Read Мукъаддес Китап къырымтатар тилинде, Юхан 10 Bible Online

Юхан 10 - Мукъаддес Китап къырымтатар тилинде, bible

Юхан 10

¹Сизге керчектен догърусыны айтам: ким къой къошуна къапудан кирмейип, башкъа ёл тапып тюшсе, о хырсыз ве айдуттыр.

²Къапудан кирген адам исе къойларнынъ чобаныдыр.

³Онъа къаравул къапуны ача, ве къойлар онынъ сесине къулакъ асалар. О исе озь къойларыны чагъыра ве тышарыгъа алып чыкъа.

⁴О, озь къойларынынъ эписини чыкъаргъанынен, оларнынъ огюнде кете. Къойлар исе онынъ артындан юрелер, чюнки олар онынъ сесини таныйлар.

⁵Ябанджы адамнынъ артындан олар кетмезлер, аксине, ондан къачарлар, чюнки ябанджынынъ сесини танымайлар.

⁶Иса бу кинаели икяени айткъанда, динълегенлер Онынъ не бильдирмеге истегенини анъламадылар.

⁷Шу себептен Иса кене шай деди: — Сизге керчектен догърусыны айтам: Мен — къойларнынъ къапусы олам.

⁸Менден эвель кельгенлернинъ эписи хырсыз ве айдут эдилер. Лякин къойлар оларгъа къулакъ асмадылар.

⁹Мен — къапудырым. Ким Менден кирсе, къуртарыладжакъ. О, кирип чыкъып, озюне отлакъ да тападжакъ.

¹⁰Хырсыз тек хырсызламакъ, ольдюрмек, йыкъмакъ ичюн келе. Мен исе оларгъа аят, толу аят бермек ичюн кельдим.

¹¹Мен яхшы чобаным. Яхшы чобан къойлары ичюн джаныны бере.

¹²[12-13] Чобан олмагъан, шахсий къойлары олмагъан, пара ичюн чалышкъан адам къашкъырнынъ кельгенини корьсе, къойларны ташлай да къача, чюнки о парагъа чалыша ве къойлар ичюн ич къайгъырмай. Къашкъыр исе къойларны талай ве дагъыта.

¹³

¹⁴Мен яхшы чобаным. Мен Озь къойларымны билем, олар исе Мени билелер.

¹⁵Бабам Мени насыл бильсе, Мен де Бабамны шойле билем. Мен къойларым ичюн джанымны берем.

¹⁶Меним башкъа, бу къоштан олмагъан къойларым да бар. Оларны да алып кельмек керегим. Олар да Меним сесимни эшитеджеклер, ве бир сюрю бир чобаннен оладжакъ.

¹⁷Джанымны янъыдан эльге алмакъ ичюн, оны берем. Шунынъ ичюн Бабам Мени севе.

¹⁸Меним джанымны Менден кимсе тартып алмай. Мен оны Озь истегимнен берем. Оны бермеге де, къайтарып алмагъа да укюмим бар. Бу эмирни Мен Бабамдан къабул эттим.

¹⁹Бу сёзлери ичюн еудийлернинъ арасында кене дава чыкъты.

²⁰Араларындан чокълары: — Оны джин ургъан, О, акъылдан айырылгъан! Оны не ичюн динълейсиз? — дей эдилер.

²¹Башкъалары исе: — Джин ургъан адам бойле сёзлерни айтмаз. Кёр адамнынъ козьлерини джин ачып олурмы? — дедилер.

²²Сонъ Ерусалимге Алланынъ Сарайыны Янъыдан Эляллав Байрамы кельди. Къыш эди.

²³Иса Сарайда Сулейманнынъ Эйванында айланып юре эди.

²⁴Еудийлернинъ башлыкълары Онынъ этрафыны сарып алдылар. — Даа не къадар Сен бизим сабырымызны сынайджакъсынъ? Эгер Сен Месих олсанъ, бизге ачыкътан-ачыкъ айт, — дедилер олар.

²⁵Иса оларгъа джевап берди: — Мен сизге айттым, амма сиз инанмадынъыз. Меним Бабамнынъ адынен япкъан ишлерим Манъа шаатлыкъ этелер.

²⁶Сиз исе инанмайсыз, чюнки сиз Меним къойларым дегильсиз.

²⁷Меним къойларым сесимни эшителер. Мен оларны билем, олар исе Меним артымдан юрелер.

²⁸Мен оларгъа эбедий аят берем, ве олар ич бир вакъыт гъайып олмайджакълар. Ич кимсе оларны Меним къолумдан тартып аламаз.

²⁹Оларны Манъа берген Бабам эписинден буюктир. Бабанынъ къолундан ич кимсе оларны тартып аламаз.

³⁰Мен ве Бабам — бирмиз.

³¹О вакъыт еудийлернинъ башлыкълары Исаны ташларнен ольдюрмек ичюн, кене таш алып башладылар. Иса:

³²— Мен сизге Бабамнынъ адындан чокъ яхшы ишлер косьтердим. Оларнынъ къайсы бири ичюн Мени ташларнен ольдюрмеге истейсиз? — деди.

³³Еудийлернинъ башлыкълары Онъа джевап берип: — Сени яхшы ишлеринъ ичюн дегиль, куфюр сёзлеринъ ичюн ташларнен ольдюрмеге истеймиз, чюнки Сен адам олып, Озюнъни Алла саясынъ! — дедилер.

³⁴Иса шойле джевап къайтарды: — Сизинъ Къанунынъызда: «Мен айттым: „Сиз — аллаларсыз”», — деп язылмагъанмы?

³⁵Мына, Алланынъ сёзю о адамларгъа кельген ве олар «аллалар» адландырылгъан эди. Мукъаддес Язы исе бозулмаз.

³⁶Шунынънен, Бабам Мени азиз этип дюньягъа ёллады. Сиз Мени, «куфюр сёзлер айта», деп къабаатлайсыз, чюнки Мен: «Мен Алланынъ Огълу олам», дедим?

³⁷Эгер Мен Бабамнынъ ишлерини япмасам, Манъа иман этменъиз.

³⁸Эгер Онынъ ишлерини япсам, ве сиз Манъа инанмасанъыз, ишлериме инанынъыз. Сонъ билирсиз ве инанырсыз ки, Баба Менде ве Мен Бабада олам.

³⁹Сонъра еудийлер кене Исаны якъаламагъа чаресини къыдыра эдилер, лякин Иса оларнынъ къолларындан къуртулып кетти ве

⁴⁰кене Иордан озенининъ башкъа тарафына, башта Ягъя адамларны сувгъа батырып чыкъаргъан ерге барды ве шу ерде къалды.

⁴¹Онынъ алдына чокъ адамлар келе эди. Олар: — Ягъя ич бир бельги косьтермеген эди, лякин Ягъянынъ бу адам акъкъында айткъанларынынъ эписи акъикъий чыкъты, — дей эдилер.

⁴²О ерде чокъ адам Исагъа иман этти.