Read Мукъаддес Китап къырымтатар тилинде, Фаалиет 23 Bible Online

Фаалиет 23 - Мукъаддес Китап къырымтатар тилинде, bible

Фаалиет 23

¹Павел Шура азаларына козьлерини тикип: — Эй дин къардашларымыз! Мен бу куньге къадар Алланынъ алдында темиз инсафнен яшадым, — деди.

²Буны айткъанынен, баш руханий Анания Павелнинъ янында тургъанларгъа онынъ агъзына урмагъа буюрды.

³Павел онъа: — Эй сыландыргъан дивар, сени Алла ураджакъ! Сен Къанун эсасында укюм чыкъармакъ ичюн отурасынъ, амма Къанунгъа къаршы мени урмагъа буюрасынъ! — деди.

⁴Онынъ огюнде тургъанлар: — Алланынъ баш руханийини акъаретлейсинъми? — дедилер.

⁵Павел оларгъа: — Агъа-къардашлар! Онынъ баш руханий олгъаныны бильмедим. Языда: «Халкънынъ арасында башлыкъ олгъанны яманлама», — деп язылгъан, — деди.

⁶Оларнынъ бир къысмы саддукий ве башкъа къысмы фериселер олгъаныны анълагъан Павел Шурагъа къатты бир сеснен: — Дин къардашларымыз! Мен ферисем, эм ферисенинъ огълу олам. Мени, олюлернинъ тирильгенине ишангъаным ичюн укюм этелер, — деди.

⁷О, буны айткъан сонъ, фериселернен саддукийлер арасында буюк дава чыкъып, топлашув экиге болюнди.

⁸Чюнки саддукийлер олюмден тирильмекни де, мелеклерни де, рухны да ёкъ, деп саялар. Фериселер исе буларнынъ эписине инаналар.

⁹Топлашувда буюк шамата котерильди. Фериселерден олгъан бир къач Къанун оджасы сёзге чыкъып, ачувнен: — Бизлер бу адамда ич бир яманлыкъ тапмаймыз. Эгер рух я да мелек онъа бир шей айткъан олса, не олгъан? — дедилер.

¹⁰Дава ойле шиддетли олды ки, Павелни парча-парча этмесинлер деп, къоркъкъан бинъбашы аскерлерине ашагъа тюшип, адамларнынъ араларындан оны чыкъарып, къалеге алып кирмеге буюрды.

¹¹О геджеси Рабби Иса Павелге корюнип: «Джесюр ол! Ерусалимде Манъа насыл шаатлыкъ япкъан олсанъ, Римде де ойле шаатлыкъ этмек керексинъ», — деди.

¹²Эртеси куню базы еудийлер ант этип, Павелни ольдюрмегендже ашап-ичмемезликке сёз бердилер.

¹³Бойле ант эткенлернинъ сайысы къыркъ адамдан зияде эди.

¹⁴Олар баш руханийлернен акъсакъалларнынъ янына келип: — Павелни ольдюрмегенимиздже ант этип ич бир шей ашамайджакъмыз.

¹⁵Энди сизлер Шура азаларынен берабер бинъбашынынъ янына барынъыз ве, Павелнинъ меселесини даа яхшыджа огренмек ичюн, оны ярын алдынъызгъа чыкъармасыны риджа этинъиз. Бизлер исе, о етип кельмезден эвель, оны ольдюрмеге азыр турармыз, — дедилер.

¹⁶Павелнинъ къыз къардашынынъ огълу бу фитне акъкъында эшитип, къалеге кирди де, онъа хабер этти.

¹⁷Павел юзбашылардан бирисини чагъырып: — Бу йигитни бинъбашынынъ янына алып бар, онъа айтаджакъ бир лафы бар, — деди.

¹⁸О, йигитни алды ве бинъбашынынъ янына кетирип: — Мабюс Павел мени янына чагъырып, бу йигитни сенинъ алдынъа кетиргенимни риджа этти, санъа айтаджакъ бир лафы бар экен, — деди.

¹⁹Бинъбашы йигитнинъ къолундан тутып, оны бир четке чекти де: — Манъа не айтаджакъ эдинъ? — деп сорады.

²⁰Йигит джевап берип: — Еудийлер Павелнинъ ишини даа яхшыджа огренмек ичюн оны ярын Шура алдына чыкъармакъны сенден риджа этмеге келиштилер.

²¹Лякин сен оларгъа инанма. Чюнки къыркътан зияде адам Павелни беклеп туралар; оны ольдюрмегендже ашап-ичмемеге ант эттилер. Мына шимди сенинъ эмиринъни беклеп, азыр олып туралар, — деди.

²²Бинъбашы: — Манъа бу хаберни бильдиргенинъни ич кимсеге айтма! — деп йигитни йиберди.

²³Бинъбашы юзбашылардан экисини чагъырып: — Кунь баткъан сонъ саат докъузда Кайсарея шеэрине бармакъ ичюн эки юз аскер, етмиш атлы ве эки юз мызракълы аскер азырланъыз.

²⁴Павелни миндирип, виляет акими Феликснинъ алдына сагъ-селямет алып бармакъ ичюн онъа юклю айван беринъиз, — деп буюрды.

²⁵Бинъбашы бойле бир мектюп язып берди:

²⁶«Сайгъылы аким Феликске, Клавдий Лисийден селям!

²⁷Бу адамны еудийлер тутып ольдюрмеге истей эдилер. Амма онынъ Рим гражданы олгъаныны билип, мен аскерлернен берабер етип келип, онынъ джаныны къуртардым.

²⁸Сонъ оны неде къабаатлагъанларыны бильмеге истеп, оларнынъ Шурасына алып бардым.

²⁹Нетиджеде озьлерининъ Къанунына коре меселелер боюнджа оны къабаатлагъанларыны бильдим, лякин онда олюмге я да апске ляйыкъ ич бир къабаат тапмадым.

³⁰Бу адамгъа къаршы азырлагъан фитнеден хабердар олып, мен тез-тез оны сенинъ янынъа ёлладым. Оны къабаатлагъанларгъа да онъа къаршы олгъан даваларыны сенинъ янынъда айтмагъа эмир эттим».

³¹Аскерлер алгъан эмирине коре, Павелни гедже Антипатрис шеэрине алып бардылар.

³²Эртеси куню онен берабер бараджакъ атлыларны къалдырып, озьлери къалеге къайтып кеттилер.

³³Атлылар Кайсареягъа барып, мектюпни акимге бердилер ве Павелни де онъа теслим эттилер.

³⁴Аким мектюпни окъуп, Павелден къайсы виляеттен олгъаныны сорады. Киликиядан олгъаныны билип, онъа:

³⁵— Сени къабаатлагъанлар кельген сонъ, ишинъни бакъарым, — деди де, Павелни Ироднынъ преториясында [11] къаравуллап тутмагъа буюрды.