Read Мукъаддес Китап къырымтатар тилинде, Къануннынъ текрары 32 Bible Online

Къануннынъ текрары 32 - Мукъаддес Китап къырымтатар тилинде, bible

Къануннынъ текрары 32

¹Къулакъ асынъыз, коклер, мен айтаджагъым, динъле, ер юзю, агъзымдан чыкъаджакъ лафларны.

²Сагъанакъ киби огреткеним ягъар, чыкъ киби лафым тюшер, ягъмур киби янъы откъа ислер, ягъмурчыкъ киби ешилликке олур.

³Чюнки мен РАББИнинъ адыны шуретлейджегим, сиз де Алламызнынъ улулыгъыны танынъыз!

⁴О — Къаядыр! Япкъанлары къусурсыз, ве ёллары адалетлидир. О — ишанчлы Алла, акъикъатсызлыкъ Онда ёкъ, догъру ве инсафлы О!

⁵Олар Онъа къаршы ахлякъсыз арекет этти; Онынъ балалары киби дегиль, олар къусур олды, бозукъ ве яланджы несиль олар.

⁶РАББИнъизге бойле къайтарасызмы, ахмакъ ве акъылсыз халкъ? О — сенинъ Бабанъ дегильми? Сени яраткъан, ясагъан ве асыл эткендир!

⁷Къадимий заманларны акъылынъа кетир, эвельки несиллернинъ йыллары акъкъында тюшюн. Бабанъдан сора, о санъа айтар, къартларынъыздан сора, олар санъа анълатырлар.

⁸Юдже Алла миллетлерге мульк бергенде ве адамларны больгенде, О, Алланынъ огъулларынынъ сайысына коре халкъларгъа сынъырлар къойгъан.

⁹РАББИнинъ пайы Онынъ халкъы олды, Якъуп — Онынъ шахсий мулькюдир.

¹⁰О, оны бош сахрада, кийик увулдагъан чёльде тапкъан. Оны къорчалай, акъыл берген, козь бебеги киби оны сакълай эди.

¹¹Озь ювасыны къыбырдаткъан, балаларынынъ устюнден къалтырап учкъан къартал киби, О да, къанатларыны керип, оны алгъан, къанатлары устюнде ташыгъан эди.

¹²Ялынъыз РАББИ онъа ёлбашчылыкъ эте эди; эджнебий алла онен ёкъ эди.

¹³О, оны ер юзюнинъ тёпелерине котерген, тарлаларнынъ берекетинен тойдура эди оны. О, онъа ташлардан — балны, чакъмакъташтан — зейтюн ягъыны ашкъа бере эди,

¹⁴эм де тувардан иримчикни, къой-эчкилерден сютни, къозуларнынъ, Башан еринден къочкъарларнынъ ве текелернинъ ягъыны, ве энъ яхшы богъдайны. Юзюм къаныны, шарапны сен иче эдинъ.

¹⁵Ешурун [12] семиз олгъан ве тепе башлагъан. Семиз олгъансынъ, шишманлангъансынъ, толушкъансынъ! Сонъ о, оны яраткъан Алланы къалдыргъан, озь къуртулыш Къаясындан игренген.

¹⁶Олар Алланы эджнебий аллаларынен ачувландыргъан, озь писликлеринен Оны гъазапландыргъан.

¹⁷Озь къурбанларыны Аллагъа чалмайып, шейтанларгъа, оларгъа белли олмагъан, янъы кельген, деделерининъ хаберлери олмагъан аллаларгъа чалгъанлар.

¹⁸Сени дюньягъа кетирген Къаяны унуткъансынъ, сени дертнен догъгъан Алланы акъылынъдан чыкъаргъансынъ.

¹⁹Буны корьген РАББИ олардан игренген, чюнки огъуллары ве къызлары Оны гъазапландыргъан.

²⁰«Бетимни олардан гизлерим, — деди О. — Сонъ аллары не оладжакъ бакъарым. Олар — бозукъ несиль, отуз олмагъан балалардыр.

²¹Олар Мен танымагъан аллаларынен Мени куньджю эткен, бош путларынен Мени ачувландыргъанлар. Мен де олар танымагъан халкънен оларны куньджю этеджегим, ахмакъ бир миллетнен оны ачувландыраджагъым.

²²Чюнки Меним гъазабым атеш алевлендирди, онынъ янгъаны олюлернинъ дюньясына ете, о, ер юзюни ве берекетини якъып юта, дагъларнынъ этеклерини де якъа.

²³Башларына чокъ яманлыкълар тюшюреджегим, эписи окъларымны оларгъа атаджагъым.

²⁴Ачлыкъ оларны бошатыр, веба оларны ашар, аджджы тишлемелер келир. Оларгъа къаршы кийик айванларны ёлларым, эм де тозда сюйрекленген зеэр махлюкъларны.

²⁵Тышарыда къылыч акъайларны урар, ичериде дешет айны шу шейни этер: йигитлерни ве къызларны, бебейлерни, чал къартларны.

²⁶Айтмагъа истер эдим: “Оларны парчалайджагъым адамлар оларны ич бир вакъыт хатырламайджакълар”.

²⁷Амма душманларынынъ ачувы ичюн шуны япмам. Ёкъса, душманлары буны янълыш анълап, айтар: “Бизим къудретимиз улу, РАББИнинъ иши дегильдир бу!”»

²⁸Олар — акъылыны джойгъан миллет, ве араларында анълайыш да ёкъ.

²⁹Ах, акъыллы олып, олар буны анълап бильселер, оларнен не оладжагъыны анъласалар экен!

³⁰Эгер оларнынъ Къаясы оларны сатмагъан олса, ве РАББИ оларны душманларынынъ къолуна бермеген олса, бир адам бинъ адамны къувалап олур эдими? Я да эки адам он бинъ адамны къувып олур эдими?

³¹Чюнки оларнынъ къаясы бизим Къаямыз киби дегиль. Душманларымыз биле буны анълайлар.

³²Оларнынъ юзюм пытакълары — Содом чубугъындан, ве юзюми Гоморанынъ тарлаларындан. Юзюм данелери зеэр тёкелер, салкъымлары исе аджджы оть шырасы киби.

³³Шарабы — аждерхаларнынъ зеэри, йыланларнынъ ольдюриджи зеэридир.

³⁴РАББИ шай айта: «Мен буны сакъламадым? Озь анбарларымда килитлемедим?

³⁵Аякълары тайгъанда, Мен акътыман ве интикъам алырым, чюнки беля-къаза куню якъындыр, азырландырылгъан шейлер оларгъа ашыкъып келелер».

³⁶Лякин РАББИ Озь халкъыны акълайджакъ. Къолларында такъат къалмайджакъ вакътында, не къул, не азат къалмайджагъыны корьгенде, Озь къулларына мерамет этеджек.

³⁷О айтар: «Къайда аллалары, олар сыгъынакъ къыдыргъан къаялары?

³⁸Оларнынъ къурбан ягъларыны ким ашагъан, шарап бахшышларыны ким ичкен? Олар турсунлар да, сизге ярдым этсинлер, сиз ичюн орьтю олсунлар!

³⁹Энди корюнъиз: Керчектен де, Мен — Одыр! Менден гъайры алла ёкъ! Мен ольдюрем, Мен де яшайыш берем, Мен яралайым, Мен де тедавийлейим. Меним къолумдан кимсе къуртарып оламаз.

⁴⁰Емин этип, къолумны кокке тараф котерем ве айтам: Мен, Эбедий, Озюмнен ант этем:

⁴¹парылдагъан къылычымны къайрарым, суд этип къолум оны тутар, душманларымнынъ акътыманыны алырым, Мени кореджек козьлери олмагъанларны джезаларым.

⁴²Окъларымны къангъа бояларым, къылычым беденлерни ашар, ольдюрильген ве эсирге тюшкенлернинъ къаныны ичер, душман башлыкъларынынъ башларына тояр».

⁴³Алланы бильмеген миллетлер Онынъ халкъынен берабер къуванынъыз! Чюнки О, къулларынынъ къаны ичюн акътыманыны алыр, ве душманларынынъ интикъамыны алып, Озь топрагъы ве халкъы ичюн акъларыны берер.

⁴⁴Бойледже, Муса Нуннынъ огълу Ехошуанен берабер келип, бу йырнынъ эписи сёзлерини халкъкъа айттылар.

⁴⁵Бу сёзлернинъ эписини бутюн Исраильге айтып битирген сонъ,

⁴⁶Муса оларгъа шай деди: — Мен сизге бугунь айткъан бу сёзлерни акъылларынъызда тутунъыз, бу Къанун сёзлерининъ эписини тутып беджермеге балаларынъызгъа эмир этинъиз.

⁴⁷Чюнки бу сёзлер сиз ичюн бош лаф дегиль, олар — сизинъ яшайышынъыздыр. Иорданны кечип саип олмакъ ичюн кетеяткъан топракъта оларнынъ ярдымынен чокъ вакъыт яшарсынъыз.

⁴⁸О куню де РАББИ Мусагъа бойле деди:

⁴⁹— Аварим дагъларындаки, Ерихонынъ къаршысында Моавда ерлешкен Нево дагъына котериль ве Мен Исраиль огъулларына мульк оларакъ береджек Ханаан топрагъына бакъ.

⁵⁰Хор дагъында ольген ве баба-деделерине къошулгъан агъанъ Харун киби, сен де котериледжек дагънынъ устюнде оледжексинъ ве баба-деделеринъе къошуладжакъсынъ.

⁵¹Чюнки сиз Цин сахрасында, Мерива Кадеш сувлары янында Исраиль огъулларынынъ огюнде Манъа къаршы имансыз арекет эттинъиз, оларнынъ арасында Меним мукъаддеслигимни къорчаламадынъыз.

⁵²Сен огюнъде олгъан топракъны кореджексинъ, амма Мен Исраиль огъулларына береджек бу топракъкъа кирмейджексинъ.