Read Мукъаддес Китап къырымтатар тилинде, Юхан 7 Bible Online

Юхан 7 - Мукъаддес Китап къырымтатар тилинде, bible

Юхан 7

¹Бундан сонъ Иса Галилея топрагъында юре эди. Иса Еудие топрагъына бармагъа истемей эди, чюнки еудийлер Оны ольдюрмеге чаресини къыдыра эдилер.

²Еудийлернинъ Чалаш Байрамы якъынлаша эди.

³Исанынъ къардашлары Онъа: — Бу ерден чыкъып, Еудиеге бар, шегиртлеринъ япкъан ишлеринъни корьсюнлер.

⁴Белли олмагъа истеген ич бир адам гизли ишлер япып юрмей! Сен бу ишлерни япсанъ, Озюнъни дюньягъа косьтер, — дедилер.

⁵Къардашлары биле Онъа инанмай эдилер.

⁶Иса оларгъа шойле деди: — Меним вакътым даа кельмеди. Лякин сиз ичюн эр вакъыт келише.

⁷Дюнья сизден нефретленип оламай, лякин Мени кореджек козю ёкъ. Чюнки Мен онъа къаршы ве онынъ ишлери яман олгъанына шаатлыкъ этем.

⁸Сиз озюнъиз байрамгъа барынъыз. Мен шимди бу байрамгъа бармайджам, чюнки Меним вакътым даа кельмеди.

⁹Шу сёзлерни айтып, Иса Галилеяда къалды.

¹⁰Исанынъ къардашлары байрамгъа кеткен сонъ, О, Озю де анда барды. Амма ачыкъ дегиль, гизленип барды.

¹¹Еудий башлыкълары байрамда Исаны къыдыра эдилер ве: «О адам къайда?» — деп сораштыра эдилер.

¹²Халкъ арасында Иса акъкъында чокъ мырылдагъанлар бар эди. Базылары: «О, яхшы адам», — дей эдилер, башкъалары: «Ёкъ! О, халкъны ёлдан ура», — дей эдилер.

¹³Лякин еудий башлыкъларындан къоркъкъанлары ичюн, О акъкъында ич кимсе ачыкъ лаф этмей эди.

¹⁴Байрамнынъ ярысы кечкенде, Иса Алланынъ Сарайы азбарына кирип, халкъны огретмеге башлады.

¹⁵О вакъыт еудийлернинъ башлыкълары: — Бу адам бир ерде окъумагъан олса, Мукъаддес Языларны о къадар яхшы къайдан бильди? — деп, шаша эдилер. Иса оларгъа джевап берип, шойле деди:

¹⁶— Мен огреткен шейлерим Меним дегиль, лякин Мени Ёллагъанындандыр.

¹⁷Ким Онынъ ирадесини беджермеге истесе, бу огретюв Алладанмы, я да Мен Озюмден айткъанымны, биледжектир.

¹⁸Ким озь адындан лаф этсе, озюне шурет истей. Ким Оны Ёллагъангъа шурет истесе, О, акъикъийдир, ве Онынъ юрегинде инсафсызлыкъ ёкъ.

¹⁹Муса сизге Къанунны бермедими? Лякин ич биринъиз Къанунны беджерип яшамай. Не ичюн Мени ольдюрмеге чаресини къыдырасыз?

²⁰— Сени джин ургъан! Ким Сени ольдюрмеге чаресини къыдыра? — деди халкъ.

²¹Иса исе Озь лафыны девам этип: — Мен бир аджайип иш яптым, эпинъиз бунъа шаштынъыз.

²²Муса сизге сюннет адетини берген, сиз исе раатлыкъ кунюнде огълан баланы сюннет этесиз. (Сюннет аслы Мусадан дегиль, баба-деделерден къалгъан адеттир.)

²³Мусанынъ Къануны бозулмасын деп, раатлыкъ куню огълан бала сюннет этильсе, не ичюн Манъа, раатлыкъ куню адамны бутюнлей тедавийлегеним ичюн ачувланасыз?

²⁴Корюнюшине коре суд этменъиз, лякин адалетли суд этинъиз, — деди.

²⁵О вакъыт базы ерусалимлилер айтып башладылар: — Олар ольдюрмеге чаресини къыдыраяткъан адам бу дегильми?

²⁶Мына О, ачыкътан-ачыкъ лаф эте, ве Онъа къаршы ич кимсе ич бир шей айтмай. Бельки башлыкълар Онынъ акъикъий Месих олгъаныны бильгендирлер?

²⁷Амма, Онынъ къаерден олгъаныны эпимиз билемиз. Месих кельгенде исе, Онынъ къаерден олгъаныны ич кимсе бильмейджек.

²⁸Сонъ Сарай азбарында огреткен Иса къычырды: — Сиз Мени де, къаерден олгъанымны да билесиз! Лякин Мен Озь-Озюмден кельмедим. Мени Ёллагъан акъикъийдир, лякин сиз Оны бильмейсиз.

²⁹Мен исе Оны билем, чюнки Мен Онынъ алдындан кельдим, Мени О ёллагъан.

³⁰Сонъ Исаны якъаламагъа истедилер. Амма ич кимсе Онъа тиймеди, чюнки Онынъ вакъты даа кельмеген эди.

³¹Халкънынъ чокъусы исе Онъа иман этти. Олар: — Месих кельгенде, бу адам косьтерген бельгилерден чокъча бельги косьтермез экенми? — дей эдилер.

³²Фериселер Иса акъкъында халкънынъ мырылдагъаныны эшитти. Баш руханийлер ве фериселер Исаны якъаламакъ ичюн Сарай аскерлерини [10] ёлладылар.

³³Иса оларгъа: — Мен сизнен чокъ вакъыт олмайджам. Мени Ёллагъаннынъ янына къайтып бараджам.

³⁴Сиз Мени къыдыраджакъсыз, лякин тапып оламайджакъсыз. Мен оладжакъ ерге де барып оламайджакъсыз, — деди.

³⁵О вакъыт еудийлер: — О къайда бараджакъ экен де, биз Оны тапалмайджакъмыз? — дедилер озьара. — Бельки О, юнанлар арасында даркъалып кеткен еудийлерге барып, юнанларны огретмеге истейдир?

³⁶«Сиз Мени къыдыраджакъсыз, лякин тапып оламайджакъсыз. Мен оладжакъ ерге де барып оламайджакъсыз», деген сёзлерининъ манасы недир?

³⁷Байрамнынъ сонъки, энъ улу кунюнде Иса турды да, къычырып: — Ким сувсагъан олса, Манъа келип ичсин.

³⁸Манъа иман эткеннинъ ичинден, Языда айтылгъаны киби, «Онынъ ичинден тири сув озенлер олып акъаджакъ», — деди.

³⁹Иса буны Мукъаддес Рух акъкъында айтты. Исагъа иман эткенлер Рухны якъын арада аладжакъ эдилер. О вакъыт Рух даа берильмеген эди, чюнки Иса даа шуретини алмагъан эди.

⁴⁰Халкъ арасындан базылары бу сёзлерни эшитип: — Акъикъатен, бу адам — анавы Пейгъамбердир, — дедилер.

⁴¹Башкъалары: — Бу Месих, — дегенде, даа башкъалары: — Месих Галилеядан келип олурмы?

⁴²Языда, Месих Давутнынъ союндан, О, Давутнынъ юрту — Вифлеемден чыкъып келеджек, деп язылмагъанмы? — дедилер.

⁴³Бойлеликнен, Иса ичюн халкъ арасында къавгъа чыкъты.

⁴⁴Базылары Оны якъаламагъа истедилер, амма ич кимсе Онъа къол котермеди.

⁴⁵О вакъыт Сарай аскерлери руханийлер ве фериселернинъ алдына къайтып кельдилер. — Сиз не ичюн Оны алып кельмединъиз? — деп сорадылар.

⁴⁶— Ич бир вакъыт ич кимсе бу Адам киби лаф этмеген! — деди аскерлер.

⁴⁷— О, сизни де ёлдан ургъан! — деди фериселер.

⁴⁸— Башлыкълар я да фериселерден бириси Онъа иман эткенми?

⁴⁹Лякин Къанунны бильмеген бу адам сюрюси лянет олсун!

⁵⁰Фериселерден бири Никодим, эвель Исагъа кельген адам, оларгъа шай деди:

⁵¹— Къанунымызгъа коре, башта адамны эшитмек ве онынъ ишини бильмек, сонъ исе оны суд этмек керек.

⁵²— Я сен де Галилеядан оласынъмы? Яхшы тюшюнип бакъ, Галилеядан Пейгъамбер чыкъмайджагъыны биледжексинъ, — дедилер онъа.

⁵³Бундан сонъ эписи эв-эвлерине даркъалып кеттилер.