Read Мукъаддес Китап къырымтатар тилинде, Фаалиет 11 Bible Online

Фаалиет 11 - Мукъаддес Китап къырымтатар тилинде, bible

Фаалиет 11

¹Башкъа халкълар да Алланынъ Сёзюни къабул эттилер, деген хабер эльчилернинъ ве Еудиедеки дин къардашларнынъ къулагъына барып етти.

²Шу себептен, Пётр Ерусалим шеэрине баргъанда, сюннет этильгенлернинъ базылары онъа къаршы чыкъып:

³— Сен сюннет япылмагъан адамларнынъ арасына кирип, оларнен ашап-ичкенсинъ! — дедилер.

⁴Пётр исе олып кечкен шейлерни башындан башлап оларгъа айтып берди:

⁵— Мен Яффа шеэринде дува окъугъан вакъытта рухланып бир руя корьдим: манъа, балабан чаршафкъа ошагъан бир шей дёрт кошесинден асылгъан алда коктен тюшип, тап огюме келеяткъан экен.

⁶Онынъ ичине бир козь ташласам, ер юзюнинъ дёрт аякълы ве йыртыджы айванларны ве сюйрекленген махлюкъларны, эм де кокте учкъан къушларны корьдим.

⁷О вакъыт: «Пётр, тур да, сой ве аша!» — деген бир сес эшиттим.

⁸Мен исе: «Ёкъ, асла, Раббим! Меним агъзыма ич бир вакъыт кирли я да арам шей кирмеди», — дедим.

⁹Сес экинджи кере коктен эшитилип: «Алла эляллагъаныны арам сайма», — деди манъа.

¹⁰Бу шей учь кере текрарланды. Сонъ эписи кене кокке котерильди.

¹¹Мына, шу дакъкъада Кайсареядан манъа ёллангъан учь адам мен яшагъан эвнинъ огюнде токътадылар.

¹²Рух исе манъа, ич шубеленмейип оларнен берабер кетмеге буюрды. Бойлеликнен, бу алты дин къардашлар да меним артымдан кеттилер. Оларнен берабер о адамнынъ эвине кельдик.

¹³О исе эвинде пейда олгъан мелекни насыл корьгенини бизлерге айтып берди. Мелек онъа: «Яффагъа адамларны ёлла, Пётр адыны ташыгъан Симонны чагъырт.

¹⁴О санъа айтаджакъ сёзлеринден озюнънен берабер бутюн эвдекилеринъ де къуртарыладжакълар», — деди.

¹⁵Мен лафымны башлагъанымнен, эвель бизим устюмизге тюшкен Мукъаддес Рух оларнынъ устюне де тюшти.

¹⁶О вакъыт мен Раббимиз Исанынъ: «Ягъя адамларны сувгъа батырып чыкъаргъан, сизлер исе Мукъаддес Рухкъа батырыладжакъсынъыз», — деген сёзюни эсиме кетирдим.

¹⁷Бизге, Рабби олгъан Иса Месихке инангъанларгъа Алла бахшыш берген. Эгер Алла мына буларгъа да бу бахшышны берген олса, мен Аллагъа къаршы чыкъмакъ ичюн ким олам?

¹⁸Бу сёзлерни эшитип, олар тынчландылар. Олар: — Алла башкъа миллетлерге де тёвбе этип, эбедий аяткъа кирмеге разылыкъ берди, — деп Алланы алгъышладылар.

¹⁹Стефаннынъ ольдюрильмесинен башлангъан айдалув нетиджесинде даркъалып кеткен иманлылар Алланынъ Сёзюни еудийлерден башкъа ич кимсеге бильдирмейип, Фенике, Къыбрыс ве Антиохиягъа барып чыкъкъан эдилер.

²⁰Оларнынъ базылары къыбрыслы ве киренели эдилер. Олар Антиохия шеэрине кельген сонъ, Рабби Исанынъ Къуванчлы Хаберини о ердеки юнан тилинде лаф эткен еудийлерге де бильдирдилер.

²¹Раббининъ кучю оларнен олгъаны ичюн, чокътан-чокъ адам Раббиге иман эттилер.

²²Бу акъта хабер Ерусалимдеки иманлылар топлашувынынъ къулагъына барып еткенде, Барнабаны Антиохиягъа ёлладылар.

²³Барнаба о ерге кельгенде, Алланынъ мераметини корип къуванды. Раббиге бутюн гонълюнен берилинъиз деп, эписини чагъырды.

²⁴О, Мукъаддес Рух ве имангъа толгъан, мераметли адам эди. Сонъ халкънынъ баягъы къысмы Раббиге къошулды.

²⁵Сонъ Барнаба Саулны къыдырып, Тарс шеэрине барды

²⁶ве оны тапып Антиохиягъа кетирди. Бир йыл девамында олар иманлылар топлашувында чокъ адамны огреттилер. Биринджи сефер Антиохия шеэринде Исанынъ шегиртлерине «месихчилер» дедилер.

²⁷О куньлерде Антиохиягъа Ерусалимден базы пейгъамберлер кельди.

²⁸Олардан Хагап дегени Мукъаддес Рухтан ильхамланып, бутюн дюньяда буюк ачлыкъ оладжагъыны бильдирди. Сонъ бу ачлыкъ император Клавдийнинъ девринде олды.

²⁹Шегиртлернинъ эр бири исе къолундан кельгенине коре Еудиеде яшагъан дин къардашларына ярдым йибермеге къарар чыкъардылар.

³⁰Буны да япып, топлагъан бахшышларны Барнаба ве Саулнен акъсакъалларгъа ёлладылар.