Read Мукъаддес Китап къырымтатар тилинде, Фаалиет 25 Bible Online

Фаалиет 25 - Мукъаддес Китап къырымтатар тилинде, bible

Фаалиет 25

¹Фест, виляетине кельгенинден учь кунь кечкен сонъ, Кайсареядан Ерусалимге барды.

²Анда олгъанда баш руханийлернен энъ урьметли еудийлер акимнинъ алдына барып, Павелге къаршы къабаатлавлар кетирдилер.

³Эйилик косьтерип, Павелни Ерусалимге кетирильмеси ичюн ялвардылар. Ёлда оны беклеп ольдюрмеге истедилер.

⁴Фест исе Павел Кайсареяда къапалы къалгъаныны ве озю де якъында о ерге къайтып бараджагъыны оларгъа бильдирди.

⁵О: — Аранъыздан урьметли адамлар меннен берабер кетсинлер ве бу адамда бир яманлыкъ олса, оны къабаатласынлар, — деди.

⁶Фест оларнынъ янында секиз-он куньден зияде турмайып, Кайсареягъа къайтты. Эртеси куню къады курсюсине отурып, Павелни алып кельгенлерини буюрды.

⁷Павел ортагъа чыкъкъанда, Ерусалимден кельген еудийлер оны сарып алдылар ве озьлери исбат этип оламайджакъ бир чокъ агъыр къабаатларны онынъ устюне юкледилер.

⁸Павел исе озюни къорчалап: — Мен не еудийлернинъ Къанунына, не Сарайгъа ве не императоргъа къаршы ич бир джинает япмагъаным, — деди.

⁹Фест, еудийлернинъ мераметини къазанмакъ ичюн, Павелден: — Ерусалимге барып, о ерде меним алдымда бу хусуста укюм этильмеге истейсинъми? — деп сорады.

¹⁰Павел онъа: — Мен императорнынъ къады курсюси огюнде турам, о мени укюм этмек керек. Мен еудийлерге ич бир акъсызлыкъ япмагъанымны озюнъ де яхшы билесинъ.

¹¹Эгер мен олюмге ляйыкъ бир джинаетте къабаатлы олсам, олюмден баш тартмам. Эгер де бу адамлар мени къабаатлагъан шейлерни япмагъан олсам, мени оларнынъ къолуна бермеге ич кимсенинъ акъкъы ёкъ. Мен императорнынъ укюмини талап этем, — деди.

¹²Фест меслеатчыларынен акъыл танышкъан сонъ, Павелге джевап берип: — Сен императорнынъ укюмини талап эттинъ, императорнынъ алдына бараджакъсынъ, — деди.

¹³Бир къач куньден сонъ, падиша Агриппа ве Бернике, Фестнен селямлашмакъ ичюн Кайсареягъа кельдилер.

¹⁴Олар о ерде бир къач кунь отургъан сонъ, Фест Павелнинъ ишини падишагъа айтып берди: — Бу ерде бир адам бар, Феликс оны къапалы къалдырып кеткен.

¹⁵Мен Ерусалимде олгъанымда, еудийлернинъ баш руханийлери ве акъсакъаллары шикяетнен алдыма келип, оны суд этмекни талап эттилер.

¹⁶Мен оларгъа: «Биринджиден, къабаатлангъан адам къабаатлагъанларнен корюшмек ве онъа юклеген къабаатлавлардан озюни къорчаламагъа имкян бермек керек. Бу шейсиз адамны суд этмек римлилернинъ адети дегиль», — деп джевап бердим.

¹⁷Шунынъ ичюн олар бу ерге кельгенде, мен, вакъыт джоймайып, эртеси куню къады курсюсине отурып, бу адамны алып кельгенлерини буюрдым.

¹⁸Лякин къабаатлагъанлар оны сарып алып, мен беклеген къабаатлавлардан ич бирини онынъ бойнуна юклеп оламадылар.

¹⁹Тек озь дининен багълы меселелер ве насылдыр ольген Иса адлы бир адам акъкъында давалары бар эди. Павел Оны тири, деп тасдыкълай эди.

²⁰Мен бу меселени насыл этип чезмеге бильмегеним ичюн, Павел Ерусалимге барып, анда бу ишни укюм этильмесине истер-истемегенини сорадым.

²¹Лякин Павел бу ишни императорнынъ махкемесине къалдырылмасыны талап эткени себебинден, оны императорнынъ алдына ёлламагъандже къапалы тутмакъ акъкъында эмир бердим, — деди.

²²Агриппа Фестке: — Бу адамны мен де динълемеге истер эдим, — деди. — Сен оны ярын динълерсинъ, — деди Фест.

²³Эртеси куню Агриппанен Бернике буюк тантананен келип, бинъбашылар ве шеэрнинъ энъ урьметли адамларынен берабер корюшюв одасына кирдилер. Фестнинъ эмиринен Павел алып кетирильди.

²⁴Фест сёз алып: — Падиша Агриппа ве бизлернен берабер бу ерде топлашкъан эписи адамлар! Мына бу адамны корип турасынъыз. Ерусалимде ве шу ерде, еудийлернинъ эписи манъа мураджаат этип, бу адам ольмек керек, деп къычырдылар.

²⁵Мен исе, онынъ олюмге ляйыкъ ич бир иш япкъаныны тапмадым. Онынъ озю императорнынъ махкеме этильмесини талап эткени ичюн, оны онъа ёлламагъа къарар бердим.

²⁶Тек эфендиге онынъ акъкъында не язаджагъымны бильмейим. Шунынъ ичюн оны эпинъизнинъ алдынъызгъа, ве айрыджа, падиша Агриппа, сенинъ алдынъа бу ишни бакъып чыкъкъандан сонъ язмакъ ичюн бир шейлер тапылыр деп, оны чыкъардым.

²⁷Чюнки меним фикиримдже, бир мабюсны ёллап, онъа къаршы къоюлгъан къабаатларыны косьтермемек мантыкъсыз олур эди.