Read Мукъаддес Китап къырымтатар тилинде, Юхан 11 Bible Online

Юхан 11 - Мукъаддес Китап къырымтатар тилинде, bible

Юхан 11

¹Бетания деген койде Лазар адлы бир адам хаста ята эди. Мерьем ве Марта адлы тата-къардаш да бу койден эдилер.

²Раббиге къокъулы ягъ якъаджакъ ве Онынъ аякъларыны сачларынен сюртип къурутаджакъ шу Мерьем эди. Хаста яткъан Лазар исе Мерьемнинъ агъасы эди.

³Тата-къардаш Исагъа: «Рабби, Сенинъ севимли достунъ хаста олып ята», — деп хабер ёлладылар.

⁴Иса буны эшитип: — Бу хасталыкъ олюмнен битмейджек, лякин о, Алланынъ шуретине себеп оладжакъ. Алланынъ Огълу да онынъ ярдымынен шурет къазанаджакъ, — деди.

⁵Иса Мартаны, онынъ къыз къардашыны ве Лазарны севе эди.

⁶Амма Лазарнынъ хаста олып яткъаныны бильсе де, олгъан еринде даа эки кунь къалды.

⁷Бундан сонъ О, шегиртлерине: — Кене Еудиеге барайыкъ, — деди.

⁸— Равви, — деди шегиртлери, — якъында еудийлер Сени ташларнен ольдюрмеге чаресини къыдыра эдилер. Сен исе кене о ерге бармагъа истейсинъми?

⁹Иса бойле джевап берди: — Бир куньде он эки саат оламы? Ким куньдюз юрсе, сюрюнмей, чюнки бу дюньянынъ ярыгъыны коре.

¹⁰Гедже юрген исе сюрюне, чюнки онда ярыкъ ёкъ.

¹¹— Бу сёзлерни айтып, оларгъа: — Достумыз Лазар юкълап къалды, лякин Мен оны уятмагъа кетем, — деди.

¹²— Рабби, эгер о юкълап къалгъан олса, тюзелир, — деди шегиртлери.

¹³Лякин Иса Лазарнынъ ольгени акъкъында айта эди. Шегиртлер исе, Иса адий юкъу акъкъында айтты, деп тюшюне эдилер.

¹⁴Сонъ Иса оларгъа ачыкътан айтты: — Лазар ольди.

¹⁵Мен исе о ерде олмагъаныма сиз ичюн къуванам, чюнки шимди иман этеджексиз. Энди айдынъыз, онынъ янына барайыкъ.

¹⁶О вакъыт, «Эгиз» адландырылгъан Тома башкъа шегиртлерге: — Айдынъыз, биз де кетейик, Онен берабер олейик! — деди.

¹⁷Иса о ерге барып, Лазарнынъ къабирде яткъанына дёрт кунь олгъаныны бильди.

¹⁸Бетания кою Ерусалимге якъын, къарарнен учь километр [12] узакълыгъында эди.

¹⁹Чокъ еудийлер Мартагъа ве Мерьемге, агъасынынъ ольгени себебинен оларнынъ гонълюни алмакъ ичюн кельген эдилер.

²⁰Марта Исанынъ кельгенини эшитип, Оны къаршыламагъа чыкъты. Мерьем исе эвде отура эди.

²¹— Рабби! — деди Марта Исагъа. — Эгер Сен бу ерде олгъан олсанъ, меним агъам ольмез эди.

²²Амма шимди де билем ки, Сен Алладан не истесенъ, Алла Санъа береджек.

²³— Сенинъ агъанъ тириледжек, — деди Иса.

²⁴— Билем, эписи тириледжек вакъытта, сонъки куньде тириледжек, — деди Марта.

²⁵Иса онъа шойле деди: — Мен тирилюв ве аят олам. Манъа иман эткен адам ольсе де, яшайджакъ.

²⁶Яшайышында Манъа иман эткен эр ким ич бир вакъыт ольмейджек. Бунъа инанасынъмы?

²⁷— Эбет, Рабби, — деди Марта. — Сен дюньягъа келеяткъан Месих, Алланынъ Огълу олгъанынъа инандым.

²⁸Буны айткъан сонъ, Марта барып, къыз къардашы Мерьемни чагъырды. — Оджа бу ерде, О сени чагъыра, — деди гизлиден Мерьемге.

²⁹Мерьем буны эшиткенинен, ашыкъып еринден турды да, Исанынъ янына барды.

³⁰Иса даа койге кирмезден, Марта Оны къаршылагъан ерде беклеп тура эди.

³¹Мерьемнен берабер эвде отургъан, онъа теселли берген еудийлер, онынъ ашыкъып еринден турып тышарыгъа чыкъкъаныны корьдилер ве, Мерьем къабирге барып агъламагъа кетти, деп, онынъ артындан бардылар.

³²Мерьем Иса тургъан ерге келип, Оны корьди де, аякълары тюбюне озюни ташлап: — Рабби! — деди. — Эгер Сен шу ерде олгъан олсанъ, Меним агъам ольмез эди!

³³Иса Мерьемнинъ де, онен кельген еудийлернинъ де агълагъанларыны корьгенинен, руху чорланды да, юреги сызлады.

³⁴— Оны не ерге къойдынъыз? — деп сорады о. — Эфенди, барып корь, — дедилер онъа.

³⁵Исанынъ козьлери яшланды.

³⁶Еудийлер: — Бакъынъыз, оны не къадар севе экен, — дедилер.

³⁷Лякин олардан базылары: — Мына бу адам кёрнынъ козьлерини ачты. Лазарны да ольмейип къалмасы ичюн бир шей япар экенми? — дедилер.

³⁸Исанынъ руху кене чорланды. Иса къабирге кельди. Къабир бир къоба ичинде олып, онынъ агъзына таш къоюлгъан эди.

³⁹Иса: — Ташны алып четке къоюнъыз! — деди. Олюнинъ татасы Марта Онъа: — Рабби, о къабир ичине къоюлгъанына дёрт кунь олды, энди къокъусы чыкъкъандыр, — деди.

⁴⁰— «Эгер иман этсенъ, Алланынъ шерефини кореджексинъ», деп санъа айтмадыммы? — деди Иса.

⁴¹Сонъра адамлар ташны четке чектилер. Иса исе козьлерини кокке котерип: — Баба, Мени эшиткенинъ ичюн Санъа шукюр, — деди.

⁴²— Сен Мени эр вакъыт эшиткенинъни билем, лякин бу сёзлерни шу ерде тургъан халкъ ичюн, олар Мени Сен ёллагъанынъа инанаджакълары ичюн дедим.

⁴³Шойле деди де, къатты сеснен: — Лазар, тышарыгъа чыкъ! — деп къычырды.

⁴⁴О вакъыт, къоллары-аякълары безге сарылгъан, бетине явлукъ багълангъан, эвель олю олгъан адам чыкъып кельди. — Оны чезинъиз, кетсин, — деди Иса адамларгъа.

⁴⁵Мерьемнен кельген еудийлернинъ чокълугъы, Исанынъ япкъан ишини корип, Онъа иман эттилер.

⁴⁶Амма базылары, фериселернинъ алдына барып, Исанынъ япкъаныны айтып бердилер.

⁴⁷Ондан сонъ баш руханийлер ве фериселер Шуранынъ топлашувыны яптылар. — Бу адам чокъ бельгилер косьтере. Биз не япайыкъ? — дедилер озьара.

⁴⁸— Эгер О, бойле девам этсе, биз исе кедер этмесек, эписи Онъа иман этеджек. Римлилер келип, топрагъымызны да, миллетимизни де басып алырлар.

⁴⁹Олардан бири, о йылы биринджи баш руханий олгъан Каяфа: — Сиз ич бир шей бильмейсиз!

⁵⁰Бутюн миллет гъайып олгъанындан, бир адам халкъ ичюн оледжеги сизге яхшы оладжагъыны тюшюнмединъиз, — деди.

⁵¹Бу сёзлерни о озь истегинден айтмагъан эди. Амма, о йылнынъ биринджи баш руханийи олып, пейгъамберлик япкъанда, Исанынъ шу еудий миллет ичюн оледжегини эвельден айтты.

⁵²Исагъа тек шу миллет ичюн дегиль, лякин дюньяда даркъалып кеткен, Алланынъ эвлятларыны да топлап бирлештирмек ичюн ольмек керек эди.

⁵³О куньден башлап, олар Исаны ольдюрмек къарарына кельдилер.

⁵⁴Шунынъ ичюн Иса энди еудийлер арасында ачыкъ юрмей эди. О ерден чыкъып, сахрагъа якъын олгъан топрагъына, Эфраим шеэрине барды. Шу ерде шегиртлеринен берабер къалды.

⁵⁵Еудийлернинъ Песах Байрамы якъынлашкъан эди. Мемлекетнинъ эр тарафындан адамлар байрамдан эвель элялланмакъ ичюн Ерусалимге кельдилер.

⁵⁶Олар Исаны къыдыра эдилер. Алланынъ Сарайы азбарында топлашып тургъанлар озьара: «Насыл тюшюнесиз, О, байрамгъа кельмез экенми?» — деп сорай эдилер.

⁵⁷Баш руханийлер ве фериселер исе Исаны якъаламагъа истеп, кимде-ким Онынъ къаерде олгъаныны бильсе, хабер этсин, деген эмирни чыкъардылар.