Read Мукъаддес Китап къырымтатар тилинде, Фаалиет 15 Bible Online

Фаалиет 15 - Мукъаддес Китап къырымтатар тилинде, bible

Фаалиет 15

¹Еудиеден кельген базы адамлар дин къардашларына: «Эгер Мусанынъ адети боюнджа сюннет этмесенъиз, къуртулып оламазсынъыз», — деп огрете эдилер.

²Павел ве Барнаба оларнен чокъ тартышып дава эттилер. Ахыр-сонъу Павелнен Барнабаны ве араларындан даа бир къач адамны, бу меселени эльчилер ве акъсакъалларнен чезмек макъсадынен, Ерусалимге ёлламагъа къарар чыкъардылар.

³Олар топлашув тарафындан ёлланылгъан сонъ, Фенике ве Самариеден кечип, о ердеки дин къардашларына башкъа халкъларнынъ Аллагъа иман эткенлерини айтып берип, эписине буюк севинч багъышладылар.

⁴Ерусалимге кельгенде, иманлылар топлашувы, эльчилер ве акъсакъаллар тарафындан къабул этильдилер. Озьлеринен берабер Алланынъ япкъан бутюн ишлерини оларгъа бильдирдилер.

⁵Лякин ферисе фыркъасындан имангъа кельген базылары къаршы чыкъып: — Оларны сюннет этмек ве Мусанынъ Къанунына бойсундырмакъ керек, — дедилер.

⁶Эльчилер ве акъсакъаллар бу меселени бакъмакъ ичюн топлаштылар.

⁷Чокъ давалардан сонъ Пётр еринден турып, оларгъа: — Дин къардашларымыз! Сизлерге белли олгъаны киби, башкъа миллетлер Къуванчлы Хаберни менден эшитип, имангъа кельсинлер деп, Алла аранъыздан мени сайлагъанына чокъ вакъыт кечти.

⁸Адамларнынъ юреклерини бильген Алла бизге берген Мукъаддес Рухны оларгъа да берип, оларгъа шаатлыкъ берди.

⁹Оларнен бизим арамызда ич бир фаркъ корьмейип, имангъа кельгенлери ичюн юреклерини темизледи.

¹⁰О алда, сизлер не ичюн Алланы сынап, не бабаларымыз, не бизлер котерип оламагъан юкни шегиртлернинъ боюнуна юклемеге истейсиз?

¹¹Амма эм биз, эм олар бир тарзда Рабби Исанынъ хайырынен къуртуладжакъмыз деп инанамыз, — деди.

¹²О вакъыт бутюн джемаат сесини кесип, Барнабанен Павелни динъледилер. Олар исе, Алла башкъа миллетлер арасында оларнынъ ярдымынен насыл аджайип шейлер ве бельгилер косьтергени акъкъында айттылар.

¹³Олар лафыны битирген сонъ, Якъуп сёз алды: — Дин къардашларымыз, мени динъленъиз!

¹⁴Биринджиден башкъа миллетлерден Озюне бир халкъны алмакъ ичюн, Алла бу миллетлерге бакъкъаныны Симон анълатты.

¹⁵Пейгъамберлернинъ сёзлери де бунъа келише, Мукъаддес Китапта:

¹⁶«Бундан сонъ Мен къайтып келип, Давутнынъ йыкъылгъан эвини къураджагъым. Онынъ виранелерини янъыдан къурып, оны гъайрыдан тиклеп къоярым.

¹⁷[17-18] Сонъ къалгъан адамлар ве Меним Адымны чагъырып таныгъан халкълар Мени — Раббини къыдырып тапсынлар, — дей Рабби. Рабби эвельден белли олгъан шейлерни беджермекте», — деп язылгъан.

¹⁹Онынъ ичюн мен бойле къараргъа кельдим, башкъа миллетлерден Аллагъа иман эткенлерини зорламанъыз.

²⁰Путларгъа союлгъан арам къурбанлыкъ этлерден, ороспулыкътан, богъулып ольдюрильген айваннынъ этинден ве къан ашавдан озьлерини сакъласынлар, деп оларгъа мектюп язайыкъ.

²¹Чюнки Мусанынъ Къануны къадимий заманлардан берли эр бир шеэрде илян этиле, эр раатлыкъ куню синагогаларда окъула, — деди.

²²О вакъыт бутюн топлашувнен эльчилер ве акъсакъаллар тюшюнип, озь араларындан адамларны сайлап, Павел ве Барнабанен Антиохиягъа ёлламагъа къарар чыкъардылар. Дин къардашлар арасында урьмет къазангъан башлыкъларны: Барсабба адыны ташыгъан Иуданы ве Силаны сайладылар.

²³Оларнен шу мектюпни язып ёлладылар: «Антиохия, Сурие ве Киликияда яшагъан башкъа миллетлерден дин къардашларгъа, эльчилерден ве акъсакъаллардан, — дин къардашлардан. Селям алейкум!

²⁴Эшиткенимизге коре, бизден чыкъкъан базы адамлар озьлерининъ лафларынен башынъызны айландырып, гонълюнъизни бозгъан. Биз исе буны буюрмагъан эдик.

²⁵Шу себептен озь арамыздан сайлангъан базы бир адамларны севгили Барнаба ве Павелнен берабер сизлернинъ алдынъызгъа ёлламакъ ичюн бир фикирге кельдик.

²⁶Булар Рабби Иса Месихнинъ ады ичюн озь джанларыны аджымагъан адамлардыр.

²⁷Къарарымыз боюнджа алдынъызгъа Иуданен Силаны да ёллаймыз; олар сизлерге буларны агъзавий анълатырлар.

²⁸Мукъаддес Рух ве бизлер, беджермеге зарур олгъан шейлерден башкъа, сизинъ бойнунъызгъа ич бир шей юклемеге керекмей, деп саямыз, яни:

²⁹путларгъа союлгъан къурбанлыкъ этлерден, богъулып ольдюрильген айваннынъ этинден ве къан ашавдан, ве ороспулыкътан озьлеринъизни сакъланъыз. Буларны тутып юрсенъиз, яхшы иш япарсынъыз. Сагълыкънен къалынъыз!»

³⁰Бойледже, бу адамлар ёлгъа чыкъып, Антиохия шеэрине кельдилер. О ердеки джемаатны топлап, оларгъа мектюпни бердилер.

³¹Олар исе бу юреклендириджи насиатны окъуп, севиндилер.

³²Пейгъамберлер Иуда ве Сила, дин къардашларына агъзавий насиатны айтып берди ве джанларыны къавийлештирдилер.

³³[33-34] Бу ерде бир къач вакъыт къалгъан сонъ, дин къардашлары оларны аман-эсен озгъарып, ёллагъанларнынъ алдына къайтардылар.

³⁵Павелнен Барнаба исе Антиохияда къалдылар. Олар башкъа бир чокъ адамларнен берабер огретип, Раббининъ Къуванчлы Хаберини даркъатмагъа девам эттилер.

³⁶Бир къач вакъыт кечкен сонъ, Павел Барнабагъа: — Энди къайтып барып, Раббининъ Сёзюни даркъаткъан эр бир шеэрдеки дин къардашларны бакъайыкъ, оларнынъ ал-эвалыны билейик, — деди.

³⁷Барнаба исе Марк деген Юханны да озюнен берабер алмагъа истей эди.

³⁸Лякин Павел, Памфилияда оларны ташлап, вазифеден баш тарткъан адамны янына алмагъа разы олмады.

³⁹Нетиджеде араларында кескин бир дава чыкъты, ве олар бир-биринден айырылып кеттилер. Барнаба Маркны алып, Къыбрыс адасына ёл алды.

⁴⁰Павелнинъ озю исе Силаны сайлады. Дин къардашлар оны Алланынъ хайырына къалдыргъан сонъ, о да кетти.

⁴¹Павел Суриеден ве Киликиядан кечип, иманлылар джемиетлерини иманда къавийлештире эди.