Read Мукъаддес Китап къырымтатар тилинде, Къануннынъ текрары 31 Bible Online

Къануннынъ текрары 31 - Мукъаддес Китап къырымтатар тилинде, bible

Къануннынъ текрары 31

¹Муса бутюн Исраильге бойле сёзлер айтып битирген сонъ,

²оларгъа шай деди: — Мен энди 120 яшындам, сизге ёлбашчылыкъ даа этип оламайым. РАББИ манъа: «Сен Иорданнынъ башкъа тарафына кечмейджексинъ», — деди.

³[3-6] Алланъ олгъан РАББИ огюнъден кечип, эписи огюнъдеки миллетлерни ёкъ этеджек, ве сен топрагъынынъ саиби оладжакъсынъ.

⁷Сонъ Муса Ехошуаны чагъырып, бутюн Исраильнинъ огюнде онъа шай деди: — Къуветли ве джесаретли ол, чюнки сен бу халкънен, РАББИ деделеринъе бермеге ант эткен топракъкъа кирип, оларгъа пайлаштыраджакъсынъ.

⁸Огюнъден кетеяткъан РАББИ сеннен оладжакъ. О сени къалдырмайджакъ ве ташламайджакъ. Къоркъма ве дешет тюбюне къалма.

⁹Муса бу Къанунны язды ве оны РАББИнинъ Васиет Сандыгъыны ташыгъан, Левий къабилесинден олгъан руханийлерге ве Исраильнинъ эписи акъсакъалларына берди.

¹⁰Муса оларгъа бойле эмир этти: — Единджи йылынынъ сонъунда, борджларны багъышлав йылында, Чалашлар Байрамында,

¹¹бутюн Исраиль Алласы олгъан РАББИ сайлагъан ерге РАББИнинъ огюне кельгенинен, бу Къанунны, оны эписи эшитсин деп, бутюн Исраильнинъ огюнде окъу.

¹²Халкъны топла — акъайларны, апайларны ве балаларны, ве аранъызда яшагъан ят халкълардан олгъанларны. Олар динълесин ве огренсинлер, Алланъыз олгъан РАББИден къоркъсунлар ве бу Къануннынъ эписи сёзлерини тутып беджерсинлер.

¹³Бу Къанунны бильмеген балалары да эшитирлер ве Иорданны кечип саип олмакъ ичюн кетеяткъан топрагъынъызда бутюн яшагъан вакътынъызда Алланъыз олгъан РАББИден къоркъмагъа огренирлер.

¹⁴Сонъ РАББИ Мусагъа бойле деди: — Мына, олюм кунюнъ якъынлаша. Ехошуаны чагъыр ве Корюшюв Чадырында турунъыз. Мен онъа эмир берейим. Муса ве Ехошуа келип Корюшюв Чадырында турдылар.

¹⁵РАББИ Чадырда булут дирегинде пейда олды. Булут диреги Чадырнынъ кириши янында турды.

¹⁶Сонъ РАББИ Мусагъа бойле деди: — Мына тезден сен баба-деделеринъе къошуладжакъсынъ. Бу халкъ, ороспу киби олып, кетеяткъан топракъларында эджнебий аллаларнынъ пешинден бараджакъ. Олар Мени къалдыраджакълар ве Мен оларгъа берген васиетимни бозаджакълар.

¹⁷О куню Меним гъазабым оларгъа къаршы къызаджакъ, ве Мен оларны къалдыраджагъым. Мен бетимни олардан сакълайджагъым, ве олар ютуладжакълар. Башларына пек чокъ беля ве къаза тюшер, ве олар о куню: «Керчектен де, бу белялар башымызгъа тюшкенлернинъ себеби арамызда Алла олмагъаны ичюн!» — дерлер.

¹⁸Мен исе о вакъыт мытлакъа бетимни олардан сакълайджагъым, чюнки оларнынъ башкъа аллаларгъа чевирильгени пек яман оладжакъ.

¹⁹Энди исе, бу йырны язып ал ве Исраиль огъулларына огрет. Оларгъа къаршы шаатлыгъым олсун деп, оны агъызларына къой.

²⁰Мен баба-деделерине ант эткеним киби, оларны сютнен бал акъкъан топракъкъа кирсетеджегим. Олар исе тойып ашагъан сонъ, семиз оладжакълар ве башкъа аллаларгъа айланып, оларгъа хызмет этеджеклер. Олар Мени терк этеджеклер ве васиетимни бозаджакълар.

²¹Сонъ, оларнынъ башларына чокъ беляларнен къазалар тюшкенинен, бу тюркю оларгъа къаршы шаатлыкъ олур, чюнки эвлятлары оны унутмайджакълар. Мен деделерине ант эткен топракъкъа оларны кирсетмезден эвель, оларнынъ бугуньки ниетлерини билем.

²²О куню Муса бу йырны язып алды ве оны эписи исраиллилерге огретти.

²³Нун огълу Ехошуагъа РАББИ бойле эмир этти: — Къуветли ве джесаретли ол, чюнки сен Исраиль огъулларыны Мен оларгъа ант эткен топракъкъа кирсетеджексинъ, Мен де сеннен олурым.

²⁴Муса бу Къанунны бутюнлей китапкъа язып алгъан сонъ,

²⁵РАББИнинъ Васиет Сандыгъыны ташыгъан левийлилерге шай эмир берди:

²⁶— Бу Къанун китабыны алып, оны Алланъыз олгъан РАББИнинъ Васиет Сандыгъы янына къоюнъыз. О, анда сизге шаатлыкъ олур.

²⁷Чюнки сиз исьянкяр ве инат олгъанынъызны мен билем. Мына шимди де, мен даа сагъ олгъанымда, сиз РАББИнинъ огюнде исьянджылыгъынъызны косьтересинъиз, я мен ольген сонъ даа бетер олмазсынъызмы?

²⁸Манъа эписи къабилелеринъизнинъ акъсакъалларыны ве эписи реберлеринъизни топланъыз. Мен оларгъа бу сёзлерни айтарым ве оларгъа къаршы коклерни ве ер юзюни шаатлыкъкъа чагъырырым.

²⁹Чюнки билем ки, мен ольгенимден сонъ, сиз бозулып, мен сизге буюргъан ёлдан урулырсынъыз. Сонъунда кельген куньлерде башынъызгъа яманлыкъ олур, чюнки сиз РАББИнинъ козю огюнде яманлыкъ япып, сизинъ арекетлеринъизнен Оны ачувлатаджакъсынъыз.

³⁰Сонъ Муса бу йырнынъ эписи сёзлерини, исраиллилернинъ бутюн джемааты эшитсин деп, айтты: