Read Мукъаддес Китап къырымтатар тилинде, Юхан 3 Bible Online

Юхан 3 - Мукъаддес Китап къырымтатар тилинде, bible

Юхан 3

¹Еудий башлыкъларындан Никодим адлы бир ферисе бар эди.

²Бу адам бир геджеде Исанынъ алдына келип, Онъа: — Равви! Сен Алладан кельген бир оджа олгъанынъны биз билемиз, чюнки ич кимсе, эгер Алла онен олмаса, Сен косьтерген бельгилерни япалмаз, — деди.

³Иса онъа шойле джевап берди: — Санъа керчектен догърусыны айтам: эгер ким юкъарыдан догъмаса [4], Алланынъ Падишалыгъыны корип оламаз.

⁴— Къарт адам насыл янъыдан догъаджакъ? Анасынынъ къурсагъына экинджи кере кирип догъаджакъмы? — деп сорай Никодим.

⁵Иса джевап берип: — Санъа керчектен догърусыны айтам: эгер ким сувдан ве Рухтан догъмаса, Алланынъ Падишалыгъына кирип оламаз, — дей.

⁶— Беденден догъгъан бедендир, Рухтан догъгъан исе Рухтыр.

⁷«Сизлер юкъарыдан догъмакъ керексиз», дегениме шашма.

⁸Ель [5] истеген еринде эсе. Онынъ давушыны эшитсенъ де, къайсы тарафтан келип, къайсы тарафкъа кетеджегини бильмейсинъ. Рухтан догъгъан эр бир адам да бойледир, — деди.

⁹— Бу шей насыл олмакъ мумкюн? — деп сорай Никодим.

¹⁰Иса онъа джевап берип: — Сен Исраильнинъ оджасы олып, буны бильмейсинъми?

¹¹Санъа керчектен догърусыны айтам: биз бильгенимизни айтамыз, корьгенимиз акъкъында шаатлыкъ этемиз. Лякин сиз бизим шаатлыгъымызны къабул этмейсиз.

¹²Эгер сиз ердеки шейлер акъкъында айткъаныма инанмасанъыз, коктеки шейлер акъкъында айткъаныма насыл инанаджакъсыз? — дей.

¹³— Ич бир кимсе коктен тюшмеген ве кокке чыкъмагъан, тек Инсан Огълу.

¹⁴Муса сахрада йыланны юкъарыгъа насыл котерген олса [6], Инсан Огълуны да юкъарыгъа бойле котереджеклер,

¹⁵ве сонъунда Онъа инангъан эр бир адам гъайып олмайджакъ, лякин эбедий омюрни аладжакъ.

¹⁶Чюнки Алла дюньяны ойле севди ки, Озюнинъ бирден-бир Огълуны берди, Онъа инангъан эр бир адам гъайып олмасын, лякин эбедий омюрни алсын.

¹⁷Алла Огълуны, дюньяны суд этмек ичюн дегиль, лякин дюнья Онынъ ярдымынен къуртулсын деп, ёллады.

¹⁸Онъа иман эткен адам суд этильмейджек. Иман этмеген адам исе энди суд этильген эди, чюнки о, Алланынъ бирден-бир Огълунынъ адына иман этмеген.

¹⁹Мына бу суд: дюньягъа ярыкъ кельген олса да, адамлар къаранлыкъны ярыкътан зияде севдилер, чюнки оларнынъ япкъан ишлери яманлыкъ эди.

²⁰Ким ярамайлыкъ япып юрсе, ярыкътан нефретлене, ве, яман ишлери ачыкъ олмасын деп, ярыкъкъа якъынлашмай.

²¹Акъикъатнен яшагъан эр ким исе, ишлери белли олсун деп, ярыкъкъа якъынлаша, чюнки олар Алланынъ истегине коре япылгъан эдилер.

²²Бундан сонъ Иса шегиртлеринен берабер Еудие мемлекетине кетти. О ерде оларнен къала ве адамларны сувгъа батырып чыкъара эди.

²³Ягъя да Салим якъынларында олгъан Айнон деген ерде халкъны сувгъа батырып чыкъара эди, чюнки о ерде сув чокъ эди. Адамлар Ягъягъа келе, о исе оларны сувгъа батырып чыкъара эди.

²⁴Ягъя о вакъыт даа зиндангъа ташланмагъан эди.

²⁵Бир кунь Ягъянынъ шегиртлери бир еудийнен элялланув адетлери акъкъында давалаша башлады.

²⁶Олар Ягъянынъ алдына барып: — Равви! Шу адам, О сеннен берабер Иордан озенининъ башкъа тарафында олгъан; сен О акъкъында шаатлыкъ бергенсинъ. Шимди О да халкъны сувгъа батырып чыкъара, эр кес де Онъа бара, — дедилер.

²⁷Ягъя джевап берип: — Эгер коктен берильмесе, адам ич бир шей алып оламай.

²⁸«Мен Месих дегилим, тек Онынъ огюнден ёлланылгъаным», — дегениме озюнъиз шаатсыз.

²⁹Келинни аладжакъ адам — киевдир. Лякин киевнинъ янында тургъан ве оны динълеген досту киевнинъ сесини эшитип пек къувана. Мен де бойле бутюнлей къуванам.

³⁰О менден буюк олмакъ, манъа исе Ондан уфакъ олмакъ керек.

³¹Юкъарыдан кельген эр кестен устюндир. Ерден пейда олгъан ерге аиттир ве ерден лаф эте. Коктен кельген исе эр кестен устюндир.

³²О, корьгени ве эшиткени акъкъында шаатлыкъ япа, амма ич кимсе Онынъ шаатлыгъыны къабул этмей.

³³Онынъ шаатлыгъыны къабул эткен адам исе Алланынъ акълыгъыны тасдыкълай.

³⁴Алла ёллагъан адам Алланынъ сёзлерини айта, чюнки Алла Озь Рухуны аджымайып бере.

³⁵Баба Огълуны севе, О, эр шейни Онынъ къолуна берди.

³⁶Алланынъ Огълуна иман эткен адам эбедий омюрге саиптир. Огъулнынъ сёзюни тутмагъан адам исе омюрни корьмейджек, лякин Алланынъ гъазабы астында къала, — деди.