Read Мукъаддес Китап къырымтатар тилинде, Къануннынъ текрары 9 Bible Online

Къануннынъ текрары 9 - Мукъаддес Китап къырымтатар тилинде, bible

Къануннынъ текрары 9

¹Динъле, Исраиль! Шимди сен, сенден буюк ве кучьлю миллетлернинъ мулькюни алмакъ ичюн, Иорданнынъ башкъа тарафына кечмектесинъ. Оларнынъ шеэрлери балабан, пекитильген диварлары коклерге тие.

²Анда чокъ сайылы ве юксек бойлу халкъ, анакълылар яшай. Сен оларны билесинъ ве олар акъкъында эшиткен эдинъ: «Анакънынъ эвлятларына къаршы ким чыкъып олур?»

³Бугунь исе буны биль: Алланъ олгъан РАББИ огюнъден кете. О — эписини якъып ёкъ эткен атештир. О, оларны сенинъ огюнъде ёкъ этеджек. О, оларны санъа бойсундыраджакъ. РАББИ санъа айткъаны киби, сен оларнынъ мулькюни тез-тез запт этеджексинъ ве озьлерини ёкъ этеджексинъ.

⁴Алланъ олгъан РАББИ оларны огюнъден къувалагъан сонъ, юрегинъде бойле айтма: «Мен пек инсафлыдырым. Шунынъ ичюн де РАББИ мени, бу топракънынъ саиби олмакъ ичюн, алып кетирди». Лякин бу миллетлернинъ яманлыгъы ичюн РАББИ оларнынъ мулькюни запт эте.

⁵Сенинъ кетип, бу топракънынъ саиби олмакънынъ себеби сенинъ инсафлыгъынъ ве юрегинънинъ догърулыгъы дегиль. Шу миллетлернинъ яманлыгъы ичюн Алланъ олгъан РАББИ оларны огюнъден къувалай. Чюнки Онынъ, баба-деделеринъизге, — Ибраим, Исхакъ ве Якъупкъа берген антыны беджермеге ниети бар.

⁶Шунынъ ичюн, буны биль: сенинъ догъру яшайышынъ ичюн дегиль Алланъ олгъан РАББИ санъа бу яхшы топракънынъ саиби олмагъа разылыкъ бере. Сен — энъсеси къаткъан бир халкъсынъ.

⁷Сахрада Алланъ олгъан РАББИни не къадар чокъ ачувландыргъанынъны унутма, шуны акъылынъда тут. Мысыр топрагъындан чыкъкъан куньден башлап бу ерге кельгендже сиз РАББИге къаршы чыкъа эдинъиз.

⁸Хоревде сиз РАББИни ойле ачувландырдынъыз ки, О, сизге гъазапланып сизни ёкъ этмеге якъын эди.

⁹Мен дагъгъа чыкъып, анда таш леваларыны, РАББИ сизге береджек васиет леваларыны аладжакъ эдим. 40 кунь ве 40 гедже мен дагъда эдим, аш ашамай, сув ичмей эдим.

¹⁰РАББИ манъа эки таш левасыны берди. Устьлеринде Алланынъ къолунен сёзлер язылгъан эди. РАББИ эписи бу сёзлерни, сиз дагъ янында топлашкъан куню, атеш ичинден айткъан эди.

¹¹40 кунь ве 40 гедже кечкен сонъ, РАББИ манъа эки таш левасы, васиет левасыны берди.

¹²Сонъ РАББИ манъа бойле деди: «Тур, тез-тез мындан тюш, чюнки сен Мысырдан алып чыкъкъан халкъынъ бозулды. Мен оларгъа буюргъан ёлдан тезден четке чыкътылар, озьлерине маден иритип путны ясадылар».

¹³Даа РАББИ бойле деди: «Бакъам-корем, бу халкъ — энъсеси къаткъан бир халкътыр.

¹⁴Кет огюмден. Мен оларны ёкъ этерим, коклер тюбюнде адынынъ эсирини биле къалдырмайджагъым. Сенден исе олардан кучьлю ве чокъ сайылы миллетни асыл этерим».

¹⁵Мен айланып, дагъдан тюшип башладым. Дагъ исе атешнен янмакъта эди. Эки къолумда васиет левалары бар эди.

¹⁶Сиз, иритильген маденден бузавны япып, Алланъыз олгъан РАББИге къаршы гуна къазангъанынъызны корьдим. РАББИ сизге буюргъан ёлдан тезден четке чыкъкъансыз.

¹⁷Бу таш леваларыны алып, ерге аттым ве козьлеринъизнинъ огюнде сындырдым.

¹⁸Сонъ мен кетип, РАББИнинъ огюнде ерге йыкъылдым. Эвельдеки киби, 40 кунь ве 40 гедже аш ашамай, сув ичмей эдим, чюнки сиз буюк гуналарны къазангъан, бу яманлыкъны Онынъ огюнде япып, Оны пек ачувландыргъан эдинъиз.

¹⁹Мен РАББИнинъ ачувындан ве афакъанындан пек къоркътым, О, сизлерни ёкъ этеджек ола эди. Бу сефер де РАББИ мени динъледи.

²⁰РАББИ Харунгъа да пек гъазапланды, оны ёкъ этмеге якъын эди. Лякин о вакъыт да мен Харун ичюн дуа эте эдим.

²¹Сонъ сиз япкъан гуналы шейинъиз олгъан бузавны атешке якътым, урып парчаладым ве тоз киби уфакъ олгъандже эздим, сонъ бу тозны дагъдан акъкъан дерьягъа аттым.

²²Сонъ даа Тавера, Масса ве Киврот-Хаттава ерлеринде де РАББИни ачувландырдынъыз.

²³Кадеш-Барнеадан РАББИ: «Барынъыз да, Мен сизге береджек топракънынъ саиплери олунъыз», — айтып сизни ёллагъан вакъытта, сиз кене Алланъыз олгъан РАББИге къаршы чыкътынъыз, ишанмадынъыз Онъа, сёзюни тутмадынъыз.

²⁴Мен сизни бильген куньден башлап сиз РАББИге къаршы чыкъа эдинъиз.

²⁵РАББИнинъ огюнде ерге йыкъылып, 40 кунь ве 40 гедже ерде ята эдим, чюнки РАББИ сизни ёкъ этеджеги акъкъында айткъан эди.

²⁶РАББИге дуа этип, мен бойле дей эдим: «Эй, РАББИ-ТААЛЯ! Озюнъ халкъынъны, шахсий мулькюнъни ёкъ этме. Улулыгъынъда Сен оны сатын алдынъ, буюк къудретинъ оны Мысырдан алып чыкъты.

²⁷Ибраим, Исхакъ ве Якъуп къулларынъны унутма. Бу халкънынъ инатлыгъына, яманлыгъына ве гуналарына бакъма.

²⁸Ёкъса бизни алып чыкъкъан топракъта яшагъанлар бойле айтарлар: “РАББИ оларны сёз берген топрагъына кирсетип оламагъан. Шунынъ ичюн оларны кореджек козю олмайып, сахрада ольдюрмек ичюн, оларны алып чыкъкъандыр”.

²⁹Олар исе — Сенинъ халкъынъ, сенинъ къыйметли мулькюнъ. Сен оларны буюк къудретинънен ве кучюнънен алып чыкъкъансынъ».