Read Мукъаддес Китап къырымтатар тилинде, Юхан 16 Bible Online

Юхан 16 - Мукъаддес Китап къырымтатар тилинде, bible

Юхан 16

¹Сиз ёлдан урулманъыз деп, Мен буны сизге айттым.

²Сизни синагогадан айыраджакълар. Ойле заман келеята ки, сизни ольдюрген эр бир адам, буны япып, Аллагъа хызмет этем, деп тюшюнеджек.

³Бу ишлерни япаджакълар, чюнки олар не Бабамны, не Мени таныдылар.

⁴Онынъ вакъты-саати кельгенде, сёзлеримни хатырланъыз деп, Мен буны сизге бильдирдим. Эвельден сизге буны айтмадым, чюнки сизнен берабер эдим.

⁵Энди исе Мени Ёллагъаннынъ янына кетем. Амма аранъыздан ич кимсе Менден: «Къайда кетесинъ?» — деп сорамай.

⁶Лякин буны сизге айткъаным ичюн, юреклеринъиз гъам-къайгъыгъа толды.

⁷Амма сизге акъикъатны айтам: Меним кетеяткъаным сиз ичюн файдалыдыр. Чюнки эгер Мен кетмесем, Къорчалайыджы сизге кельмез. Эгер кетсем, Оны сизге ёллайджагъым.

⁸О исе келип, гуна, инсафлыкъ ве суд акъкъында дюньянынъ къабаатыны белли этеджек.

⁹Гуна акъкъында, чюнки адамлар Манъа иман этмейлер.

¹⁰Инсафлыкъ акъкъында, чюнки Мен Бабагъа кетеятам, ве сиз Мени энди корьмейджексиз.

¹¹Суд акъкъында, чюнки бу дюньянынъ башлыгъы [17] суд этильди.

¹²Сизге даа чокъ шей айтмакъ керегим, лякин шимди оны анълап оламайсыз.

¹³Амма О, Акъикъат Руху кельгенде, О, сизни бутюн акъикъат ёлуна алып бараджакъ. О, Озюнден айтмайджакъ. Не эшитсе, шуны айтаджакъ ве келеджекте оладжакъларны сизге ачыкъ-айдын этеджек.

¹⁴О, Мени шерефлейджек, чюнки Менден эшиткен шейлерни сизге ачыкъ-айдын этеджек.

¹⁵Бабанынъ олгъан эр шейи Менимкидир. Ана шу себептен, О, Менден эшиткен шейлерни сизге ачыкъ-айдын этеджек, дейим.

¹⁶Бираздан сиз Мени корьмейджексиз, бираздан да кене Мени кореджексиз.

¹⁷О вакъыт Исанынъ шегиртлери озьара: — Онынъ бизге: «Бираздан сиз Мени корьмейджексиз, бираздан да кене Мени кореджексиз», ве «Чюнки Мен Бабамнынъ янына кетем», айткъанынынъ манасы не? — дедилер.

¹⁸Сонъ олар: — «Бираздан» дегенинен не айтмагъа истей? Биз анълап оламаймыз! — дей эдилер.

¹⁹Иса, шегиртлери Ондан бу шейлер акъкъында сорамагъа истегенлерини билип, деди: — «Бираздан Мени корьмейджексиз, бираздан да кене Мени кореджексиз», деген сёзлерим акъкъында деп сорашасынъызмы?

²⁰Сизге керчектен догърусыны айтам: сиз агълайджакъсыз ве юреклеринъиз янаджакъ, дюнья исе къуванаджакъ. Сиз дертлер чекеджексиз, лякин дертлеринъиз къуванчкъа айланаджакъ.

²¹Бала догъгъан къадын дертлер чеке, чюнки онынъ вакъты кельди. Амма бала догъгъандан сонъ, дертлерини унута, чюнки дюньягъа янъы адамнынъ кельгенине къувана.

²²Сиз де шимди дертлер чекесиз, лякин Мен сизни кене кореджем, ве юреклеринъиз къуванчкъа толаджакъ, ве къуванчынъызны сизден ич кимсе тутып аламаз.

²³О куню Менден ич бир шей сорамайджакъсыз. Сизге керчектен догърусыны айтам: эгер Меним адымдан Бабадан не сорасанъыз, О, сизге береджек.

²⁴Шимдигедже Меним адымдан Бабадан ич бир шей сорамадынъыз. Соранъыз ве аладжакъсыз, ве къуванчынъыз там оладжакъ.

²⁵Бу шейлерни Мен сизге кинаенен айттым. Лякин ойле бир вакъыт келе ки, энди сизге кинаенен айтмайджагъым, Баба акъкъында ачыкътан-ачыкъ айтаджагъым.

²⁶О куню Меним адымдан сорайджакъсыз. Мен исе, сиз ичюн Бабадан сорайджагъым, демейим.

²⁷Баба Озю исе сизни севе, чюнки сиз Мени севип, Алладан чыкъкъаныма инандынъыз.

²⁸Мен Бабадан чыкъып, дюньягъа кельдим. Энди кене дюньядан кетип, Бабагъа къайтам.

²⁹— Мына, шимди Сен ачыкъ-айдын айтасынъ, кинаенен лаф этмейсинъ, — деди шегиртлер Исагъа.

³⁰— Шимди билемиз ки, Сен эр шейни билесинъ ве ич бир адамгъа Сенден сорамакънынъ кереги ёкъ. Шунынъ ичюн биз Сен Алладан кельгенинъе инанамыз.

³¹— Энди инанасынъызмы? — деди Иса оларгъа.

³²— Мына, ойле вакъыт келеята ве энди кельди ки, эр биринъиз озь тарафынъызгъа къачаджакъсыз, ве Мен бир Озюм олып къаладжагъым. Амма Мен ялынъыз дегилим, чюнки Баба Меннен берабер.

³³Сиз Менде барышыкъ тапмакъ ичюн буларны сизге айттым. Дюньяда къаза-беля устюнде яшайсынъыз. Лякин джесюр олунъыз: Мен бу дюньяны енъдим.