Read Мукъаддес Китап къырымтатар тилинде, Фаалиет 24 Bible Online

Фаалиет 24 - Мукъаддес Китап къырымтатар тилинде, bible

Фаалиет 24

¹Арадан беш кунь кечкен сонъ, баш руханий Анания ве базы акъсакъаллар, Тертулл адлы бир укъукъчынен Кайсарея шеэрине келип, Павелге къаршы къабаатларыны акимнинъ огюне къойдылар.

²Сонъ Павелни чагъырдылар. Тертулл исе оны къабаатламакъ ичюн сёз алды: — Эй мухтерем Феликс, сенинъ укюмдарлыгъынъда аманлыкъ ичинде яшагъанымыз, халкъымыз ичюн янъы къанунлар чыкъарып, чокъ къайгъырасынъ,

³шунынъ ичюн эр даим ве эр ерде буны миннетдарлыкънен къабул этемиз.

⁴Сени чокъ раатсыз этмемек ичюн, мераметли олып бир къач сёзюмизни динълегенинъе риджа этем.

⁵Биз бу адамны беля кетириджи деп саямыз. Мына о, назаретлилер фыркъасынынъ башлыкъларындан бири олып, дюньянынъ бутюн еудийлерини аякъкъа турсата.

⁶[6-7] О, Алланынъ Сарайыны да арам этмеге тырышты, амма биз оны туттыкъ.

⁸Бу адамны соргъу этсенъ, биз оны нелерде къабаатлагъанымызны озюнден билип алырсынъ.

⁹Еудийлер де айтылгъанларнынъ догъру олгъаныны бильдирип, къабаатларны тасдыкъладылар.

¹⁰Аким Павелге сёзге чыкъмакъ ичюн ишарет этти, ве о: — Сен чокъ йыллардан берли бу халкъны махкеме эткенинъ ичюн, мен озь ишимни эминликнен къорчалайджам.

¹¹Озюнъ де билип олурсынъ ки, мен бель букмек ичюн Ерусалимге кельгениме даа он эки куньден чокъ дегиль.

¹²Не Сарайда, не синагогаларда ве не Ерусалим шеэринде биле ич бир адамнен дава эткеним, я да халкъны аякъкъа котергенимни олар корьмедилер.

¹³Шимди де мени къабаатлагъанда, ич бир шейни исбат этип оламайлар.

¹⁴Огюнъде шуны ачыкъ айтмагъа истейим: олар Ёлгъа ялан дейлер, мен исе онъа коре яшап, бабаларымызнынъ Алласына ибадет этем. Къанунгъа коре олгъан эр бир шейге ве Пейгъамберлернинъ Языларында язылгъанларнынъ эписине инанам.

¹⁵Бу адамларнынъ озьлери киби мен де, Аллагъа умют этип, инсафлыларнен инсафсызларнынъ тирильтеджегине инанам.

¹⁶Шунынъ ичюн Алла ве инсанларнынъ алдында инсафымны эр вакъыт саф тутмагъа тырышам.

¹⁷Чокъ йыллардан берли мында олмагъанымдан сонъ, халкъыма садакъалар ве бахшышлар кетирмек ичюн Ерусалимге къайтып кельдим.

¹⁸Олар мени Алланынъ Сарайында элялланув адетини япкъанымдан сонъ таптылар. О ерде мен ичюн не топлашув, не къалабалыкъ бар эди.

¹⁹Анда тек Кучюк Асиядан олгъан бир къач еудий бар эди. Аслында шу адамлар, оларнынъ манъа къаршы бир шейи олса, сенинъ огюнъде турмакъ ве мени къабаатламакъ керек эди.

²⁰Я да бу ердекилернинъ озьлери айтсынлар, Шура алдында тургъанымда менде насыл акъсызлыкъ тапкъан эдилер?

²¹Мен оларнынъ арасында турып, къатты сеснен: «Олюлернинъ тирилишине инангъаным ичюн бугунь алдынъызда укюм этилем», — дедим. Ихтимал, шу сёзюм ичюн къабаатлы сайыладырым, — деди.

²²О вакъыт Феликс: — Бинъбашы Лисий кельген сонъ, меселенъни чезерим, — деп, махкемени башкъа куньге къалдырды. Феликс озю Ёл акъкъында яхшы хабердар эди.

²³Павелни юзбашынынъ къолуна берип: «Къапалсын, лякин бираз енгиллик берильсин, онъа хызмет этмеге истеген достларына ич бир къаршылыкъ костерильмесин», — деп буюрды.

²⁴Бир къач куньден сонъ Феликс озюнинъ еудий олгъан апайы Друсилланен берабер кельди. Павелни чагъыртып, онынъ Иса Месихке иман этюв акъкъында айткъаныны динъледи.

²⁵Павел акъикъат, нефисни тутмакъ ве келеджек Ахирет куню акъкъында айткъанда, Феликс къоркъып: — Энди кет, вакъыт тапкъанымда, сени кене чагъырырым, — деди.

²⁶Айны заманда, Павел манъа пара берир деген умютте оны сыкъ-сыкъ чагъыртып субетлеше эди.

²⁷Эки йылдан сонъ Феликснинъ ерине Поркий Фест кельди. Феликс еудийлернинъ мераметини къазанмакъ ичюн, Павелни къапалы къалдырды.