Read Мукъаддес Китап къырымтатар тилинде, Юхан 13 Bible Online

Юхан 13 - Мукъаддес Китап къырымтатар тилинде, bible

Юхан 13

¹Песах Байрамындан эвель Иса, Онынъ бу дюньядан Бабанынъ янына кетмек вакъты кельгенини биле эди. О, бу дюньяда Озюнинъкилерни севген эди ве шимди оларны сонъунадже севди.

²Акъшамлыкъ ашы вакъты эди. Симон Искариот огълу Иуданынъ юрегине Иблис чокътан Исаны сатмакъ ниетини къойгъан эди.

³Иса исе, Баба эр шейни Онынъ къолуна бергенини ве Алладан чыкъып, кене Алланынъ янына къайтаяткъаныны биле эди.

⁴Шунынъ ичюн, Иса софра башындан турды, усть урбасыны чыкъарды, бир эльбез алды да, белине багълады.

⁵Сонъ легенге сув къойып, шегиртлерининъ аякъларыны ювып башлады. Белине багълагъан эльбезнен оларнынъ аякъларыны сюртип къурутты.

⁶Иса Симон Пётрнынъ янына кельгенде: — Рабби! Сен меним аякъларымны ювмагъа истейсинъми?! — деди Пётр.

⁷— Мен шимди не япкъанымны сен анъламайсынъ. Сонъ анълайджакъсынъ, — деди Иса онъа джевап берип.

⁸— Меним аякъларымны ич бир вакъыт ювмайджакъсынъ! — деди Пётр. — Эгер ювмасам, Меннен бирликте пайынъ олмайджакъ, — деди Иса.

⁹О вакъыт Симон Пётр: — Рабби, тек аякъларымны дегиль, къолларымны, башымны да юв! — деди.

¹⁰Иса онъа: — Ювулгъан адам бутюнлей темиз, онынъ тек аякъларыны ювмакъ керек. Сиз темизсиз, амма эпинъиз дегиль, — деди.

¹¹Иса Оны сатаджакъ адамны биле эди, шунынъ ичюн «Эпинъиз темиз дегильсиз», деди.

¹²Шегиртлерининъ аякъларыны ювгъан сонъ, Иса усть урбасыны кийип, ерине ерлешти. Шегиртлерине деди: — Мен сизге не япкъанымны анъладынъызмы?

¹³Сиз Манъа «Оджа» ве «Рабби» дейсиз, эм догъру айтасыз, чюнки Мен бу олам.

¹⁴Шунынъ ичюн, эгер Мен Рабби ве Оджа олып, аякъларынъызны ювгъан олсам, сизге де бир-биринъизнинъ аякъларынъызны ювмакъ керек.

¹⁵Мен сизге орьнек косьтердим. Энди Мен сизге не япкъан олсам, сизге де ойле япмакъ керек.

¹⁶Сизге керчектен догърусыны айтам: къул озюнинъ эфендисинден устюн дегиль, ёлланылгъан да оны ёллагъандан устюн дегильдир.

¹⁷Эгер буны анъласанъыз, буны беджерип бахтлы олурсыз!

¹⁸Мен эпинъиз акъкъында айтмайым, — девам этти Иса. — Мен сайлагъан адамларымны билем. Лякин Языда: «Отьмегимни ашагъан адам Манъа къаршы табаныны котерди», — язылгъан сёзлер беджерильмек керек.

¹⁹Шимдиден, даа бу вакъиалар олмаздан эвель, Мен буны сизге айтам, чюнки бу вакъиалар олгъан сонъ, сиз иман этеджексиз ки, Мен — Одырым.

²⁰Сизге керчектен догърусыны айтам: ким Мен ёллайджакъ адамны къабул этсе, Мени къабул эте. Мени къабул эткен исе Мени Ёллагъанны къабул эте.

²¹Бу сёзлерни айткъан сонъ, Исанынъ руху пек сыкъылды. Энди ачыкътан-ачыкъ айтып башлады: — Сизге керчектен догърусыны айтам: сизден биринъиз Мени сатаджакъ.

²²Шегиртлери исе, О, ким акъкъында айткъаныны бильмейип, шашкъынлыкънен бир-бирине бакъып тура эдилер.

²³Олардан бири Исанынъ янында ята эди. Иса оны пек севди.

²⁴Симон Пётр онъа: Иса ким акъкъында айткъаныны сораса, деп ишмар этти.

²⁵О исе Исанынъ кокрегине башыны къойып: — Рабби, о кимдир? — деп сорады.

²⁶Иса джевап берип: — Мен бу кесек отьмекни ашкъа батырып кимге берсем, одыр, — деди. Сонъ О, бир кесек отьмекни батырып, Симон Искариот огълу Иудагъа берди.

²⁷Шу ань, Иуда отьмекни алгъанынен, Иблис онынъ ичине кирди. — Япаджагъынъны тез-тез яп, — деди онъа Иса.

²⁸Софра этрафындакилерден ич кимсе Иса бу сёзлерни не ичюн айткъаныны анъламады.

²⁹Акъча къутусы Иудада олгъаны ичюн, базылары Иса онъа: «Байрам ичюн бизге керек олгъан шейлерни сатын ал», я да «Фукъарелерге бир шей бер», деди, деп тюшюндилер.

³⁰Иуда исе отьмекни алып, бирден тышарыгъа чыкъып кетти. Энди гедже тюшкен эди.

³¹Иуда чыкъып кеткен сонъ, Иса деди: — Шимди Инсан Огълу шерефленди, Алла да Инсан Огълунда шерефленди.

³²Эгер Алла Инсан Огълунда шерефленген олса, Алла да Озюнде Инсан Огълуны шерефлейджек ве тез арада шерефлейджек Оны.

³³Балалар! Мен сизлернен берабер даа аз вакъыт оладжагъым. Мени къыдыраджакъсыз. Еудийлернинъ башлыкъларына айткъаным киби, сизге де айтам: Мен кетеяткъан ерге сиз барып оламайсыз.

³⁴Сизге янъы эмир берем: бир-биринъизни севинъиз. Мен сизни насыл севген олсам, сиз де бир-биринъизни шойле севинъиз.

³⁵Эгер аранъызда бир-биринъизге севги олса, сиз Меним шегиртлерим олгъанынъызны эписи биледжек.

³⁶Симон Пётр Исагъа деди: — Рабби, Сен къаерге кетесинъ? — Энди Мен кетеяткъан ерге сен шимди артымдан барып оламайсынъ, амма сонъ бараджакъсынъ, — деп джевап берди онъа Иса.

³⁷— Рабби, — деди онъа Пётр, — не ичюн шимди артынъдан барып оламайым? Мен Сен ичюн джанымны береджегим!

³⁸Иса джевап берип: — Мен ичюн джанынъны береджексинъ? Санъа керчектен догърусыны айтам: хораз къычырмаздан эвель, сен Менден учь кере вазгечеджесинъ, — деди.