Read Мукъаддес Китап къырымтатар тилинде, Фаалиет 28 Bible Online

Фаалиет 28 - Мукъаддес Китап къырымтатар тилинде, bible

Фаалиет 28

¹Къуртулгъанымыздан сонъ, аданынъ Мальта олгъаныны бильдик.

²Ерли халкъ бизге адеттен тыш инсаниетлик косьтерди. Ягъмур ягъып сувукъ олгъаны ичюн, олар атеш якъып, эпимизни къабул эттилер.

³Павел бир къучакъ пытакъ топлап, атешнинъ устюне къойгъанда, янгъындан къачаяткъан бир зеэрли йылан онынъ къолуна сарылып къалды.

⁴Павелнинъ къолуна йылан асылгъаныны корьген ерлилер бир-бирине: «Бу адам къатиль гъалиба. Денъизден къуртулса да, адалет алласы оны тири къалдырмайджакъ!» — дедилер.

⁵Павел исе ич бир зарар корьмейип, йыланны атешке силькип ташлады.

⁶Аданынъ сакинлери онынъ шишип кеткенини я да олип къалып, бирден ерге йыкъылгъаныны бекледилер. Лякин чокъ вакъыт беклеп, онъа ич бир шей олмагъаныны корьген сонъ, башкъаджа фикир этип: «О, бир алладыр», — дедилер.

⁷О ернинъ якъынында аданынъ башлыгъы олгъан Публий адлы бир адамнынъ топрагъы бар эди. О, бизни къабул этип, учь кунь ачыкъ гонъюльнен мусафир этти.

⁸Публийнинъ бабасы къанлы исалгъа огърап, юксек сыджагъынен хаста ята эди. Павел онынъ янына кирди ве къолларыны онынъ устюне къойгъанда дува окъуп, оны тедавийледи.

⁹Бу адиседен сонъ аданынъ башкъа хасталары да онъа келип, тедавийлендилер.

¹⁰Олар бизге буюк урьмет косьтердилер ве чыкъаджагъымызда ёлда керек оладжакъ тюрлю шейлерни бердилер.

¹¹Учь айдан сонъ, Эскендериеден кельген, шу адада къышны кечирген Эгизлер [15] адлы бир гемиде ёлгъа чыкътыкъ.

¹²Сиракузагъа барып, о ерде учь кунь отурдыкъ.

¹³О ерден чыкъып, Региягъа кельдик. Бир куньден сонъ дженюбий ель эсип башлагъанда, эки куньде Путеоллар шеэрине етип бардыкъ.

¹⁴О ерде базы дин къардашларны таптыкъ. Оларнынъ риджасынен разы олып, анда еди кунь мусафир олдыкъ. Сонъ Римге етип кельдик.

¹⁵О ердеки дин къардашлар кельгенимизни эшитип, Аппий Форумы ве Учь Мусафирханеге къадар келип, бизни къаршылап алдылар. Павел оларны корип, Аллагъа шукюр этти ве онынъ гонълю котерильди.

¹⁶Римге киргенимизден сонъ, Павелге айры яшамагъа рухсет эттилер. Тек оны къаравуллагъан бир аскер онен берабер отурмакъ керек эди.

¹⁷Учь куньден сонъ Павел еудийлернинъ энъ сайгъылы адамларыны бир ерге чагъырды. Олар топлашкъанда, о: — Дин къардашларымыз! Мен халкъымызгъа я да бабаларымызнынъ адетлерине къаршы ич бир шей япмасам да, мабюс олып, Ерусалимден римлилернинъ къолуна берильдим.

¹⁸Олар да мени соргъу япып, азат этмеге истедилер, чюнки олюмге ляйыкъ ич бир къабаатымны тапмадылар.

¹⁹Лякин еудийлер бунъа къаршы чыкъкъаны ичюн, мен императорнынъ укюмини талап этмеге меджбур олдым. Амма мен буны халкъымны бир шейде къабаатламакъ ичюн япмадым.

²⁰Шу себептен де сизлернен корюшип лаф этмеге истедим. Мен Исраильнинъ умюти огърунда бу зынджырларнен багълым, — деди.

²¹Олар джевап берип: — Сенинъ акъкъынъда Еудиеден ич бир мектюп алмадыкъ, о ерден кельген дин къардашлар да бизге ич бир хабер я да яман сёз айтмады.

²²Бунъа бакъмадан, насыл фикир эткенинъни сенден эшитмеге истеймиз, чюнки бу огретювге эр ерде къаршы чыкъкъанларыны билемиз, — дедилер.

²³Павел ичюн бир кунь тайинлеп, о яшагъан эвге пек чокъ адам кельди. Сабадан акъшамгъадже Павел оларгъа Алланынъ Падишалыгъы акъкъында айтып, шаатлыкъ этти. Мусанынъ Къанунындан ве Пейгъамберлернинъ Языларындан алып, Иса акъкъында ишанчлы делиллер кетире эди.

²⁴Онынъ айткъанларына базылары инанды, базылары исе инанмадылар.

²⁵Олар озьара анълашмайып къайтаджакъта, Павел оларгъа бир сёз айтты: — Мукъаддес Рух Ешая пейгъамбернен бабаларымызгъа догъру айткъан:

²⁶«Бу халкъкъа барып айт: „Къулакъларынъызнен динълейджексиз, амма анъламайджакъсыз, козьлеринъизнен бакъаджакъсыз, амма корип оламайджакъсыз.

²⁷Бу халкънынъ юреги бир шей анълап оламай, къулакълары агъыр эшите, оларнынъ козьлери де юмулгъан. Бойледже, олар козьлеринен корьмезлер, къулакъларынен эшитмезлер, акъылларынен анъламазлар. О бизлерни тедавийлер, деп Манъа кельмезлер”».

²⁸[28-29] Шуны билинъ ки: Алланынъ бу къуртарувы акъкъында хабер энди башкъа халкъларгъа ёлланылгъан, олар исе эшитеджеклер!

³⁰Павел кирагъа алгъан эвинде толу эки йыл отурды. Онынъ алдына кельгенлернинъ эписини къабул эте эди.

³¹О, джесаретнен ве къаршылыкъ корьмейип Алланынъ Падишалыгъыны илян эте ве Рабби Иса Месих акъкъында огрете эди.