Read Мукъаддес Китап къырымтатар тилинде, Юхан 21 Bible Online

Юхан 21 - Мукъаддес Китап къырымтатар тилинде, bible

Юхан 21

¹Бундан сонъ Иса шегиртлерине Тиберия голю ялысында кене Озюни косьтерди. Озюни бойле косьтерди:

²Симон Пётр, «Эгиз» адландырылгъан Тома, Галилеянынъ Кана шеэринден олгъан Натанель, Зебедайнынъ огъуллары ве башкъа эки шегирт бир ерде эдилер.

³Симон Пётр башкъаларына: — Мен балыкъ тутмагъа кетем, — деди. — Биз де сеннен берабер барайыкъ, — деди олар. Сонъ барып, олар къайыкъкъа миндилер. Лякин шу геджеси ич бир шей тутмадылар.

⁴Кунь догъгъанда, Иса ялыда тура эди. Шегиртлер исе Онынъ Иса олгъаныны анъламадылар.

⁵— Достлар, сиз балыкъ тутмадынъызмы? — деп сорады Иса олардан. — Ёкъ, — деди олар.

⁶— Балыкъ сачманъызны къайыкънынъ онъ тарафындан ташланъыз, тутарсыз, — деди Иса. Олар сачманы ташладылар ве, балыкъ о къадар чокъ олгъанындан, оны чыкъарып оламадылар.

⁷О вакъыт Исанынъ севимли шегирти: — О, Раббидир! — деди Пётргъа. Симон Пётр Онынъ Рабби олгъаныны эшиткенинен, эвельден чыкъарып ташлагъан усть урбасыны кийди де, озюни гольге атты.

⁸Башкъа шегиртлер исе балыкъкъа толу сачманы чекип, къайыкъта кельдилер. Олар ялыгъа якъын, къарарнен 100 метр [21] авлакъта эдилер.

⁹Ялыгъа чыкъкъанларында, янгъан комюрнинъ устюнде къавурылгъан балыкъны ве янында тургъан отьмекни корьдилер.

¹⁰Иса оларгъа: — Сиз шимди бир къач туткъан балыкъларынъызны кетиринъиз, — деди.

¹¹Симон Пётр барып, сачманы ялыгъа чекип чыкъарды. Онынъ ичинде 153 дане балабан балыкъ бар эди. Балыкълар чокъ олгъанына бакъмадан, сачма йыртылмагъан.

¹²Иса шегиртлерине: — Айдынъыз, сабалыкъ ашанъыз, — деди. Олардан ич бирининъ: «Сен кимсинъ?» — деп сорамагъа джесарети олмады, чюнки Онынъ Рабби олгъаныны бильдилер.

¹³Иса якъынджа келип, отьмекни алды ве оларгъа берди. Балыкъны да шойле болип берди.

¹⁴Бойледже, Иса, олюлерден тирильген сонъ, учюнджи кере шегиртлерине корюнди.

¹⁵Сабалыкъ ашагъан сонъ, Иса Симон Пётрдан сорай: — Юхан огълу Симон, сенинъ Манъа олгъан севгинъ буларнынъ севгисинден зиядеми? — Эбет, Рабби! Мен Сени севгенимни Озюнъ билесинъ де, — дей Онъа Пётр. — Къозуларымны ашат, — дей онъа Иса.

¹⁶Экинджи кере Иса Пётрдан кене сорай: — Юхан огълу Симон, сен Мени севесинъми? — Эбет, Рабби! Сени севгенимни Озюнъ билесинъ де, — дей Пётр Онъа. — Къойларымны бакъ, — дей онъа Иса.

¹⁷Сонъ учюнджи кере Пётрдан сорай: — Юхан огълу Симон, сен Мени севесинъми? Озюнден учюнджи кере: «Мени севесинъми?» деп сорагъанына Пётрнынъ джаны агъырды. — Рабби! Сен эр шейни билесинъ, мен Сени севгенимни де билесинъ, — дей Пётр. Иса онъа шойле дей: — Къойларымны ашат!

¹⁸Санъа керчектен догърусыны айтам: яш олгъан вакътынъда къушагъынъны озюнъ багълап, истеген ерге бара эдинъ. Лякин къартайгъан вакътынъда исе къолларынъны узатаджакъсынъ ве башкъа бириси санъа къушакъны багълап, сени истемеген ерге алып бараджакъ.

¹⁹Иса бу сёзлерни, Пётр насыл олюмнен олип, Алланы шерефлейджегини бильдирмек ичюн, айткъан эди. Сонъ онъа: — Меним артымдан юр! — деди.

²⁰Пётр айланып, Исанынъ севимли шегирти оларнынъ пешинден кельгенини корьди. Эвельден бу шегирт акъшамлыкъ ашагъанда, Исанынъ кокрегине башыны къойып: «Рабби, Сени ким сатаджакъ?» — деп сорагъан эди.

²¹Пётр оны корип, Исадан: — Рабби, онъа не оладжакъ? — деп сорады.

²²Иса онъа: — Эгер Мен кене кельгенимдже онынъ яшагъаныны истесем, сенинъ ишинъ не? Сен Меним артымдан юре бер, — деди.

²³Бойледже, иманлылар арасында бу шегирт ольмейджек, деген лаф даркъалды. Амма Иса онынъ ольмейджегини айтмады. О, тек: «Эгер Мен кене кельгенимдже онынъ яшагъаныны истесем, сенинъ ишинъ не?» — деген эди.

²⁴Мына бу шегирт бу ишлернинъ эписине шаатлыкъ эте ве оларны язып алды. Онынъ шаатлыгъы акъикъат олгъаныны билемиз.

²⁵Иса япкъан даа чокъ ишлер бар. Олар бирер-бирер язылгъан олса, фикиримдже, язылгъан китаплар бутюн дюньягъа биле сыгъмаз эди.