Read Мукъаддес Китап къырымтатар тилинде, Юхан 18 Bible Online

Юхан 18 - Мукъаддес Китап къырымтатар тилинде, bible

Юхан 18

¹Бу сёзлерни айткъан сонъ, Иса Озь шегиртлеринен о ерден чыкъып, Кидрон вадийининъ башкъа тарафына кечти. Шу ерде бир багъ бар эди. Иса шегиртлеринен берабер багънынъ ичине кирдилер.

²Исаны саткъан Иуда да о ерни биле эди, чюнки Иса шегиртлеринен берабер о ерде сыкъ-сыкъ топлаша эдилер.

³Бойлеликнен, Иуда бир арбий болюкни эм де баш руханийлерден ве фериселерден мемурларны алып, о ерге кельди. Къолларында лампатлар, фенерлер ве силя бар эди.

⁴Иса, Озюне оладжакъ эр шейни биле эди. О, адамларнынъ огюне чыкъып, сорай: — Кимни къыдырасыз?

⁵— Назаретли Исаны, — деп джевап бере олар. — Бу Меним, — дей Иса. Исаны саткъан Иуда да оларнынъ арасында тура эди.

⁶Иса «Бу Меним» дегенинен, олар арткъа чекилип, озьлерини ерге ташладылар.

⁷Иса олардан кене сорай: — Кимни къыдырасыз? — Назаретли Исаны, — дейлер олар.

⁸— Сизге айттым да, бу Меним. Эгер Мени къыдырсанъыз, бу адамларны йиберинъиз, кетсинлер, — деди оларгъа Иса.

⁹Шунынънен, Онынъ эвельден: «Сен Манъа берген адамлардан ич бирисини гъайып этмедим», деген сёзлери беджерильмек керек эди.

¹⁰Шу ань Симон Пётр озь къылычыны чыкъарды да, баш руханийнинъ къулуны урып, онынъ онъ къулагъыны кесип атты. Къулнынъ ады Малхос эди.

¹¹Иса Пётргъа: — Къылычынъны къынына сакъла! Бабам Манъа берген къадени ичмемми? — деди.

¹²О вакъыт болюкнинъ аскерлери, бинъбашы ве еудийлернинъ мемурлары Исаны якъалап багъладылар.

¹³Оны башта Аннаснынъ алдына алып кельдилер. Аннас о йылы баш руханий олгъан Каяфанынъ къайнатасы эди.

¹⁴Эвельден еудий башлыкъларына: «Халкъ ичюн бир адамнынъ ольгени яхшыджа», деп акъыл огреткен адам Каяфа эди.

¹⁵Исанынъ артындан Симон Пётр ве даа башкъа бир шегирт кеттилер. Бу шегирт баш руханийнен таныш эди, шунынъ ичюн о, Исанен берабер баш руханийнинъ азбарына кирди.

¹⁶Пётр исе тышарыда, къапунынъ янында тура эди. Сонъ баш руханийнен таныш олгъан шегирт чыкъты ве къапуны къаравул эткен къызгъа бир шейлер айтып, Пётрны ичериге алып кирди.

¹⁷О вакъыт, къапуны къаравул эткен къыз Пётрдан: — Сен де о адамнынъ шегиртлеринден дегильсинъми? — деп сорады. — Ёкъ! — деди Пётр.

¹⁸Ава сувукъ олгъаны ичюн, о ерде тургъан къуллар ве мемурлар комюрден атеш якъып, къызына эдилер. Пётр да оларнен берабер къызынып тура эди.

¹⁹О вакъыт баш руханий Исагъа Онынъ шегиртлери ве огретюви акъкъында суаллер бере эди.

²⁰Иса онъа джевап берди: — Мен бутюн дюньягъа ачыкъ айттым. Эр вакъыт еудийлернинъ эписи топлашкъан синагогаларда ве Алланынъ Сарайында огреттим, гизли ич бир шей айтмадым.

²¹Не ичюн Менден сорайсынъ? Меним лафларымны эшиткенлерден сорап биль, олар айткъанымны билелер.

²²Иса буларны айткъан вакъытта, якъын тургъан мемурлардан бири, Исанынъ бетине урып: — Баш руханийге насыл джевап бересинъ? — деди.

²³Иса джевап берип: — Эгер Мен янълыш айткъан олсам, о, янълыш олгъаны акъкъында шаатлыкъ бер. Эгер догъру айткъан олсам, не ичюн Мени урасынъ? — деди.

²⁴Бундан сонъ Аннас Исаны багълангъан алда баш руханий Каяфагъа ёллады.

²⁵Симон Пётр исе даа къызынып тура эди. — Сен де Онынъ шегиртлеринден дегильсинъми? — деп сорадылар ондан. — Ёкъ! — деп инкяр этти о.

²⁶Баш руханийнинъ къулларындан бири, Пётр къулагъыны кесип аткъан адамнынъ сою эди. Бу къул Пётргъа: — Багъчада сени Онен берабер корьмедимми? — деди.

²⁷Пётр кене инкяр этти. Шу ань хораз къычырды.

²⁸Исаны Каяфанынъ эвинден преториягъа [18] алып бардылар. Саба эрте эди. Еудийлер арамланмамакъ ичюн, сарайгъа кирмедилер, чюнки Песах ашыны ашамагъа истедилер.

²⁹Шу себептен Пилат тышарыгъа, оларнынъ алдына чыкъты. — Бу адамны неде къабаатлайсыз? — деп сорады.

³⁰— Эгер О, яманлыкъ япмагъан олса, Оны санъа алып кетирмез эдик, — деп джевап берди олар.

³¹— Оны озюнъиз алынъыз да, озь Къанунынъыз боюнджа суд этинъиз, — деди Пилат. — Бизим ич кимсени олюм джезасына бермеге акъкъымыз ёкъ, — деди онъа еудийлер.

³²Шунынънен, Исанынъ, Озюнинъ келеджек олюми акъкъында айткъан сёзлери ерине кельмек керек эди.

³³Пилат преториягъа къайтып Исаны чагъырды да: — Сен еудийлернинъ Падишасы оласынъмы? — деп сорады.

³⁴— Бу лаф озюнъден чыкътымы, я да башкъалары санъа Меним акъкъымда айттылармы? — деп сорады Иса.

³⁵— Не, мен еудийимми? Сени манъа Озь халкъынъ, Озь баш руханийлеринъ якъалап бердилер. Сен насыл иш яптынъ? — деди Пилат.

³⁶Иса джевап берди: — Меним Падишалыгъым бу дюньядан дегиль. Эгер Падишалыгъым бу дюньядан олгъан олса, еудий башлыкъларынынъ къолуна Манъа берильмемек ичюн, хызметчилерим курешир эдилер. Ёкъ, Меним Падишалыгъым бу ерден дегиль.

³⁷— Демек, Сен падиша экенсинъ де? — деди Пилат. — Сен озюнъ Манъа «Падиша» дейсинъ, — деди Иса. — Мен акъикъат акъкъында шаатлыкъ этмек ичюн догъдым ве шу макъсатнен дюньягъа кельдим. Ким акъикъат тарафында олса, Меним сесимни эшите.

³⁸— Акъикъат недир? — деп сорады Пилат. Буны айтты да, кене тышарыгъа, еудийлернинъ алдына чыкъты. — Мен Онда ич бир къабаат тапмайым, — деди оларгъа.

³⁹— Сизинъ бир адетинъиз бар: сиз ичюн Песах Байрамында бир мабюсны азат этем. Истейсизми, еудийлернинъ Падишасыны сизге азат этейим?

⁴⁰Лякин олар къычырып, кене: — Оны дегиль, Бараббаны азат эт! — деди. Барабба исе айдут эди.