Read Мукъаддес Китап къырымтатар тилинде, Къануннынъ текрары 24 Bible Online

Къануннынъ текрары 24 - Мукъаддес Китап къырымтатар тилинде, bible

Къануннынъ текрары 24

¹Бир акъай озюне апай алып, эвленсе, амма апайнынъ айыплыгъы ачылгъаны ичюн акъайнынъ козюнде урьмет тапмаса, акъай айырылыкъ кягъытыны язып, онынъ къолуна бермек ве сонъ оны озь эвинден чыкъармакъ мумкюн.

²О апай, акъайнынъ эвинден чыкъып кетип, башкъасына акъайгъа чыкъмакъ мумкюн.

³Лякин башкъасы да оны кореджек козю олмайып, айырылыкъ кягъытыны язып ве къолуна берип, озь эвинден чыкъарса, я да онынъ экинджи, оны апай оларакъ алгъан акъайы ольсе,

⁴оны йиберген биринджи акъайы, апайы арамлангъан сонъ, онъа эвленип олмаз. Бу — РАББИнинъ огюнде писликтир. Алланъ олгъан РАББИ санъа мирас оларакъ береджек топракъны гунагъа батырма.

⁵Ким якъында эвленген олса, дженкке кетмесин, ве бир тюрлю башкъа иш онъа буюрылмасын. О, азат къалып, бир йыл девамында эвленген апайыны къувандырсын.

⁶Дегирмен я да дегирменнинъ юкъары ташыны залоггъа алмагъа олмаз, чюнки бу, адамнынъ джаныны залоггъа алмасына тенъдир.

⁷Эгер бир адам, семетдешлеринден, Исраиль эвлятларындан олгъан бирини хырсызлап, онен серт олып, оны сатса, ве бу шей ачылса, бойле хырсызны ольдюрмек керек. Бойле этип, аранъыздаки яманлыкъны ёкъ этинъиз.

⁸Сакъын, тери хасталыкълары пейда олгъанда, левийли руханийлер санъа огреткенлерининъ эписини яп. Мен оларгъа эмир эткенлеримни япынъыз.

⁹Сиз Мысырдан кеткен сонъ, Алланъ олгъан РАББИ Мерьемге не япкъаныны [10] акъылынъда тут.

¹⁰Башкъа адамгъа бир шейни борджкъа берсенъ, залог алмакъ ичюн эвине кирмеге акъкъынъ ёкъ.

¹¹Азбарда тур; сенден борджкъа алгъан адам исе залогны санъа азбаргъа алып чыкъсын.

¹²О, ёкъсул олса, залогыны юкъламагъа яткъанда озюнъде къалдырма.

¹³Кунь батмаздан эвель, мытлакъа къайтар онъа онынъ залогыны, ве о, урбасынен япынып юкълар ве санъа яхшылыкъ тилер. Алланъ олгъан РАББИнинъ козю огюнде исе бу иш санъа инсафлыкъ деп сайыладжакъ.

¹⁴Топрагъынъда, яшагъан ерлеринъде олгъан ёкъсул ве фукъаре ыргъатны, о, семетдешлеринъден оламы, я ят халкълардан олгъанларданмы, онынъ джаныны агъыртма.

¹⁵Онынъ къазанчыны о куню, кунь батмаздан эвель онъа бер, чюнки о, ёкъсул; джаны онъа багълыдыр. Ёкъса, о, санъа къаршы РАББИге къыямет къопарыр да, сен гуна къазанырсынъ.

¹⁶Балаларынынъ къабааты ичюн бабалар ольмесинлер, бабаларынынъ къабааты ичюн де балалар ольмесин. Эр бир адам озь гунасы ичюн ольмек керек.

¹⁷Ят халкълардан олгъанны ве оксюзни адалетли суд эт, тул апайнынъ урбасыны залоггъа алма.

¹⁸Сен де Мысырда къул олып, Алланъ олгъан РАББИ сени андан сатын алгъаныны унутма. Онынъ ичюн мен санъа буны япмагъа эмир этем.

¹⁹Тарланъда махсулынъны джыйып, бир талай башакъларны анда унутсанъ, оларны алмакъ ичюн артынъа къайтма. Олар аранъыздаки ят халкълардан олгъанларгъа, оксюзлерге ве тул апайларгъа къалсын. Сонъ Алланъ олгъан РАББИ санъа эр туткъан ишинъде берекет береджек.

²⁰Зейтюнни теректен силькиткенинъде, бир даа пытакъларыны козьден кечирме. О, аранъыздаки ят халкълардан олгъанларгъа, оксюзлерге ве тул апайларгъа къалсын.

²¹Юзюмлигинъде юзюм салкъымларны джыйгъанда, къалгъанларыны джыйма. О, аранъыздаки ят халкълардан олгъанларгъа, оксюзлерге ве тул апайларгъа къалсын.

²²Мысыр топрагъында сен де къул олгъанынъны акъылынъда тут. Онынъ ичюн мен санъа буны япмагъа эмир этем.