Read Мукъаддес Китап къырымтатар тилинде, Къануннынъ текрары 34 Bible Online

Къануннынъ текрары 34 - Мукъаддес Китап къырымтатар тилинде, bible

Къануннынъ текрары 34

¹Сонъ Муса Моав тюзлюгинден Нево дагъына, Ерихонынъ къаршысында олгъан Фисганынъ тёпесине котерильди. Анда РАББИ онъа Гилад ерини, Дангъадже олгъан топракъны косьтерди.

²Нафталининъ оладжакъ топрагъыны, Менашше ве Эфраимнинъ топрагъыны, тап гъарбий денъизгедже баргъан бутюн Ехуданынъ топрагъыны,

³Негевни ве Ерихо (Пальмалар шеэри) вадийининъ тюзлюгини, тап Цоар шеэринедже олгъан топракъны.

⁴Сонъ РАББИ онъа бойле деди: — Мен Ибраим, Исхакъ ве Якъупкъа: «Оны несиллеринъизге берерим», деп ант эткен топракъ мына. Мен санъа оны козьлеринънен корьмеге разылыкъ берерим, лякин о топракъкъа сен кирмезсинъ.

⁵Сонъ РАББИ айткъаны киби, РАББИнинъ къулу Муса Моав еринде ольди.

⁶О, оны вадийде, Моав еринде, Бет-Пеорнынъ къаршысында дефн этти, лякин аля бу кунь онынъ къабри къайда олгъаныны кимсе бильмей.

⁷Муса ольгенде 120 яшында эди, лякин онынъ козьлери зайыфлашмагъан, бедени де такъаттан кесильмеген эди.

⁸Исраиль огъуллары Моав тюзлюгинде 30 кунь девамында Мусанынъ артындан агъладылар. Сонъ Мусанынъ артындан агълап яныкълангъан матем куньлери биткен эди.

⁹Нун огълу Ехошуа икмет рухуна толгъан, чюнки Муса онынъ устюне къолларыны къойгъан эди. Исраиллилер онынъ сесини динъледи ве, РАББИ Мусагъа эмир эткени киби, ойле де япа эдилер.

¹⁰О вакъыттан сонъ РАББИни юзьме-юзь бильген Муса киби пейгъамбер Исраильде бир даа олмады.

¹¹Муса, РАББИнинъ ёллагъанына бойсунып, Мысыр топрагъында фыравунгъа, къулларына ве бутюн топрагъына къаршы аджайип шейлерини япкъан ве бельгилер косьтерген эди.

¹²Буюк къудретинен ве къоркъунчлы ишлеринен Муса буларны бутюн Исраильнинъ козю огюнде япкъан эди.