Read Мукъаддес Китап къырымтатар тилинде, Юхан 19 Bible Online

Юхан 19 - Мукъаддес Китап къырымтатар тилинде, bible

Юхан 19

¹О вакъыт Пилат Исаны къамчыламагъа буюрды.

²Аскерлер исе тикенлерден тадж ясап, Онынъ башына кечирдилер, устюне мор тюслю урба [19] кийдирдилер.

³Исанынъ янына келип: — Яшасын еудийлернинъ Падишасы! — деп, Онынъ бетине ура эдилер.

⁴Сонъ Пилат кене тышарыгъа чыкъып, халкъкъа: — Мына, Оны огюнъизге чыкъараджам. Билинъиз: мен Онда ич бир къабаат тапмадым! — деди.

⁵О вакъыт, башына тикенли тадж, устюне мор тюслю урба кийильген Иса тышарыгъа чыкъты. — Мына, о адам! — деди Пилат оларгъа.

⁶Баш руханийлер ве мемурлар Исаны корип: — Оны хачкъа мыхла, хачкъа! — деп къычырдылар. — Оны сиз алынъыз да, хачкъа мыхланъыз! Мен Онда ич бир къабаат тапмадым, — деди Пилат оларгъа.

⁷Еудийлер онъа джевап берип: — Бизде Къанун бар. Къанунымыз боюнджа Онъа ольмек керек, чюнки О, Озюни Алланынъ Огълу япты, — дедилер.

⁸Пилат буны эшитип, даа чокъ къоркъты.

⁹Къайтып, преториягъа кирди ве Исадан: — Сен къаерденсинъ? — деп сорады. Лякин Иса онъа джевап бермеди.

¹⁰— Манъа джевап бермейсинъми? — деди Пилат. — Сени хачкъа мыхламагъа да, азат этмеге де къудретим олгъаныны бильмейсинъми?

¹¹Иса джевап берди: — Эгер санъа юкъарыдан берильмеген олса, сенде Меним устюмде ич бир къудретинъ олмаз эди. Шу себептен Мени сенинъ къолунъа бергеннинъ гунасы сенинъ гунанъдан буюк.

¹²Бу сёзлерден сонъ Пилат Исаны азат этмеге чаресини къыдырып башлады. Амма еудийлер къычырып: — Эгер Оны азат этсенъ, Сен императорнынъ досту дегильсинъ! Озюне падиша деген эр бир адам императоргъа къаршыдыр! — дедилер.

¹³Пилат бу сёзлерни эшитип, Исаны тышарыгъа алып чыкъты, озю исе еудийдже «Габбата» деген Таш Тёшеме устюндеки къады курсюсине отурды.

¹⁴Шу куню азырланув куню, Песах Байрамынынъ арфеси эди. Вакъыт уйлеге якъын эди. Пилат еудийлерге: — Мына, Падишанъыз! — деди.

¹⁵— Ёкъ эт Оны, ёкъ эт! Хачкъа мыхла! — деп къычырды олар. — Сизинъ Падишанъызны хачкъа мыхлайыммы? — деп сорады Пилат. — Императордан башкъа падишамыз ёкъ, — деди баш руханийлер.

¹⁶Ахыр-сонъу Пилат Исаны хачкъа мыхламакъ ичюн оларгъа берди. Олар исе Исаны алып кеттилер.

¹⁷Иса Озь хачыны котерип, «Къафа Ери», еудийдже Голгофа деген ерге кельди.

¹⁸О ерде Исаны хачкъа мыхладылар. Онен берабер даа эки адамны мыхладылар, Иса ортада, бириси онъ, экинджиси сол тарафта эдилер.

¹⁹Пилат: «Назаретли Иса, еудийлернинъ Падишасы», деп яздырды да, языны хачнынъ тёпесине астырды.

²⁰Иса хачкъа мыхлангъан ер шеэрге якъын олгъаны ичюн, бу языны чокъ адам окъуды. Язы еудий, латин ве юнан тиллеринде язылгъан эди.

²¹Еудийлернинъ баш руханийлери исе Пилаткъа барып шойле дедилер: — «Еудийлернинъ Падишасы» деп язма. Лякин: «Бу адам: „Мен еудийлернинъ Падишасым”, деди», — деп яз.

²²— Нени язгъан олсам, шуны яздым, — деди Пилат.

²³Аскерлер Исаны хачкъа мыхлагъан сонъ, Онынъ урбасыны алдылар. Эр бир аскерге айырып, усть урбасыны дёрт парчагъа больдилер. Тюп урбасы исе къалды. О, бойдан-бойгъа тикишсиз токъулгъан эди.

²⁴Аскерлер бир-бирине: — Буны йыртмайыкъ, о ичюн джереп чекейик, кимге тюшсе, онынъки олсун, — дедилер. Шунынънен, Язынынъ сёзлери: «Урбаларымны озьара больдилер, урбам ичюн джереп чектилер», — беджерильмек керек эди. Аскерлер де бойле яптылар.

²⁵Исанынъ хачы янында Онынъ анасы, анасынынъ татасы, Клопаснынъ апайы Мерьем ве магдалалы Мерьем тура эдилер.

²⁶Иса анасыны ве янында Озюнинъ севимли шегирти тургъаныны корьди де, анасына: — Эй къадын, мына бу сенинъ огълунъ! — деди.

²⁷Сонъ шегиртине: — Мына бу сенинъ ананъ! — деди. О вакъыттан башлап о шегирт Мерьемни озь эвине алды.

²⁸Бундан сонъ Иса энди эр шей беджерильгенини билип, Язы сонъунадже беджерильсин деп, О: — Сувсадым! — деди.

²⁹О ерде экши шарапкъа толу бир савут бар эди. Аскерлер сюнгерни экши шарапкъа батырдылар ве эзов отунынъ деметине илиштирип, Исанынъ агъзына узаттылар.

³⁰Иса бир ютум шарап ичип: — Эр шей ерине кельди! — деди де, башыны эгип джан берди.

³¹О куню — азырланув куню, раатлыкъ кунюнинъ арфеси эди. Беденлер хачларда раатлыкъ кунюнде, хусусий буюк бир байрам кунюнде къалмасынлар деп, еудийлер Пилаттан, хачкъа мыхлангъан адамларнынъ балдырларыны сындырып, беденлерини хачлардан аладжакъларыны истедилер.

³²Аскерлер барып, Исанен берабер хачкъа мыхлангъан биринджи, сонъ экинджи адамнынъ балдырларыны сындырдылар.

³³Исанынъ янына барып, Онынъ энди ольгенини корьдилер ве балдырларыны сындырмадылар.

³⁴Лякин аскерлерден бири Исанынъ багърыны мызракънен тешти. Шу дакъкъасы Онынъ багърындан къан ве сув акъып чыкъты.

³⁵Буны корьген адам, сиз де иман этмек ичюн, шаатлыкъ этти. Онынъ шаатлыгъы догърудыр, о, акъикъатны айткъаныны биле.

³⁶«Онынъ кемиги сындырылмайджакъ», — деген Язы беджерильсин деп, бу шейлер олды.

³⁷Язынынъ башкъа бир еринде шойле айтылгъан: «Бедени тешильген Адамгъа тикилип бакъаджакълар».

³⁸Бундан сонъ ариматеялы Юсуф Исанынъ беденини хачтан тюшюрмек ичюн Пилаттан разылыкъ сорады. Юсуф Исанынъ шегирти эди, лякин гизлиден, чюнки еудийлерден къоркъа эди. Пилат онъа разылыкъ берди. О вакъыт Юсуф барып, Исанынъ беденини хачтан алды.

³⁹Никодим де онен берабер кетти. О, эвельден, гедже Исагъа кельген эди. О, 30 литр [20]мюрнен алоэ къарышмасыны алып кельди.

⁴⁰Олар экиси Исанынъ беденини алып, еудийлернинъ дефн адетлерине коре, Оны бу къокъулы шейлернен кетен безге сардылар.

⁴¹Иса хачкъа мыхлангъан ерде бир багъча бар эди. О багъчада даа ич бир кимсе дефн этильмеген янъы къабир бар эди.

⁴²Еудийлернинъ раатлыкъ кунюне азырланув куню олгъаны ичюн, олар, бу ер якъын, деп, Исаны шу къабирге къойдылар.