Read Мукъаддес Китап къырымтатар тилинде, Юхан 5 Bible Online

Юхан 5 - Мукъаддес Китап къырымтатар тилинде, bible

Юхан 5

¹Бундан сонъ еудийлернинъ бир байрамы олды, ве Иса Ерусалимге барды.

²Ерусалимнинъ Къойлар Къапусы янында еудийдже Бетзата деген беш софалы бир хавуз бар эди.

³[3-4] Бу софаларда пек чокъ хаста, кёр, топал ве паралич ургъан адамлар ята эдилер [7].

⁵Бу ерде 38 йыл девамында хаста олып яткъан бир адам бар эди.

⁶Иса онынъ яткъаныны корьди, чокъ вакъыттан берли хаста олгъаныны бильди де, ондан: — Сагъ олмагъа истейсинъми? — деп сорады.

⁷Хаста Исагъа джевап берип: — Эфендим! Сув чалкъангъанда, мени хавузгъа тюшюрген адам ёкъ. Мен баргъандже, башкъасы менден эвель тюше, — деди.

⁸— Еринъден тур, тёшегинъни алып бар! — деди Иса хастагъа.

⁹О исе, шу ань сагъ олды. Тёшегини алып, юрип кетти. О кунь раатлыкъ куню эди.

¹⁰Шунынъ ичюн еудийлер сагъ олгъан адамгъа: — Бугунь раатлыкъ куню. Санъа тёшегинъни алып кетирмеге мумкюн дегиль! — дедилер.

¹¹— Мени тедавийлеген адам манъа: «Тёшегинъни алып бар», деди, — джевап берди о адам.

¹²— «Тёшегинъни алып бар», деген адам ким? — деп сорадылар олар ондан.

¹³Сагъ олгъан адам исе Онынъ ким олгъаныны бильмей эди. О ерде халкъ чокълугъы себебинден Иса андан кимсеге дуйдурмайып кеткен эди.

¹⁴Сонъ Иса о адамны Алланынъ Сарайында тапты. — Мына, сен сагъ олдынъ. Энди гуна япма, ёкъса санъа даа да бетер шей оладжакъ, — деди онъа.

¹⁵Бу адам барып, оны тедавийлеген Иса олгъаныны еудийлерге бильдирди.

¹⁶Бунынъ ичюн еудийлер Исаны къувалап башладылар, чюнки О, бойле ишлерни раатлыкъ кунюнде япа эди.

¹⁷Амма Иса оларгъа шойле деди: — Меним Бабам шимдигедже чалышмакъта, Мен де чалышмакътам, — деди.

¹⁸Шунынъ ичюн еудийлер Исаны ольдюрмек ичюн, даа чокъ арекет эттилер. Чюнки О, раатлыкъ кунюни бозгъанындан гъайры Аллагъа «Бабам» дей эди, шунынънен Озюнинъ Аллагъа тенъ олгъаныны косьтере эди.

¹⁹Иса оларгъа къаршы чыкъып, шай деди: — Сизге керчектен догърусыны айтам: Огъул Бабасынынъ япкъан ишлерини корьмегендже, Озю ич бир шей япалмаз. Бабасы не япса, Огълу да тамам шу шейлерни япа.

²⁰Чюнки Баба Огълуны севе ве Озю япкъан эр шейни Огълуна косьтере. О, сизни шашыртып, бундан да буюк шейлерни косьтереджек.

²¹Баба насыл этип олюлерни тирильтсе ве оларгъа аят берсе, Огъул да кимни истесе, оны тирильте.

²²Баба ич кимсени суд этмей, лякин суд этмеге акъкъыны бутюнлей Огълуна берди.

²³Шунынъ ичюн, эр кес Бабаны урьмет эткени киби, Огълуны да ойле урьмет этсинлер. Огъулны урьмет этмеген адам Оны ёллагъан Бабаны да урьмет этмей.

²⁴Сизге керчектен догърусыны айтам: Меним сёзлеримни динълеген ве Мени Ёллагъангъа иман эткен адам эбедий аятны ала. О, суд этильмейджек, лякин энди олюмден аяткъа кечкендир.

²⁵Сизге керчектен догърусыны айтам: ойле заман келеята ве энди кельди ки, олюлер Алла Огълунынъ сесини эшитеджек ве Онынъ сесини эшиткенлер тири оладжакълар.

²⁶Чюнки Алланынъ Озю аят чокърагъы олгъаны киби, Огълуна да аят чокърагъы олмагъа ёл берди.

²⁷Баба суд этмек акъкъыны да Огълуна берген, чюнки О — Инсан Огълудыр.

²⁸Бунъа шашманъыз, чюнки ойле заман келеята ки, мезарлыкъта олгъанларнынъ эписи Онынъ сесини эшитеджек

²⁹ве тышарыгъа чыкъаджакълар. Яхшылыкъ япкъанлар тирилип, эбедий омюрни аладжакълар, ярамайлыкъ япкъанлар исе тирилип, судкъа кетеджеклер.

³⁰Мен Озь-Озюмден ич бир шей япып оламайым. Насыл эшитсем, ойле суд этем ве Меним судым адалетлидир. Чюнки Мен Озь ирадемни дегиль, Мени Ёллагъаннынъ ирадесини беджермеге истейим.

³¹Эгер Озюм акъкъымда Мен Озюм шаатлыкъ япсам, шаатлыгъым керчек дегиль.

³²Меним акъкъымда шаатлыкъ япкъан башкъасы бар ве билем ки, Онынъ Меним акъкъымда шаатлыгъы керчектир.

³³Сиз Ягъянынъ алдына адам ёлладынъыз, ве о акъикъаткъа шаатлыкъ этти.

³⁴Мен Озюм инсанларнынъ шаатлыгъыны къабул этмейим, лякин сиз буны эшитип къуртулсын деп, Мен буны айтам.

³⁵Ягъя — къандиль, о, яна ве нур сача эди. Сиз исе онынъ ярыгъында аз олса да, къуванмакъ истединъиз.

³⁶Амма Менде Ягъя япкъан шаатлыкътан даа буюк шаатлыкъ бар. Чюнки Бабам Манъа беджермек ичюн берген ишлерини Мен бугунь япаятам. Шу ишлернинъ озьлери Меним акъкъымда, Мени Бабам ёллагъанына шаатлыкъ этелер.

³⁷Мени ёллагъан Бабамнынъ Озю де Меним акъкъымда шаатлыкъ эткендир. Сиз Онынъ сесини ич бир вакъыт эшитмединъиз, къыяфетини де корьмединъиз.

³⁸Онынъ Сёзю де юрегинъизде яшамай, чюнки О ёллагъан Инсангъа инанмайсыз.

³⁹Сиз Мукъаддес Языларны дикъкъатнен огренесиз, чюнки оларнынъ ярдымынен эбедий аятны алмагъа тюшюнесиз. Бу Язылар исе Меним акъкъымда шаатлыкъ этелер.

⁴⁰Амма сиз эбедий аятны алмакъ ичюн Манъа кельмеге истемейсиз.

⁴¹Мен адамлардан шерефни къабул этмейим.

⁴²Лякин сизни билем: юреклеринъизде Аллагъа севги ёкъ.

⁴³Мен Бабамнынъ адындан кельдим, лякин сиз Мени къабул этмейсиз. Озь адындан келеджек башкъасыны къабул этерсиз.

⁴⁴Сиз бир-биринъизден шереф алмагъа бегенесиз, лякин бирден-бир Алланынъ шерефини къазанмагъа арекет этмейсиз. Шу алда насыл этип иман этеджексиз?

⁴⁵Мен сизни Бабамнынъ алдында къабаатларым, деп тюшюнменъиз. Сиз Мусагъа умют этесиз, ве о озю сизни къабаатлайджакъ.

⁴⁶Эгер Мусагъа инангъан олсанъыз, Манъа да инаныр эдинъиз, чюнки о Меним акъкъымда язгъан эди.

⁴⁷Мусанынъ язгъанларына инанмасанъыз, Меним сёзлериме насыл инанаджакъсыз?