Read Мукъаддес Китап къырымтатар тилинде, Юхан 20 Bible Online

Юхан 20 - Мукъаддес Китап къырымтатар тилинде, bible

Юхан 20

¹Афтанынъ биринджи куню саба эрте, даа къаранлыкъ олгъанда, магдалалы Мерьем къабирнинъ янына келип, къабир агъзындаки ташнынъ авдарылгъаныны корьди.

²О, чапып Симон Пётр ве башкъа, Исанынъ севимли шегиртине кельди де: — Олар Раббини къабирден алып кеткенлер, Оны не ерге къойгъанларыны бильмеймиз, — деди.

³Шу ань Пётр ве башкъа шегирт чыкъып, къабир тарафына кеттилер.

⁴Экиси берабер чапып бардылар. Амма о шегирт Пётрдан тездже чапып, къабирге биринджи барып етти.

⁵О, эгилип ичериге козь ташлады, о ерде тек кетен безлер яткъаныны корьди, лякин озю къабирге кирмеди.

⁶Онынъ артындан Симон Пётр келип чыкъты ве къабирге кирип, ерде яткъан кетен безлерни корьди.

⁷Исанынъ башына сарылгъан явлукъ исе кетен безлернен берабер дегиль, айыры ерде сарылып къоюлгъан эди.

⁸О вакъыт, эвель кельген шегирт де къабирге кирди ве буны корип, иман этти.

⁹Лякин Иса олюлерден тириледжек, деген Языны олар даа анъламай эдилер.

¹⁰Сонъ шегиртлер кене озь эвлерине къайтып кеттилер.

¹¹Мерьем исе къабирнинъ янында турып, агълай эди. Агълай-агълай, бир эгилип къабир ичине бакъты.

¹²Анда беяз урба кийген эки мелекни корьди. Бири Исанынъ бедени яткъан ернинъ башы уджунда, экинджиси исе аякъ уджунда отура эди.

¹³Олар Мерьемге: — Эй къадын, сен не ичюн агълайсынъ? — дедилер. — Раббимни алып кеткенлер, Оны къаерге къойгъанларыны бильмейим, — деди о.

¹⁴Буны айткъанынен, артына айланып, онынъ янында тургъан Исаны корьди. Лякин Онынъ Иса олгъаныны бильмеди.

¹⁵— Эй къадын, сен не ичюн агълайсынъ? Кимни къыдырасынъ? — деди Иса онъа. Мерьем Оны багъчаджы белледи. Онъа: — Эфенди, эгер сен Оны алып кеткен олсанъ, къаерге къойгъанынъны манъа айт, мен Оны барып алайым, — деди.

¹⁶Иса онъа: — Мерьем! — деди. Мерьем айланып, еудий тилинде: — Раввуни! — деди. (Демек, «Оджам».)

¹⁷— Манъа тийме! — деди Иса Мерьемге. — Мен даа Бабамнынъ янына котерильмедим. Бар да агъа-къардашларыма шойле айт: «Мен Озь Бабама ве сизинъ Бабанъызгъа, Меним Аллама ве сизинъ Алланъызгъа котерилем».

¹⁸О вакъыт магдалалы Мерьем шегиртлерге барып: — Мен Раббини корьдим! — деди, Иса онъа нелер айткъаныны да икяе этти.

¹⁹Шу кунюнинъ акъшамында, афтанынъ биринджи кунюнде шегиртлер, эвнинъ къапуларыны къапатып отура эдилер, чюнки олар еудий башлыкъларындан къоркъа эди. О вакъыт Иса пейда олды. Оларнынъ ортасында турып, о оларгъа: — Селям алейкум! — деди.

²⁰Буны айтып, оларгъа къолларыны ве багърыны косьтерди. Шегиртлер Раббини корип, пек севиндилер.

²¹Иса оларгъа кене: — Селям алейкум! Бабам Мени ёллагъан киби, Мен де сизни ойле ёллайым, — деди.

²²Шойле деп, оларнынъ устюне уфюрди ве: — Мукъаддес Рухны алынъыз, — деди.

²³— Кимнинъ гуналарыны багъышласанъыз, олар багъышлангъан олур. Кимнинъ гуналарыны багъышламасанъыз, олар багъышланмагъан къалыр.

²⁴Он эки шегиртинден бири, «Эгиз» адландырылгъан Тома, Иса кельген вакъытта, о ерде шегиртлернинъ арасында ёкъ эди.

²⁵Башкъа шегиртлер онъа: — Биз Раббини корьдик, — дедилер. Тома оларгъа шойле деди: — Мен Онынъ къолларындаки мых яраларыны корьмегенимдже, Онынъ мых яраларына озь пармагъымны тийдирмегенимдже, къолумны Онынъ багърына къоймагъанымдже, инанмайым.

²⁶Секиз куньден сонъ Исанынъ шегиртлери кене эвде топлаштылар. Тома да оларнен берабер эди. Къапулары къапалы олгъан олса да, Иса кельди ве оларнынъ ортасында турып: — Селям алейкум! — деди.

²⁷Сонъ Томагъа бакъып: — Пармагъынъны мында къой, Меним къолларыма бакъ. Къолунъны узат да, багърыма оны къой. Энди имансыз олма, иманлы ол! — деди.

²⁸Тома Исагъа: — Меним Раббим ве меним Аллам! — деп джевап берди.

²⁹Иса онъа шойле деди: — Сен Мени корьгенинъ ичюн инандынъ. Корьмейип инанаджакълар не къадар бахтлылар!

³⁰Иса шегиртлерининъ огюнде даа чокъ башкъа, бу китапта язылмагъан бельгилер косьтерди.

³¹Шу исе, сиз Иса — Месих, Алланынъ Огълу олгъанына инанынъыз деп ве инанып, Онынъ адындан аятны алынъыз деп язылгъандыр.