Read Мукъаддес Китап къырымтатар тилинде, Фаалиет 17 Bible Online

Фаалиет 17 - Мукъаддес Китап къырымтатар тилинде, bible

Фаалиет 17

¹Амфиполь ве Аполлония шеэрлеринден кечип, олар Тессалонике шеэрине кельдилер. О ерде еудийлернинъ синагогасы бар эди.

²Павел озюнинъ адети боюнджа еудийлернинъ алдына барып, учь раатлыкъ куню девамында оларгъа Мукъаддес Языларны анълатты.

³Павел Месихнинъ азаплангъаны ве олюлерден тирильгени кереклигини ача ве исбатларнен бильдире эди. О: «Мен сизлерге Иса акъкъында илян этем. Бу Иса — Месихтир», — дей эди.

⁴Еудийлернинъ базылары, Алладан къоркъкъан пек чокъ юнанлар ве бир талай урьметли къадынлар инанып, оларгъа къошулдылар.

⁵Лякин инанмагъан еудийлер пахыллап, мейданлардан ярамаз адамларны алдылар, бир талай адам топладылар да, бутюн шеэрни аякъкъа турсаттылар. Олар Ясоннынъ эвине уджюм этип, Павелнен Силаны халкънынъ алдына алып чыкъкъанларыны талап эттилер.

⁶Оларны тапмагъан сонъ, Ясон ве базы дин къардашларны шеэр башлыкълары алдына сюйреклеп кетирдилер де, къычырып: — Дюньяны авдаргъан адамлар мына бу ерге де кельдилер! — дедилер.

⁷— Ясон оларны эвине къабул этти. Буларнынъ эписи, Иса деген башкъа бир падиша бар деп, императорнынъ эмирлерине къаршы арекет этелер, — дедилер.

⁸Бу сёзлер халкъны ве шеэр башлыкъларыны пек къасеветлендирди.

⁹Онынъ ичюн Ясон ве башкъаларындан баягъы акъча алгъан сонъ, оларны бошатып йибердилер.

¹⁰Шу геджеси дин къардашлар Павелнен Силаны Бероя шеэрине ёлладылар. Олар о ерге келип, еудийлернинъ синагогасына бардылар.

¹¹Бу ердеки еудийлер Тессалонике сакинлерине бакъкъанда адам сайгъан халкъ эди. Алланынъ Сёзюни буюк азырлыкънен къабул этип, бу огретюв догъру экенми, деп кунь-куньден Мукъаддес Языларны араштырып тешкерди.

¹²Бойледже, оларнынъ чокълары ве бир талай асылзаде юнан къадын ве акъайлары да имангъа кельдилер.

¹³Амма Павел Бероя шеэринде Алланынъ Сёзюни илян этти, деп эшиткен Тессалоникедеки еудийлер о ерге де келип, халкъны аякъкъа котере башладылар.

¹⁴О вакъыт, дин къардашлар Павелни тез-тез денъиз тарафкъа ёлладылар. Сила ве Тимотей исе о ерде къалдылар.

¹⁵Павелни озгъаргъанлар оны Афина шеэринедже алып бардылар. Олар Павелден: «Силанен Тимотей яныма тездже кельсинлер», — деген эмирни алгъандан сонъ, къайтып кельдилер.

¹⁶Павел Афинада Силанен Тимотейни беклеп тургъанда, бу шеэр путларнен толгъаныны корьгени ичюн, гонълю янды.

¹⁷Еудий синагогасында еудийлер ве Алладан къоркъкъан башкъа адамларнен, базар мейданында исе расткельгенлернен эр кунь лаф этип тура эди.

¹⁸Эпикурейнинъ ве стоиклернинъ фельсефеси тарафдарлары да онен давалашып башладылар. Олардан бириси: — Бу бошбогъаз не айтмагъа истей экен? — деди. Башкъалары: — О гъалиба худжур бир путлар акъкъында айта, — дедилер. Павел исе оларгъа Иса ве тирилюв акъкъындаки Къуванчлы Хаберни илян эте эди.

¹⁹Павелни Арес-тёпеге [6] алып бардылар ве онъа: — Сен огреткен бу янъы огретювнинъ не олгъаныны бизге де бильмеге мумкюнми?

²⁰Къулагъымызгъа худжур сёзлер эшитиле, биз оларнынъ не олгъаныны бильмеге истеймиз, — дедилер.

²¹Эписи афиналылар ве бу шеэрде яшагъан ябанджылар бутюн вакъытларыны янъылыкъларны айтмакъ я да динълемекнен кечирмеге эр шейден зияде бегене эдилер.

²²Павел Арес-тёпенинъ ортасында турып: — Эй Афина акъайлары! Мен сизлерни эр тарафтан пек диндар олгъанынъызны корем.

²³Чюнки кезе-кезе, азиз ерлеринъизни козьден кечирип, «Белли олмагъан Аллагъа», деп язылгъан бир къурбан ерини биле расткетирдим. Мына бу сизлер бильмейип урьмет эткен Алланы мен сизлерге илян этмеге истейим.

²⁴Дюньяны ве онынъ барлыгъыны яраткъан Алла, ер ве кокнинъ Раббиси олып, инсан къолунен яратылгъан сарайларда яшамай.

²⁵Онынъ, инсан къолларынен хызмет этилип япылгъан ич бир шейге мухтаджы ёкъ. О, Озю эписине аят, нефес ве эр бир шейни берди.

²⁶Эписи халкъларны бир адамдан яратып, бутюн ер юзюнде даркъалып яшамасына ёл берди. Оларнынъ бельгили девирлерини, сынъырларынен тюрлю яшайджакъ ерлерини Алла тайин этти.

²⁷Бельки олар Алланы дуйып тапарлар, шунынъ ичюн Оны къыдырсынлар. О да эр биримизге пек якъын ола.

²⁸Биз Онынъ ярдымынен яшаймыз, арекет этемиз, бармыз. Озь шаирлеринъизден базылары айткъаны киби, «Биз де Онынъ эвлятларымыз».

²⁹Энди биз Алланынъ эвлятлары олгъанымыз ичюн, Алланы инсан усталыгъынен яраткъан я да инсан тюшюнджесинен ишленген алтын, кумюш я да ташнен япылгъан шейнен тенъештирмеге керекмей.

³⁰Алла, бу джаиллик заманларына козь юмгъан олса да, энди эр ерде, эписи адамларгъа тёвбе этмеге буюрмакъта.

³¹Озю къойгъан адамнен О, дюньяны адалетли суд этмек ичюн бир кунь тайин этти. Бу адамны олюлерден тирильтип, эр кеске шаатлыкъ этти, — деди.

³²Олюлернинъ тирилюви акъкъында эшитип, базылары оны масхара этип кульдилер. Башкъалары исе: — Бу акъта сени башкъа сефер динълермиз, — дедилер.

³³О вакъыт Павел оларнынъ ортасындан чыкъып кетти.

³⁴Базы адамлар исе онъа къошулып имангъа кельдилер, шу джумледен Арес-тёпе шурасынынъ азасы Дионисий, Дамар адлы бир къадын ве башкъалары да бар эди.