Read Мукъаддес Китап къырымтатар тилинде, Къануннынъ текрары 6 Bible Online

Къануннынъ текрары 6 - Мукъаддес Китап къырымтатар тилинде, bible

Къануннынъ текрары 6

¹Мына къанун, низамнамелер ве къарарлар. Алланъыз олгъан РАББИ шуны сизге огретмеге буюрды. Барып, топракънынъ саиплери олгъан сонъ, анда оны тутмакъ керексинъиз.

²Сонъ сен Алланъ олгъан РАББИден къоркъып, мен сизге буюргъан бутюн эмирлерни ве къарарларны сакъларсынъ ве оларны огъулларынънен ве торунларынънен берабер тутарсынъ. О заман яшайышынъ узакъ олур.

³Динъле, Исраиль, ве эписини акъылынъда сакълап тут! О заман, деделеринъизнинъ Алласы олгъан РАББИ сизге айткъаны киби, сютнен бал акъкъан топракъта сизге яхшы олур ве сиз пек чокълашырсынъыз.

⁴Динъле, Исраиль! РАББИ — Алламыздыр, РАББИ — Бирден-Бирдир!

⁵Алланъ олгъан РАББИнъни бутюн юрегинънен, бутюн джанынънен, бутюн кучюнънен сев.

⁶Мен санъа бугунь буюргъан бу сёзлер юрегинъде къалсынлар.

⁷Оларны балаларынъа огрет. Эвинъде отургъанда, ёл бою кеткенде, яткъанда-тургъанда олар акъкъында айт.

⁸Унутмамакъ ичюн, оларны къолунъа багъла ве козьлеринъ арасында оларны ас.

⁹Оларны эвинънинъ къапуларына ве араба къапуларынъа яз.

¹⁰[10-11] Шу топракъта сен къурмагъан балабан ве яхшы шеэрлер, сен толдурмагъан чешит мал-мулькке толу олгъан эвлер, сен къаядан кесмеген къуюлар, сен сачмагъан юзюмликлер ве зейтюн тереклери бар. РАББИ бу топракъны Ибраим, Исхакъ ве Якъуп деделеринъизге бермеге ант эткен. Алланъ олгъан РАББИ сени бу топракъкъа алып кельгенинен ве сен анда тойгъандже ашагъанынен,

¹²сакъын, РАББИни унутма. О, сени Мысыр топрагъындан, къуллукъ эвинден алып чыкъты.

¹³Алланъ олгъан РАББИден къоркъ, Онъа хызмет эт ве тек Онынъ адынен ант эт.

¹⁴Башкъа аллаларнынъ, чевре-четинъизде олгъан халкъларнынъ аллаларынынъ пешинден кетме.

¹⁵Чюнки аранъыздаки Алланъ олгъан РАББИ — куньджю Алладыр. Бакъ, Алланъ олгъан РАББИнинъ гъазабы санъа къаршы къызып, сени ер юзюнден ёкъ этмесин.

¹⁶Масса еринде япкъанынъыз киби [9], Алланъыз олгъан РАББИни сынаманъыз.

¹⁷Алланъыз олгъан РАББИ сизге буюргъан эмирлерни, шаатлыкъларны ве низамнамелерни къатты суретте тут.

¹⁸[18-19] РАББИнинъ огюнде догъру ве яхшы ишлер яп. Сонъ санъа яхшы олур, ве сен, РАББИ деделеринъе бермеге ант эткен гузель топракъкъа кирип, РАББИ айткъаны киби, эписи душманларынъны сенден къувалап, онынъ саиплери олурсынъ.

²⁰Эгер огълунъ бираздан сенден сораса: «Алламыз олгъан РАББИ сизге буюргъан шаатлыкълар, низамнамелер ве къарарлар недир?»,

²¹огълунъа бойле джевап къайтар: «Биз Мысыр мемлекетинде фыравуннынъ къуллары эдик, лякин РАББИ бизни буюк къудретинен Мысырдан алып чыкъты.

²²РАББИ козюмизнинъ огюнде бельгилер косьтерди ве буюк аджайип шейлер япты, Мысыргъа, фыравунгъа ве онынъ бутюн эвине белялар ёллады.

²³О бизни андан къуртарды, чюнки деделеримизге бермеге ант эткен топракъкъа бизни кетирмеге ве оны бизге бермеге истей эди.

²⁴Сонъ РАББИ бизге эписи бу къарарларны тутмагъа ве Ондан къоркъмагъа буюрды. Сонъ бизге омюрбилля яхшы олур ве, бугунь олгъаны киби, биз сагъ къалырмыз.

²⁵Эгер биз Алламыз олгъан РАББИнинъ огюнде, О, бизге буюргъаны киби, эписи бу къанунларны тутсакъ, бу бизге инсафлыкъ деп танылыр».