Read Мукъаддес Китап къырымтатар тилинде, Къануннынъ текрары 33 Bible Online

Къануннынъ текрары 33 - Мукъаддес Китап къырымтатар тилинде, bible

Къануннынъ текрары 33

¹Ольмезден эвель, Алланынъ адамы Муса Исраиль огъулларына бойле огъурлар тиледи.

²О, шай деди: — РАББИ Синайдан кельди, Сеир дагъларында оларгъа ачылды, Паран дагълы топрагъындан нурнен пейда олды, азизлернинъ ордуларынен О, кельди, онъ къолунда Къанун атеши бар эди.

³О, халкъыны керчектен севе. Эписи азизлер Сенинъ къолунъда; олар аякъларынъда топлашалар, айткъанларынъа къулакъ асалар.

⁴Муса бизге Къанунны буюрды, о — Якъуп джемиетининъ мулькю.

⁵Халкънынъ башлыкълары къабилелернен берабер топлашкъанда, о, Ешуруннынъ падишасы эди.

⁶Яшасын Рубен ве ольмесин, лякин акъайлары аз сайылы олсун.

⁷Буны о, Ехуда къабилесине айтты: — Я РАББИ, Ехуданынъ сесини эшит ве оны халкъына кетир. Озюни Озь къолларынен къорчалай; сен онъа душманларына къаршы ярдымджы ол.

⁸Левий къабилесине шай деди: — Тум ве Ур [13] алетлери сенинъ инсафлы адамынъдадыр. Сен оны Масса еринде сынадынъ, Мерива сувлары янында онен давалаштынъ.

⁹О, ана-бабасы акъкъында бойле деди: «Мен оларны бакъмадым». О, агъа-къардашларыны танымагъан, озь балаларыны бильмеген, лякин о, Сенинъ сёзлеринъни сакълагъан, васиетинъни къорчалагъан.

¹⁰Олар Якъупны къарарларына огретирлер, Исраильни — Сенинъ Къанунынъа. Олар огюнъде къокъулы отларны якъарлар, къурбан еринъе айванларны бутюнлей къоярлар.

¹¹РАББИ, онынъ къудрети огъурлы олсун, туткъан ишлеринден разы ол. Онъа къаршы тургъанларны ве оны кореджек козьлери олмагъанларны, аякъ устюнде турып оламасынлар деп, аякъларындан ур.

¹²Биньямин къабилесине шай деди: — РАББИнинъ севгилиси янында хавфсыз яшар. О, оны эр кунь сакълай, ве о, Онынъ омузлары ортасында раат отура.

¹³Юсуф къабилесине шай деди: — РАББИ онынъ топрагъына коклернинъ, чыкъларнынъ ве ашагъыда акъкъан сувларнынъ энъ яхшы берекетини берсин,

¹⁴кунеште оськен ве айлар кетирген энъ яхшы махсулларны,

¹⁵къадимий дагъларнынъ энъ яхшысыны ве эски байырларнынъ энъ яхшысыны,

¹⁶топракънынъ энъ яхшысыны ве онынъ боллугъыны берсин. Тикенли чалыда Булунгъаннынъ разылыгъы Юсуфнынъ башына, агъа-къардашларындан сайлангъан бирисининъ манълайына олсун.

¹⁷Онынъ биринджи догъгъан бугъасы — онынъ сайгъысы, бойнузлары — кийик бугъанынъ бойнузлары киби, оларнен о, ернинъ башкъа четинедже олгъан халкъларны тюртеджек. Бу — Эфраимнинъ он бинълери ве Менашшенинъ бинълеридир.

¹⁸Зевулун къабилесине шай деди: — Къуван, Зевулун, эвинъден чыкъкъанынъда, ве сен, Иссасхар, — озь чадырларынъда.

¹⁹Олар халкъларны дагъгъа тараф чагъырырлар, анда догъру къурбанларны чаларлар. Олар денъизнинъ боллугъынен ве къумда сакълы хазинелернен кейфленеджеклер.

²⁰Гад къабилесине шай деди: — Гаднынъ топракъларыны кенълештирген адам бахтлы олсун! О, арслан киби яшай, къолны ве башны парчалай.

²¹О, озюне ернинъ биринджисини сайлап алды, чюнки анда башлыкънынъ пайы оны бекледи. Халкънынъ башлыкъларынен о кельди, о, РАББИнинъ догъру ирадесини ве Исраильге берильген къарарларыны беджерди.

²²Дан къабилесине шай деди: — Дан — арслан яврусыдыр; о, Башан еринден секирип тюше.

²³Нафтали къабилесине шай деди: — Нафталинен РАББИнинъ бол разылыгъы ве Онынъ номай берекети. О, денъизнинъ ве дженюптеки топракънынъ саиби.

²⁴Ашер къабилесине шай деди: — Огъуллардан энъ бахтлы — Ашердир. Агъа-къардашларынынъ разылыгъы онен олсун, аягъыны зейтюн ягъына батырсын.

²⁵Къапуларынъдаки мандаллары — демир ве бакъырдандыр, къудретинъ куньлеринъе тенъ оладжакъ.

²⁶Ешуруннынъ Алласына ошагъан ёкъ! О, коклер устюнден санъа ярдымгъа Озь Шуретинде булутлар устюнде келе.

²⁷Эбедий Алла — сени сакълагъан ердир, сени эбедиен къудрети къорчалай. О, душманларынъны огюнъден къувалай ве: «Ёкъ эт!» — айта.

²⁸Исраиль хавфсыз яшай, Якъуп янъгъызлыкъта тура ашлыкъ ве шарапкъа толу топрагъында; ве коклерден онъа чыкълар тюшелер.

²⁹Исраиль, сен не де бахтлысынъ! Санъа ошагъан ким бар? РАББИ къуртаргъан халкъсынъ! О — сени къорчалагъан къалкъанынъдыр ве шуретинънинъ къылычыдыр. Душманларынъ огюнъде ялтакъланалар, сен исе оларнынъ ибадет тёпелерини аякъларынънен басасынъ.