Read Мукъаддес Китап къырымтатар тилинде, Къануннынъ текрары 21 Bible Online

Къануннынъ текрары 21 - Мукъаддес Китап къырымтатар тилинде, bible

Къануннынъ текрары 21

¹Эгер Алланъ олгъан РАББИ санъа мульк оларакъ береджек топракъта чёльде яткъан ольдюрильген адам тапылып ве оны ким ольдюргени белли олмаса,

²акъсакъаллар ве къадылар чыкъып, ольдюрильген адамдан чевре-четинде олгъан шеэрлерине къадар ёлнынъ узунлыгъыны ольчесинлер.

³Ольдюрильген адамгъа энъ якъын олгъан шеэрнинъ акъсакъаллары, ишлетильмеген ве боюндырыкъ такъмагъан бир тана алсынлар.

⁴О тананы алып, ишленильмеген ве устюнде бир шей сачылмагъан, акъкъан суву олгъан вадийге кетирсинлер. О вадийде олар тананынъ бойнуны сындырсынлар.

⁵Сонъ руханийлер олгъан Левийнинъ огъуллары якъынлашсынлар, чюнки Алланъ олгъан РАББИ оларны Озюне хызмет этмек, Онынъ адындан хайыр дуасыны окъумакъ ве эр бир тартышма ве уджюм давасыны чезмек ичюн сайлагъан.

⁶Сонъ ольдюрильген адамгъа энъ якъын олгъан шеэрнинъ акъсакъаллары келип, вадийде бойну сындырылгъан тананынъ устюнден къолларыны ювсунлар

⁷ве бойле айтсынлар: «Бу адамнынъ къаныны къолларымыз тёкмеди, козьлеримиз де джинаетни корьмеди.

⁸Я РАББИм, Сен Озь халкъынъны, сатын алгъан Исраильни гунадан арындыр, бу къабаатсыз ольдюрильген адамнынъ къаны ичюн Озь халкъынъдан акъкъыны сорама». Сонъ олар къан гунасындан арынырлар.

⁹Бойледже, сен озюнъни къабаатсыз къан гунасындан арындырырсынъ, чюнки РАББИнинъ козю огюнде сен догърулыкъ япмакъ керексинъ.

¹⁰Душманларынънен дженклешмеге чыкъып, Алланъ олгъан РАББИ оларны къолунъа бергенинен, оларны эсир этип алсанъ

¹¹ве эсир адамларнынъ арасында дюльбер апайны корип, онъа севда олып эвленмеге истесенъ,

¹²оны эвинъе кетир. О, сачларыны тыраш этсин, тырнакъларыны кессин.

¹³Сонъ эсир этильген вакътында ташыгъан урбасыны устюнден чыкъарып, бир ай девамында эвинъде булунып, анасы-бабасы артындан яныкълап агъласын. Бир ай кечкен сонъ, сен онъа кирип акъайы олмакъ мумкюнсинъ, о да апайынъ олур.

¹⁴Ондан разы олмасанъ эгер, оны истеген ерине йибер. Лякин оны парагъа сатмагъа олмаз. Оны къул ерине корьме, чюнки сен артыкъ онынъ намусыны лекелединъ.

¹⁵Бир акъайнынъ эки апайы олып, о, бирини севсе, экинджисини исе кореджек козю олмаса, ве олар экиси де онъа огъул тапсалар, эм де о, севмеген апайы биринджи олып огъул тапса,

¹⁶шу акъай мал-мулькюни пай эткен кунюнде о, севмеген апайынынъ биринджи догъгъан огълундан биринджилигини алып, севген апайынынъ огълуна бермеге олмаз.

¹⁷Лякин севмеген апайынынъ огълунынъ биринджилигини тасдикълап, бутюн мулькюнден пайны эки къат чокъ бермек керек, чюнки шу огълу — акъай кучюнинъ биринджи догъгъан баласыдыр, биринджи догъгъан акъкъы онынъкидир.

¹⁸Эгер биревнинъ огълу инат, итаатсыз олса ве ана-бабасынынъ сёзюни динълемесе, олар оны догъру ёлгъа къойсалар да, о, къулакъ асмаса,

¹⁹анасынен бабасы оны тутып, олар яшагъан шеэрнинъ къапуларына, акъсакъалларгъа кетирсинлер.

²⁰Акъсакъалларгъа бойле десинлер: «Мына бизим огълумыз инат ве итаатсыз, сёзюмизни динълемей, акъчаны савура ве иче».

²¹О заман шеэр акъайларнынъ эписи оны ташнен урып ольдюрсинлер. Бойле этип, аранъыздаки яманлыкъны ёкъ эт. Эписи исраиллилер буны эшитип, къоркъарлар.

²²Эгер бирев олюм джезасына ляйыкъ джинает этсе, ве оны ольдюрип терекке ассанъыз,

²³онынъ джеседи теректе геджелемесин. Мытлакъа оны о куню де дефн эт, чюнки теректе эр бир къалдырылгъан адам Алланынъ огюнде лянетлидир. Алланъ олгъан РАББИ санъа мульк оларакъ береджек топракъны арамлама.