Read Мукъаддес Китап къырымтатар тилинде, Фаалиет 14 Bible Online

Фаалиет 14 - Мукъаддес Китап къырымтатар тилинде, bible

Фаалиет 14

¹Иконий шеэринде Павелнен Барнаба эр ерде япкъанлары киби еудийлернинъ синагогасына кирип, ойле сёзлер айттылар ки, нетиджеде еудийлернинъ ве юнанларнынъ чокълары имангъа кельдилер.

²Лякин инанмагъан еудийлер башкъа миллет адамларнынъ юреклерини зеэрлеп, оларны дин къардашларгъа къаршы котердилер.

³Павелнен Барнаба исе, чокъ вакъыт Раббининъ адындан джесаретнен Алланынъ Сёзюни тариф эте эдилер. Рабби де оларнынъ къолларынен аджайип шейлер ве бельгилер яратып, Озюнинъ мераметли Сёзюни тасдыкълады.

⁴Бойлеликнен, шеэр сакинлери экиге болюнди: базылары еудийлер ве базылары эльчилернинъ тарафына кечтилер.

⁵Башкъа миллет адамлары ве еудийлер озь башлыкъларынен анълаштылар ве эльчилерни акъаретлемеге ве ташларнен урмагъа истедилер.

⁶Олар исе буны билип, Ликаониянынъ Листра ве Дербе шеэрлери ве этрафтаки топракъларгъа къачып кеттилер.

⁷О ерде Къуванчлы Хаберни даркъатмагъа девам эттилер.

⁸Листра шеэринде бир сакъат адам ерде отура эди. Онынъ аякълары догъма сакъат олып, омрюнде юрмеген.

⁹О, Павелнинъ айткъан сёзлерини динълеп отургъанда, Павел онъа козь тикип, тедавийленмек ичюн адамнынъ иманы олгъаныны дуйды.

¹⁰О, къатты сеснен: — Аякъ устюне догъру тур! — деди. Шу ань о адам еринден атылып турды да, юре башлады.

¹¹Халкъ Павел япкъан ишни корьди ве Ликаония тилинде къычырып: — Аллалар адам къыяфетини алып алдымызгъа тюштилер! — дедилер.

¹²Барнабагъа «Зевс», Павелге исе «Хермес» [5] дедилер, чюнки Павел лаф эткенде баш эди.

¹³Шеэрнинъ огюндеки Зевс ибадетханесининъ руханийи исе шеэрнинъ къапуларына бугъаларны ве гуль чемберлерни кетирип, халкънен берабер къурбан чалмагъа истеди.

¹⁴Эльчилер Барнаба ве Павел буны эшитип, урбаларыны йырттылар ве озьлери халкънынъ арасына атылып:

¹⁵— Акъайлар, бу ишлерни не ичюн япасынъыз? Биз де сизлерге ошагъан инсанлармыз! Сизлер бу бош шейлерден вазгечип, ер, кок, денъиз ве олардаки эр шейни яраткъан Тири Аллагъа бакъмакъ ичюн, биз сизге Къуванчлы Хаберни алып кетиремиз.

¹⁶Кечкен заманларда Алла халкъларгъа озь ёлларынен юрмеге разылыкъ берсе де,

¹⁷Озюни эр вакъыт дуйдурып кельген. Коктен ягъмур ягъдырып, берекетли заманлар берген, тенинъизни аш-сувнен, юреклеринъизни къуванчнен толдурып, сизлерге эйилик япкъан, — деп къычырдылар.

¹⁸Эльчилер бу сёзлерни айтып, халкъны зорнен тынчландырдылар ве озьлерине къурбан чалмамагъа къандырдылар.

¹⁹Сонъ Антиохия ве Иконий шеэрлеринден кельген еудийлер халкъны озь тарафына тартып, Павелни ташларнен урдылар. Сонъ, оны ольген, деп сайып, шеэрден тышарыгъа сюйреклеп чыкъардылар.

²⁰Лякин шегиртлер онынъ этрафында топлашкъанда, Павел еринден турып, шеэрге къайтып кирди. Эртеси куню о Барнабанен Дербе шеэрине кетти.

²¹Къуванчлы Хаберни Дербе шеэринде даркъатып, чокъ шегирт арттыргъанларындан сонъ, Листра, Иконий ве Антиохия шеэрлерине къайттылар.

²²Олар шегиртлернинъ джанларыны къавийлештирип, иманда эр вакъыт олмагъа оларгъа мураджаат этти. Олар: «Алланынъ Падишалыгъына кирмек ичюн, биз чокъ азаплар чекмек керекмиз», — дей эдилер.

²³Эр бир иманлыларнынъ джемиети ичюн акъсакъалларны сайлап, башларына къолларыны къойдылар. Аштан-сувдан вазгечип, дува окъугъан сонъ, олар, Раббиге эвеллери иман этип, бу адамларны Раббининъ къолуна бердилер.

²⁴Сонъ Писидия топрагъындан кечип Памфилиягъа кельдилер.

²⁵Перге шеэринде Алланынъ Сёзюни айткъан сонъ, Атталиягъа кеттилер.

²⁶Андан къайыкъкъа минип, Антиохиягъа кеттилер. Анда олар махсус вазифе ичюн Алланынъ хайырына берильген эдилер, энди исе бу ишлерини битирген эдилер.

²⁷О ерге келип, иманлылар топлашувыны топладылар да, Алланынъ оларнен не япкъаныны, башкъа миллетлерге иман къапусыны насыл ачкъаныны айтып бердилер.

²⁸Олар бу ердеки шегиртлернен чокъ вакъыт берабер къалдылар.