Read Мукъаддес Китап къырымтатар тилинде, Фаалиет 2 Bible Online

Фаалиет 2 - Мукъаддес Китап къырымтатар тилинде, bible

Фаалиет 2

¹Берекет Байрамы кельгенде, шегиртлернинъ эписи бир ерде топлашып тура эдилер.

²Апансыздан коктен кучьлю ельнинъ уфюргенине ошагъан бир увулты чыкъты да, олар тургъан эвни бутюнлей толдурды.

³Оларгъа атешке ошап айры-айры олгъан тиллер корюнди. Сонъ олар эр бирининъ устюне къонды.

⁴Эписи Мукъаддес Рухкъа толдылар ве Рух оларгъа муим шейлер айтмагъа берген къабилиетинен эджнебий тиллерде лакъырды этип башладылар.

⁵Шу вакъыт Ерусалимде дюньянынъ эр бир халкъындан кельген иманлы еудийлер яшай эдилер.

⁶Бу шамата чыкъкъанда, чокъ адам топлашты. Эр бири озь тилинде лакъырды эткенини эшитип, шаштылар.

⁷Эписи тааджипленип ве айретте къалып, озьара: — Бу лакъырды эткенлернинъ эписи галилеялылар дегильми?

⁸Насыл ола да, эр биримиз озь ана тилимизни эшитемиз?

⁹Партлылар, мидлилер ве эламлылар, Месопотамия, Еудие, Каппадокия, Понт ве Кучюк Асияда яшагъан,

¹⁰Фригия, Памфилия, Мысыр ве Ливиянынъ Кирене этрафындаки ерлерде яшагъан, Римден кельген

¹¹еудийлер ве еудий динини къабул эткенлер де, критлилер ве арапларнынъ да, бизим тиллеримизде Алланынъ буюк ишлери акъкъында айткъанларыны эшитемиз, — дедилер.

¹²Эписи шашып къалып, бир-бирине: — Бу насыл шей? — деп тааджиплене эдилер.

¹³Башкъалары исе масхара этип: — Олар татлы шарап ичип тойгъанлар, — дедилер.

¹⁴О вакъыт Пётр он бир эльчинен берабер турып, кучьлю сеснен халкъкъа мураджаат этти: — Эй, еудий акъайлары ве Ерусалимде яшагъан эписи адамлар! Сёзлериме къулакъ асып, шуны билинъиз:

¹⁵бу адамлар, сиз тюшюнгенинъиз киби, сархош дегиллер, чюнки шимди даа саба саат докъуз!

¹⁶Мында олгъан шей исе Ёэль пейгъамбернен бильдирильген эди:

¹⁷«Мына, сонъки куньлерде бойле шей оладжакъ, — дей Алла: — Мен эписи адамларнынъ устюне Озь Рухумны ягъдыраджагъым. Сизинъ огъул ве къызларынъыз пейгъамберлик япаджакълар, йигитлеринъиз руялар кореджеклер, къартларынъыз беджериледжек тюшлер кореджеклер.

¹⁸О куньлерде Мен къулларымнынъ устюне Озь Рухумны ягъдыраджагъым, олар да пейгъамберлик япаджакълар.

¹⁹Юкъарыда кокте аджайип шейлер япаджагъым ве ашагъыда ер юзюнде бельгилер береджегим: къан, атеш ве къою думан киби тютюн ёллайджагъым.

²⁰Раббининъ улу ве шанлы куню кельмезден эвель, кунеш къаранлыкъ оладжакъ, ай исе къан киби оладжакъ.

²¹О вакъыт Раббининъ адыны айтып чагъыргъан эр бир адам къуртарыладжакъ».

²²Эй Исраиль акъайлары, бу сёзлерни динъленъиз! Назарет шеэринден олгъан Исанынъ вастасынен Алла къудретли ве аджайип шейлер япты ве бельгилер косьтерди. Сиз буларнынъ эписини билесиз. Оларнынъ эсасында Алла Исаны тасдыкълады.

²³Алла эвельден къарар чыкъарып ве эвельден бильгени киби, О, сатылгъан эди, ве сиз адалетсиз адамларнынъ къолунен Оны хачкъа мыхлап ольдюрдинъиз.

²⁴Лякин Алла олюм зынджырларыны узип, Оны тирильтти, чюнки олюм Оны тутып оламаз эди.

²⁵Давут Иса акъкъында шойле деген: «Раббини эр вакъыт огюмде корьдим: Мен ич бир шейден къоркъмайджагъым ичюн, О, меним онъ тарафымдадыр.

²⁶Шунынъ ичюн юрегим къуванчкъа толды, тилимден шадлыкъ тёкюльди, теним де умют иле раатнен яшайджакъ.

²⁷Сен джанымны олюлер дюньясында ташлап кетмезсинъ, Азизинъе чюрюп ёкъ олмагъа ёл бермезсинъ.

²⁸Аят ёлларыны манъа бильдирдинъ, Озь огюнъде мени бахт-къуванчнен толдураджакъсынъ».

²⁹Дин къардашларымыз! Сизлерге бабамыз Давут акъкъында догърудан-догъру айтмагъа рухсет этинъиз: о ольди, оны дефн эттилер ве онынъ къабри бугуньгедже бизде бардыр.

³⁰О, пейгъамбер олгъаны ичюн, шуны биле эди ки, Алла онынъ союндан олгъан бирини тахткъа отуртаджагъына ант этти.

³¹О, Месихнинъ тириледжегини эвельден корип, О, олюлер дюньясына ташланмайджагъы, бедени исе чюрюмейджеги акъкъында бильдирген эди.

³²Бу Исаны Алла тирильтти, биз эпимиз исе бунъа шаат олдыкъ.

³³О, Алланынъ къудретинен юксельтильгенден сонъ, Бабанынъ вадеси боюнджа Мукъаддес Рухны алып, бизге ягъдырды. Шимди сизлер буны корип, эшитип турасыз.

³⁴[34-35] Давут озю кокке котерильмеген эди, амма бойле деди: «Рабби меним Раббиме деди: „Душманларынъны аякъларынъ астына йыкътырмагъанымдже, Меним онъ тарафымда отур”».

³⁵

³⁶Бойледже, бутюн Исраиль халкъы буны къатты бильсин ки, сизлер хачкъа мыхлагъан бу Исаны Алла — Рабби ве Месих этти!

³⁷Бу сёзлерни эшиткенлер юреклерине окъ санчылгъан киби олдылар, Пётр ве башкъа эльчилерге: — Дин къардашларымыз, биз не япайыкъ? — дедилер.

³⁸Пётр оларгъа: — Тёвбе этинъиз ве гуналарынъыз багъышланмасы ичюн эр биринъиз Иса Месих адындан сувгъа батырылып чыкъынъыз. О вакъыт Мукъаддес Рух сизге бахшыш олып бериледжек.

³⁹Чюнки бу ваде сизлернен балаларынъызгъа ве даа узакъта олгъан, бизим Алла Раббимиз чагъыргъан эписи адамларгъа берильген, — деди.

⁴⁰Пётр даа чокъ башкъа сёзлернен оларны тенбилеп, насиат берип: — Бу бозукъ несильден озюнъизни къуртарынъыз! — деди.

⁴¹Бойледже, онынъ сёзюни ачыкъ гонъюльден къабул эткенлер сувгъа батырылып чыкътылар. Шу куню учь бинъге якъын джан иманлыларгъа къошулды.

⁴²Олар эльчилернинъ талиматыны огренип, эр вакъыт бирликте яшай ве хызмет эте, отьмек боле ве дува окъуй эдилер.

⁴³Эр бир джан Алладан къоркъа эди. Эльчилернинъ ярдымынен исе чокъ аджайип шей ве бельгилер косьтерильди.

⁴⁴Эписи иманлылар бирлик олып, эр шейлерини болип яшай эдилер.

⁴⁵Мал-мульклерини сатып, эписине, эр кеснинъ ихтияджына коре пай этип, ярдым эте эдилер.

⁴⁶Олар эр кунь бир юрекнен Алланынъ Сарайына топлаша, эвлеринде исе отьмек болип яшап, къуванчнен ве адийликнен ашай

⁴⁷ве Аллагъа шукюр эте эдилер. Олар бутюн халкънынъ гонълюни алдылар. Алла исе кунь сайын къуртарылгъанларны иманлылар сырасына къоша эди.