Read Мукъаддес Китап къырымтатар тилинде, Юхан 15 Bible Online

Юхан 15 - Мукъаддес Китап къырымтатар тилинде, bible

Юхан 15

¹Мен — акъикъий юзюм асмасы олам, Бабам исе — багъджыдыр.

²Мендеки мейва бермеген эр бир пытакъны О, кесип ташлай. Мейва берген эр бир пытакъны исе, даа чокъ мейва берсин деп, пытап темизлей.

³Меним сизге айткъан Сёзюм ичюн сиз энди темизсинъиз.

⁴Менде олунъыз, Мен де сизде оладжагъым. Асмада къалмагъан пытакъ озь-озюнден мейва берип оламай; сиз де Менде къалмасанъыз, мейва берип оламазсыз.

⁵Мен — юзюм асмасы олам, сиз — пытакъларысынъыз. Ким Менде олса, Мен де онда олсам, о, чокъ мейва бере, чюнки Менсиз ич бир шей япып оламайсыз.

⁶Ким Менде олмаса, кесильген пытакъ киби атыладжакъ ве къуруйджакъ. Бойле пытакъларны джыйып, атешке атып якъалар.

⁷Эгер сиз Менде къалсанъыз ве сёзлерим де сизде къалса, истегенинъизни соранъыз, сизге бериледжек.

⁸Сиз чокъ мейва берсенъиз ве Меним шегиртлерим олсанъыз, Бабам шерефленеджек.

⁹Бабам Мени насыл севген олса, Мен де сизни ойле севдим. Меним севгимде булунынъыз.

¹⁰Мен Бабамнынъ эмирлерини тутып, Онынъ севгисинде булунам. Сиз де Меним эмирлеримни тутсанъыз, Меним севгимде булунаджакъсыз.

¹¹Меним къуванчым сизде олсун ве сизинъ къуванчынъыз бутюнлей олсун деп, Мен бу сёзлерни сизге айттым.

¹²Меним эмирим шудыр: Мен сизни насыл севген олсам, сиз де бир-биринъизни ойле севинъиз.

¹³Ким озь джаныны достлары ичюн берсе, бундан юксек севги ёкъ.

¹⁴Эгер сиз буюргъанларымны беджерсенъиз, сиз Меним достларымсыз.

¹⁵Мен сизге энди «къул» демейим, чюнки къул эфендисининъ не япкъаныны бильмей. Сизге исе «достларым» дедим, чюнки Бабамдан эшиткен эр шейни сизге бильдирдим.

¹⁶Сиз Мени сайламадынъыз, лякин Мен сизни сайладым ве сизни, юрмеге ве гъайып олмайджакъ мейва бермеге тайин эттим. Шунынъ ичюн, Меним адымдан Бабадан не истесенъиз, О, сизге береджек.

¹⁷Мен сизге буюрам: бир-биринъизни севинъиз!

¹⁸Эгер дюньянынъ сизни кореджек козю олмаса, билинъиз ки, сизден эвель онынъ Мени кореджек козю ёкъ эди.

¹⁹Сиз бу дюньядан олгъан олсанъыз, дюнья сизни озюнъки киби север эди. Амма сиз бу дюньядан дегильсиз, лякин Мен сизни дюньядан сайлап алдым. Ана шу себептен дюньянынъ сизни кореджек козю ёкъ.

²⁰«Къул озь эфендисинден устюн олмаз», деген лафны акъылынъызда тутунъыз. Эгер Мени къувгъан олсалар, сизни де къуваджакълар. Эгер Меним сёзлеримни туткъан олсалар, сизинъкилерини де тутаджакълар.

²¹Адамлар бунынъ эписини сизге Меним адым ичюн япаджакълар, чюнки Мени Ёллагъанны бильмейлер.

²²Эгер Мен келип оларгъа айтмагъан олсам, оларда гуна олмаз эди. Энди исе гунасына сылтав къалмады.

²³Мени кореджек козю олмагъан адамнынъ Бабамны да кореджек козю ёкъ.

²⁴Эгер Мен олар арасында, башкъалары асыл япып оламагъан ишлерни япмагъан олсам, оларда гуна олмаз эди. Энди исе ишлеримни корьдилер ве Мени де, Бабамны да кореджек козю олмады.

²⁵Бу оларнынъ Къанунында: «Себепсиз оларнынъ Мени кореджек козю ёкъ эди», — деп язылгъан шей беджерильмек ичюн олмакъ керек эди.

²⁶Бабамдан Мен сизге Къорчалайыджыны ёллайджам. О, Бабамдан чыкъаяткъан Акъикъат Рухудыр. О кельгенде, Меним акъкъымда шаатлыкъ этеджек.

²⁷Сиз де шаатлыкъ этеджексиз, чюнки сиз башындан Меннен берабер эдинъиз.