Read Мукъаддес Китап къырымтатар тилинде, Фаалиет 22 Bible Online

Фаалиет 22 - Мукъаддес Китап къырымтатар тилинде, bible

Фаалиет 22

¹— Эй дин къардашлар ве бабалар! Энди огюнъизде озюмни акълагъан сёзлеримни динъленъиз!

²Павелнинъ оларгъа еудийлернинъ тилинде айткъаныны эшиткенде, орталыкъ чым-чырт олды. О девам этти:

³— Мен еудий акъайым. Киликиянынъ Тарс шеэринде догъдым, мында Гамалиэльнинъ янында тербиелендим. Баба-деделеримизнинъ Къануны эсасында джиддий тербиеленип, бугунь бу ерде топлашкъан эпинъиз киби мен де Алланынъ ирадесини гъайретнен беджермеге истей эдим.

⁴Бу Ёлнынъ тарафдарларыны — акъаймы, къадынмы демей, эписини багълап зиндангъа ташлай, ольгендже айдай эдим.

⁵Ана, баш руханийнен акъсакъалларнынъ эписи меним шаатларымдыр. Мен олардан Дамасктаки дин къардашларына язылгъан мектюплерни алып, о ерде яшагъан бу адамларны джезаламакъ ичюн Ерусалимге кетирмек ниетинен ёлгъа чыкъкъан эдим.

⁶Уйлеге якъын бир маальде мен ёл басып, Дамасккъа якъынлашаяткъанымда, апансыздан коктен тюшкен бир нур этрафымны парылдатты.

⁷Мен ерге йыкъылдым да, бир сеснинъ манъа: «Саул, Саул, сен не ичюн Мени айдайсынъ?» — дегенини эшиттим.

⁸Мен: «Я Рабби, Сен ким оласынъ?» — деп сорагъанда, О: «Мен сен айдагъан Назаретли Иса олам», — деп джевап берди.

⁹Ёлдашларым нурны корьген олсалар да, манъа айтылгъан сёзлерни эшитмедилер.

¹⁰О вакъыт мен: «Я Рабби, манъа не япмакъ керек?» — дедим. Рабби исе манъа: «Еринъден турып Дамасккъа бар, япмагъа керек олгъан эр шейни о ерде айтаджакълар», — деди.

¹¹О нурнынъ йылтырагъанындан кёр олгъаным ичюн, ёлдашларым мени къолумдан тутып Дамасккъа етеклеп алып бардылар.

¹²О ерде яшагъан эписи еудийлер арасында нам къазангъан, Къанунгъа коре диндар, Анания адлы бир адам бар эди.

¹³О, яныма келип турды да, манъа: «Къардашым Саул, козьлеринъ ачылсын!» — деди. Мен исе шу ань оны корьдим.

¹⁴О манъа: «Бабаларымызнынъ Алласы сени сайлады. Чюнки сен, Онынъ ирадесини билип ве Инсафлы Олгъанны корип, Онынъ сесини эшитип,

¹⁵корьген ве эшиткен шейлернинъ эписи акъкъында бутюн адамлар огюнде Онынъ шааты оладжакъсынъ.

¹⁶Энди даа не беклейсинъ? Еринъден тур ве, Исанынъ адыны чагъырып, сувгъа батырылып чыкъ да, гуналарынъдан темизлен!» — деди.

¹⁷Мен Ерусалимге къайтып кельгенден сонъ, Алланынъ Сарайында дува окъугъанымда, руяда олып,

¹⁸Раббини корьдим. О, манъа: «Къана, тез ол да, Ерусалимден чыкъып кет, чюнки бу ерде Мен ичюн берген шаатлыгъынъны къабул этмейджеклер», — деди.

¹⁹Мен: «Я Рабби! Санъа инангъанларны синагогаларда ургъан ве зиндангъа ташлагъан адам олгъанымны олар билелер де.

²⁰Сенинъ шаатынъ олгъан Стефаннынъ къаныны тёккенлерде, мен де о ерде тургъан эдим. Мен онынъ ольдюргенлерине разы олып, оларнынъ урбаларына къаравул олдым», — дедим.

²¹О исе: «Сен бара бер! Чюнки Мен сени узакъкъа, башкъа миллетлернинъ алдына ёллайджам», — деди.

²²Бу вакъыткъадже Павелни динълеп тургъанлар къычыра башладылар. Олар: — Бойле адамны ер юзюнден ёкъ этинъ! Онъа яшамагъа мумкюн дегиль! — дедилер.

²³Олар ойле къычырып, усть урбаларыны ташлап, авагъа тоз сачып тургъанларда,

²⁴бинъбашы Павелге къаршы бойле багъыргъанларнынъ себебини бильмек ичюн, оны къалеге алып барып къамчыламагъа ве соргъу кечирмеге буюрды.

²⁵Оны къушакъларнен багълап кергенде, Павел янында тургъан юзбашыгъа: — Рим гражданыны суд этмейип къамчыламакъ мумкюнми? — деп сорады.

²⁶Юзбашы буны эшиткенинен, барып бинъбашыгъа хабер этип: — Бакъ, сен не япмагъа истейсинъ? Бу адам Рим гражданы экен де, — деди.

²⁷О вакъыт бинъбашы Павелнинъ янына келип: — Манъа айт, сен Рим гражданы оласынъмы? — деп сорады. — Эбет, — деди Павел.

²⁸Бинъбашы: — Мен бу гражданлыкъкъа чокъ акъча берип саип олдым, — деди. Павел: — Мен исе догъгъан кунюнден башлап бу мемлекетнинъ гражданы эдим, — деп джевап берди.

²⁹О вакъыт Павелни соргъугъа чеккенлер онынъ янындан тез-тез чекильдилер. Бинъбашы да онынъ Рим гражданы олгъаныны билип, багълап къойгъаны ичюн пек къоркъты.

³⁰Эртеси куню бинъбашы, еудийлер Павелни неде къабаатлагъанларыны эминликнен бильмек макъсадынен, оны зынджырлардан бошатты. Еудий баш руханийлери ве бутюн Юксек Шура азаларына топланмагъа буюрды. Павелни кетирип, оларнынъ къаршысына къойды.