Read Мукъаддес Китап къырымтатар тилинде, Къануннынъ текрары 23 Bible Online

Къануннынъ текрары 23 - Мукъаддес Китап къырымтатар тилинде, bible

Къануннынъ текрары 23

¹Кимнинъ йымырталары эзильген я да чумийи кесильген олса, онъа РАББИнинъ джемиетине кирмеге олмаз.

²Пич балагъа РАББИнинъ джемиетине кирмеге олмаз. Онынъ онунджы несилине биле РАББИнинъ джемиетине кирмеге олмаз.

³Аммонлыларгъа ве моавлыларгъа РАББИнинъ джемиетине кирмеге олмаз. Оларнынъ онунджы несилине биле ич бир вакъыт РАББИнинъ джемиетине кирмеге олмаз.

⁴Чюнки сиз Мысырдан кеткенинъизде, олар сизни пите ве сувнен къаршыламагъанлар ве чюнки олар, сизни къаргъамакъ ичюн, Арам-Нахараим еринден, Петор шеэринден олгъан Беорнынъ огълу Беламны парагъа туткъанлар.

⁵Лякин Алланъ олгъан РАББИ Беламны динълемеге истемеген. Алланъ олгъан РАББИ сени севгени ичюн, О, къаргъышыны бахыткъа чевирген.

⁶Омюрбилля, ич бир вакъыт оларнен барышмагъа ве аранъыз аман олгъаныны истеме.

⁷Эдомлыларгъа нефрет беслеме, чюнки олар сенинъ сой-сопларынъдыр; мысырлыларгъа да нефрет беслеме, чюнки сен оларнынъ топрагъында ят олып яшагъансынъ.

⁸Оларнынъ учюнджи несилинде догъгъан эвлятлары РАББИнинъ джемиетине кирмек мумкюнлер.

⁹Исраиль, душманларынъа къаршы сеферге чыкъкъанынъда, эр яманлыкътан сакъын.

¹⁰Эгер аранъызда бир де бир акъай геджесинен тёшегинде олгъанындан арамланса, ордудан чыкъсын ве кирмесин анда.

¹¹Акъшам тюшкенинен ювунсын да, кунь баткъанда ордугъа кирсин.

¹²Ордудан тыш озюнъе косьтергич яп ве анда ордудан аджетинъизни япмакъ ичюн кет.

¹³Алетлеринъде куречигинъ де олмакъ керек. Ордудан четте отургъан сонъ, ерни къаз да, ишинъни битирген сонъ, айланып, оны комип къой.

¹⁴Чюнки сени къуртаргъан, душманларынъны къолунъа берген Алланъ олгъан РАББИ ордунъда юре. Онынъ ичюн ордунъ азиз олсун. Ёкъса РАББИ насылдыр къапатылмагъан айыплыкъны корип, сенден кетеджек.

¹⁵Эфендисинден санъа къачып кельген къулны эфендисине къайтарма.

¹⁶Сенде, аранъызда, бир де бир яшагъан еринъде озю бегенип сайлагъан ерде яшасын. Оны хорлама.

¹⁷Исраиль къызларында ве огъулларында не апай, не акъай путхане ороспулары олмасын.

¹⁸Ороспулыкънен къазангъан акъчаны не апайгъа, не акъайгъа бир тюрлю адакъ беджермек ичюн Алланъ олгъан РАББИнинъ эвине кирсетмеге ёл берме. Чюнки эм биринджиси, эм экинджиси Алланъ олгъан РАББИнинъ огюнде писликтир.

¹⁹Семетдешинъе кумюшни, ашлыкъны, я да башкъа бир шейни борджкъа бергенде, ич бир файыз сорама.

²⁰Ябанджыгъа бир де бир шейни борджкъа бергенде, ондан файыз сорамакъ мумкюнсинъ, амма семетдешинъден дегиль. Бу эмирни тутсанъ, Алланъ олгъан РАББИ санъа мульк оларакъ береджек топракъта эр туткъан ишинъде санъа берекет береджек.

²¹Эгер Алланъ олгъан РАББИге адакъ берген олсанъ, оны беджермек вакътыны созма. Ёкъса Алланъ олгъан РАББИ сенден мытлакъа сорар, ве башынъа гуна олур.

²²Эгер адакъ бермеген олсанъ, башынъа гуна олмаз.

²³Агъзынъдан чыкъкъан эр бир лафынъа бакъ; Алланъ олгъан РАББИге озь истегинънен, озь агъзынънен адагъан шейни ерине кетир.

²⁴Башкъа адамнынъ юзюмлигине кирип, юзюмни джанынъ истегенинъ къадар ашамакъ мумкюнсинъ, савутынъны исе толдурма.

²⁵Башкъасынынъ пишкен ашлыгъына кирип, башакъларны къолларынънен узьмек мумкюнсинъ, орагъынъны исе башкъа адамнынъ махсулына котерме.