Read Мукъаддес Китап къырымтатар тилинде, Юхан 2 Bible Online

Юхан 2 - Мукъаддес Китап къырымтатар тилинде, bible

Юхан 2

¹Учюнджи куню Галилеянынъ Кана шеэрчигинде никях тою олды. Исанынъ анасы о ерде эди.

²Исанен шегиртлер де тойгъа чагъырылгъан эдилер.

³Шарап биткен сонъ, Исанынъ анасы Онъа: — Оларда шарап къалмагъан, — дей.

⁴Иса онъа: — Къадын, бу бизим ишимиз дегиль. Меним вакъыт-саатим даа кельмеди, — дей.

⁵О вакъыт анасы хызметчилерге: — О, сизге не айтса, оны япынъыз, — дей.

⁶О ерде еудийлернинъ элялланув адети ичюн, эр бири секиз-он эки къопкъа [3] сув сыгъдыргъан алты дане таш савут бар эди.

⁷Иса хызметчилерге: — Савутларны сувгъа толдурынъыз, — дей. Олар савутларны четлеринедже толдурдылар.

⁸Сонъ Иса оларгъа: — Энди чомучлап алынъыз да, тойбашына алып барынъыз, — дей. Олар ойле де япты.

⁹Тойбашы, шарап олгъан сувны ичип бакъты. Шарап къайдан кельгенини о бильмей эди, тек сувны чекип кельген хызметчилер биле эди. Тойбашы киевни чагъырып, онъа:

¹⁰— Эр кес башта яхшы шарапны къоя, ве мусафирлер ичип тойгъан сонъ ярамайджа союны бере. Сен исе яхшы шарапны шу вакъыткъадже сакълап туткъансынъ! — дей.

¹¹Иса буны Галилеянынъ Кана шеэрчигинде япты; бу шей Онынъ аджайип бельгилерининъ башы олды. Бойле О, Озь шуретини косьтерди, ве шегиртлери Онъа иман эттилер.

¹²Бундан сонъ Иса, анасы, къардашлары ве шегиртлери Кафарнаум шеэрине кельдилер ве о ерде бир къач кунь отурдылар.

¹³Еудийлернинъ Песах Байрамы якъынлашкъаны ичюн, Иса Ерусалим шеэрине кетти.

¹⁴Алланынъ Сарайы азбарына киргенинен, бугъалар, къойлар, гогерджинлер саткъанларны ве пара алмаштырыджыларнынъ отургъаныны корьди.

¹⁵Иса аркъандан бир къамчы ясады да, Сарайнынъ азбарындан эписини бугъаларынен ве къойларынен берабер къувып чыкъарды, пара алмаштыргъанларнынъ масаларыны авдарып, акъчаларыны септирип йиберди.

¹⁶Гогерджинлерни саткъанларгъа: — Буларны бу ерден ёкъ этинъ, Бабамнынъ Эвини базыргян эвине айландырманъыз! — деди.

¹⁷О вакъыт Онынъ шегиртлери: «Сенинъ Эвинъе олгъан шевкъим ичимде янаджакъ», — язылгъан сёзлерни хатырладылар.

¹⁸Сонъ еудий башлыкълары джевап берип: — Бойле шейлерни япасынъ, амма бизге насыл бельги береджексинъ? — дедилер.

¹⁹Иса оларгъа: — Бу Сарайны йыкъынъыз, ве Мен оны учь кунь ичинде тиклейджем, — деди.

²⁰Олар Исагъа: — Бу Сарай 46 йылда къурулгъан, Сен исе оны учь куньде тиклемеге истейсинъ?! — дедилер.

²¹Иса исе «Сарай» деп, Озь бедени акъкъында дей эди.

²²О, олип тирильген сонъ, шегиртлери бу сёзлерни хатырладылар ве Мукъаддес Языгъа да, Исанынъ сёзюне де инандылар.

²³Иса Ерусалимде Песах Байрамында олгъанда, чокъ адамлар Онынъ япкъан аджайип бельгилерини корип, Онъа иман эттилер.

²⁴Амма О, эписи адамларнынъ юреклерини бильгени ичюн, Озю оларгъа ишанмай эди.

²⁵Исагъа адамлар акъкъында шаатлыкъ бермек керекмей эди, чюнки О, адамнынъ юрегинде не олгъаныны Озю биле эди.