Read Мукъаддес Китап къырымтатар тилинде, Юхан 12 Bible Online

Юхан 12 - Мукъаддес Китап къырымтатар тилинде, bible

Юхан 12

¹Песах Байрамындан алты кунь эвель Иса Бетаниягъа кельди. Анда Лазар яшай эди. Иса оны олюлерден тирильткен эди.

²О ерде Иса ичюн акъшамлыкъ аш азырладылар. Марта хызмет эте эди, Лазар исе Исанен берабер ашагъан адамлардан бири эди.

³О вакъыт Мерьем бир кучюк бардакъ [13] темиз, паалы къокъулы ягъ кетирип, Исанынъ аякъларына якъты ве сачларынен Онынъ аякъларыны сюртип къурутты. Ягънынъ къокъусына бутюн эв толды.

⁴Исанынъ шегиртлеринден бири, Оны сатаджакъ Иуда Искариот:

⁵— Бу ягъны учь юз динаргъа [14] сатып фукъарелерге болип берсе, яхшыджа олмаз эдими? — деди.

⁶Бу сёзлерни о фукъарелерге къайгъыргъаны ичюн дегиль, хырсыз олгъаны ичюн айтты. Ортакъ акъча къутусы онда эди, ве о къутугъа къоюлгъан паралардан озюне алып хырсызлай эди.

⁷— О къадынны раатсызлама! — деди Иса. — О, бу ягъны Меним дефн этиледжек кунюм ичюн сакълады.

⁸Фукъарелер эр вакъыт сизлернен оладжакълар, Мен исе эр вакъыт сизлернен олмайджам.

⁹Исанынъ не ерде олгъаныны билип, чокъ еудийлер о ерге кельдилер. Олар тек Исаны дегиль, Иса олюлерден тирильткен Лазарны да корьмеге истей эдилер.

¹⁰Баш руханийлер исе Лазарны да ольдюрмеге тырыша эдилер.

¹¹Чюнки чокъ еудийлер Лазар ичюн о ерге барып, Исагъа иман эте эдилер.

¹²Эртеси куню байрамгъа кельген чокъ адамлар Исанынъ Ерусалимге келеяткъаныны эшиттилер.

¹³Пальма терегининъ пытакъларыны алып, Оны къаршыламагъа чыкътылар ве кучьлю сеслернен къычырып башладылар: — Аллагъа шукюр! Раббининъ ады иле Келеяткъанны, Исраильнинъ Падишасыны шуретленъиз!

¹⁴Иса бир яш эшекни тапып, устюне минди. Бу акъкъында эвельден бойле язылгъан эди:

¹⁵«Эй Сион къызы, къоркъма! Сенинъ Падишанъ яш эшекке минип келеята!»

¹⁶Шегиртлери буны башта анъламадылар. Тек Иса Озь шуретине иришкен сонъ, олар бу сёзлер Онынъ акъкъында язылгъаныны ве халкъ Оны бойле къаршылагъаныны хатырладылар.

¹⁷Иса Лазарны къабирден чагъыргъан ве олюлерден тирильткен вакъытта Онен берабер олгъан халкъ бу акъкъында шаатлыкъ эте эди.

¹⁸Иса бойле бельгини косьтергени акъкъында эшиткен халкъ Оны къаршыламагъа чыкъты.

¹⁹Фериселер исе бир-бирине: — Коресизми, энди ич бир шей япып оламайсыз. Бутюн дюнья Онынъ артындан кетти! — дей эдилер.

²⁰Ибадет этмек ичюн байрамгъа кельгенлер арасында юнанлар да бар эди.

²¹Олар Галилеянынъ Бетсайда шеэринден олгъан Филипнинъ алдына барып ялвардылар: — Эфенди, биз Исаны корьмеге истеймиз.

²²Филип барып бу акъта Андрейге айтты; сонъ Андрейнен Филип экиси Исанынъ алдына барып, Онъа айттылар.

²³Иса оларгъа шойле джевап къайтарды: — Инсан Огълу шуретленеджек вакъты кельди.

²⁴Сизге керчектен догърусыны айтам: эгер богъдайнынъ урлугъы топракъкъа тюшип ольмесе, о тек адий бир урлучыкъ олып къаладжакъ. Амма ольсе, чокъ берекет береджек.

²⁵Ким озь джаныны севсе, оны гъайып этеджек. Ким бу дюньяда озь джаныны аджымаса, оны эбедий аят ичюн сакълап къалдыраджакъ.

²⁶Эгер ким Манъа хызмет этсе, Меним артымдан кельсин. Мен къаерде олсам, хызметчим де о ерде оладжакъ. Ким Манъа хызмет этсе, Баба оны урьмет этеджек.

²⁷Энди исе юрегим сызлай, Мен не айтсам экен? «Эй Баба, Мени бу сааттен къуртар», дейимми? Лякин Мен шу саат ичюн кельдим.

²⁸Эй Баба, Озь адынъны шерефле! Иса буны айткъанынен коктен: — Мен оны шерефледим ве даа шерефлейджегим, — деген сес кельди.

²⁹О ерде тургъан халкъ буны эшитип, кок гудюрдиси белледи. «Ёкъ, Онен мелек лаф этти!» — деди башкъалары.

³⁰Бунъа джевап берип Иса деди: — Бу сес Мен ичюн дегиль, сиз ичюн олды.

³¹Шимди бу дюнья суд этиледжек, шимди бу дюньянынъ башлыгъы [15] тышарыгъа чыкъарылып къувуладжакъ.

³²Мен ерден юкъарыгъа котерильгенимде, эр кесни Озюме чекеджегим.

³³Бу сёзлерни Иса Озюнинъ насыл оледжегини бильдирмек макъсадынен айтты. Халкъ бунъа джевап берип деди:

³⁴— Биз Къанундан, Месих эбедий бизнен оладжагъыны эшиттик. Насыл этип Сен: «Инсан Огълуна юкъарыгъа котерильмеге керек», — дейсинъ? Ким бу Инсан Огълу?

³⁵Иса оларгъа деди: — Даа къыскъа бир вакъыт ичинде ярыкъ сизнен оладжакъ. Ярыкъта юрюнъиз, даа къаранлыкъ сизни басмасын. Къаранлыкъта юрген адам къаерге кетеяткъаныны бильмей.

³⁶Ярыкъ даа сизнен олгъанда, ярыкъкъа иман этинъиз, озюнъиз де ярыкънынъ огъуллары оладжакъсыз. Бу сёзлерни айтып, Иса узакълашып гизленди.

³⁷Иса халкънынъ козю огюнде о къадар чокъ бельгилерни косьтерген олса да, олар Исагъа иман этмей эдилер.

³⁸Чюнки Ешая пейгъамбернинъ айткъан сёзлери беджериледжек эди: «Я Рабби! Бизден эшиткен хаберге ким инанды? Раббининъ къудрети кимге белли олды?»

³⁹Олар ана шу себептен инанып оламай эдилер. Ешая пейгъамбер даа айткъаны киби:

⁴⁰«Бу халкънынъ козьлерини кёр этти, юрегини де бир шей анъламагъан киби этти. Бойледже, олар козьлеринен корьмезлер, акъылларынен анъламазлар, О бизлерни тедавийлер, деп Манъа кельмезлер».

⁴¹Ешая буны айткъан эди, чюнки о, Месихнинъ шуретини корьген ве Онынъ акъкъында айта эди.

⁴²Бунъа бакъмадан, чокъ башлыкълар биле Исагъа иман эттилер. Лякин, синагогалардан айырылмасынлар деп, олар фериселер ичюн Исаны ачыкъ танымай эдилер.

⁴³Чюнки башлыкълар Алланынъ шуретинден адамларнынъ шуретини зияде севе эдилер.

⁴⁴Иса къычырып: — Манъа иман эткен адам Манъа дегиль, Мени Ёллагъангъа иман эте.

⁴⁵Мени корьген адам Мени Ёллагъанны коре.

⁴⁶Манъа иман эткен эр бир адам къаранлыкъта къалмасын деп, Мен дюньягъа ярыкъ олып кельдим.

⁴⁷Ким Меним сёзлеримни эшитип иман этмесе, оны Мен суд этмейим. Мен дюньяны суд этмек ичюн дегиль, къуртармакъ ичюн кельдим.

⁴⁸Мени ред этип, сёзлеримни къабул этмеген адамнынъ суд этиледжеги бар — оны ахыр заманда Меним айткъан Сёзюм суд этеджек.

⁴⁹Мен Озь адымдан айтмадым. Мени ёллагъан Баба не айтаджагъымны, насыл айтаджагъымны Манъа буюрды.

⁵⁰Онынъ эмири исе эбедий аят олгъаныны билем. Мен не айткъан олсам, Баба Манъа буюргъаныны айтам, — деди.