Read Мукъаддес Китап къырымтатар тилинде, Фаалиет 1 Bible Online

Фаалиет 1 - Мукъаддес Китап къырымтатар тилинде, bible

Фаалиет 1

¹[1-2] Эй Теофил! Иса баштан, кокке котерильген кунюне къадар, насыл шейлер япкъаны ве огреткени акъкъында мен биринджи китапта яздым. Кокке котерильмезден эвель, О, Озю сайлагъан эльчилерине Мукъаддес Рухнынъ ярдымынен эмирлер берген эди.

³Азаплар чеккен сонъ исе, Озю тири олгъанына чокъ исбатлар косьтерип, Иса къыркъ кунь девамында эльчилери огюнде пейда олып турды ве оларнен Алланынъ Падишалыгъы акъкъында лаф этти.

⁴Куньлернинъ биринде, олар берабер аш ашагъанда, Иса бойле эмир этти: — Ерусалимден кетменъиз. Амма Баба сёз берген шейни бекленъиз. Мен оны сизге эвель айттым.

⁵Ягъя адамларны сувгъа батырып чыкъара эди, сиз исе бир къач куньден Мукъаддес Рухкъа батырыладжакъсыз.

⁶Сонъ анда топлашкъанлар Ондан: — Рабби, Исраильге падишалыкъны энди къайтараджакъсынъмы? — деп сорадылар.

⁷Иса оларгъа: — Бабамнынъ Озь акимиетинен бельгилеген заманны ве вакътыны сизге бильмеге керекмей.

⁸Амма Мукъаддес Рух устюнъизге тюшкен сонъ, сиз кучь-къувет аладжакъсыз ве Ерусалимде, бутюн Еудиеде эм Самариеде ве дюньянынъ кенарынадже Меним шаатларым оладжакъсыз, — деди.

⁹Бу сёзлерден сонъ, Иса эльчилернинъ козю огюнде кокке котериле башлады ве булут ичинде гъайып олды.

¹⁰Эльчилер Иса котерильген сонъ бакъып тургъанда, апансыздан оглеринде беяз урба кийген эки адам пейда олды.

¹¹Олар: — Эй, Галилея акъайлары! Кокке не тикилип къалдынъыз? Сизден кокке алынгъан Иса, козь огюнъизде кокке котерильгени киби, къайтып келеджек, — дедилер.

¹²Бундан сонъ эльчилер Зейтюн дагъындан тюшип, Ерусалимге къайтып кельдилер. Бу дагъ Ерусалимден бир километрге [1] якъын месафеде эди.

¹³Олар шеэрге кирип, яшагъан эвине бардылар ве экинджи къаткъа чыкътылар. Булар Пётр, Якъуп, Юхан ве Андрей, Филип ве Тома, Бартоломай ве Матта, Алфей огълу Якъуп, Ветанпервер Симон ве Якъуп огълу Иуда.

¹⁴Оларнынъ эписи апайларынен, Исанынъ анасы Мерьемнен эм де Исанынъ къардашларынен берабер токътамайып бир юрекнен дува окъуй эдилер.

¹⁵Шу куньлерде юз йигирмиге якъын дин къардашларынынъ топлашувы алдында Пётр аякъкъа турды да, сёзге чыкъып:

¹⁶[16-17] — Дин къардашларымыз! Мукъаддес Рухнынъ Иуда акъкъында Давутнен эвельден берильген Язынынъ хабери беджерильмек керек эди. Бу Иуда биримиз олып, бизнен берабер хызмет этмеге къысметни алды. Амма сонъ Исаны якъалагъанларгъа ёл косьтерди. (

¹⁸О, адалетсизликнен къазанылгъан парасына бир тарла сатын алды ве шу ерге ойле йыкъылды ки, тап къурсагъы ярылып, эписи ичеклери чыкъып кетти.

¹⁹Буны Ерусалимде яшагъанлар эписи бильди, ве о ер халкънынъ тилинде «Акелдама», я да «къан тарласы», деп адландырылды.)

²⁰Зебур Китабында: «Онынъ эви бош олып къалсын, анда яшагъанлар ёкъ олсун» ве «Онынъ ерини башкъасы алсын», — деп язылгъан.

²¹[21-22] Бойледже, бизлернен берабер Исанынъ тирильгенине шаат олмакъ ичюн, Рабби Иса арамызда яшагъан ве бизнен олгъан бутюн вакъытта, тап Ягъя адамларны сувгъа батырып чыкъаргъан замандан башлап, кокке алынгъан куньге къадар бизлернен берабер юрген адамлардан бири бизге къошулмакъ керек, — деди.

²³Шунъа коре эки адамны: Юст адыны ташыгъан ве Барсабба адландырылгъан Юсуфны, эм де Маттияны теклиф эттилер.

²⁴[24-25] Сонъ дува окъуп: — Эй, эписи адамларнынъ юреклерини бильген Рабби! Иуда, озь ерине бармакъ ичюн, бу хызметни ве эльчилигини ташлагъаны себебинден, бу къысметни алмакъ ичюн, эки адамдан къайсыны сайладынъ, оны косьтер! — дедилер.

²⁶Сонъ олар ичюн джереп чектилер. Къысмет Маттиянынъ тарафында эди, ве о, он бир эльчиге къошулды.