын. Я да бу ольген шейни сатынъыз онъа. Сиз исе — Алланъыз олгъан РАББИнинъ азиз халкъысынъыз. Улакъны анасынынъ сютюне пиширменъиз.

²²Тарладан эр йыл джыйгъан берекетинъден он пайда бир пайыны мытлакъа айыр

²³ве оны Алланъ олгъан РАББИнинъ огюнде, Намы олсун деп, сайлагъан ерде аша. Ашлыгъынънынъ, яш шарабынънынъ ве зейтюн ягъынънынъ он пайда бир пайыны, туварлар ве къой-эчкилеринънинъ биринджи несилини де, Алланъ олгъан РАББИден омюрбилля къоркъмагъа огренмек ичюн, алып аша.

²⁴Алланъыз олгъан РАББИ санъа чокъ берекет берген вакъытта, эгер сен Алланъ олгъан РАББИнинъ, Намы анда олсун деп, сайлагъан еринден пек узакъ яшасанъ ве шунынъ эписини анда алып кетип оламасанъ,

²⁵шу шейлеринъни парагъа сат да, о паранен къолунъда Алланъ олгъан РАББИ сайлагъан ерге кель.

²⁶О парагъа эр тюрлю джанынъ истеген шейлерни: туварлар, къой-эчкилер, шарап ве ичкини, эм де башкъа эр тюрлю джанынъ сорагъан шейлерни, — сатын ал ве анда Алланъ олгъан РАББИнинъ огюнде ашап, эвдекилеринънен берабер шенълен.

²⁷Сиз яшагъан ерлеринъизде олгъан левийлилерни де унутманъыз, чюнки оларнынъ, сенинъ киби, мал-мулькюнинъ пайы ёкътыр.

²⁸Эр учь йыл кечкенинен йылнынъ эписи берекетининъ он пайда бир пайыны айыр да, яшагъан ерлеринъе къой.

²⁹Сонъ, сенинъ киби пайлары ве мал-мулькю олмагъан левийлилер кельсинлер. Сизинъ ерлеринъизде ят халкълардан олгъанлар, оксюзлер, тул апайлар да келип, тойгъандже ашасынлар. Сонъ Алланъ олгъан РАББИ санъа эр бир туткъан ишинъде берекет берер.