Read Мукъаддес Китап къырымтатар тилинде, Фаалиет 3 Bible Online

Фаалиет 3 - Мукъаддес Китап къырымтатар тилинде, bible

Фаалиет 3

¹Куньлернинъ биринде Пётр ве Юхан берабер дува вакътында, саат учьте Алланынъ Сарайына кете эдилер.

²О ерге анадан догъма юрип оламагъан бир адам кетириле эди. Оны, Сарайгъа киреяткъанлардан садакъа тилемек ичюн, эр кунь Сарайнынъ Гузель деген къапусы янына къоя эдилер.

³О, Сарайгъа кирип келеяткъан Пётр ве Юханны корьгенинен, олардан да садакъа истеди.

⁴Пётрнен Юхан исе козьлерини онъа тиктилер: — Бизлерге бакъ! — деди Пётр.

⁵О адам олардан бир шей аладжагъына умют этип, оларгъа дикъкъатнен бакъты.

⁶Пётр онъа: — Менде кумюш ве алтын ёкъ, амма озюмде олгъаныны санъа берем: назаретли Иса Месихнинъ адындан санъа айтам: еринъден турып юр! — деди де,

⁷онынъ онъ къолуны тутып, аякъ устюне турсатты. Бирден онынъ табанларынен балдырлары къавийлештилер.

⁸О атылып турды да, юре башлады. Аллагъа шукюр этип, къувангъанындан секире-секире, оларнен Сарайгъа кирди.

⁹Бутюн халкъ о адамнынъ Аллагъа шукюр этип кельгенини корьди.

¹⁰Сарайнынъ Гузель деген къапусы янында садакъа тилеп отургъан адамнынъ озю олгъаныны анълагъан сонъ, онен олгъан шейни корип, эписи тааджипленди ве пек шашып къалдылар.

¹¹Тедавийленген адам Пётрнен Юханнынъ артындан къалмагъаны ичюн, бутюн тааджипленген халкъ оларнынъ янына, Сулейманнынъ Эйванына чапып кельди.

¹²Пётр буны корип, халкъкъа деди: — Эй Исраиль акъайлары! Не ичюн бунъа тааджиплендинъиз? Бизлерге ойле бакъасыз ки, санки биз о адамгъа буны озь къудретимиз я да диндарлыгъымызнен яптыкъ ве о юре башлады.

¹³Мына, Ибраим, Исхакъ ве Якъупнынъ Алласы — бабаларымызнынъ Алласы Озюнинъ къулу Исаны юксельтип шерефледи. Сизлер исе Оны саттынъыз. Пилат Оны йибереджек олгъанда, сиз онынъ огюнде Исадан ред эттинъиз.

¹⁴Адам ольдюрген джинаетчининъ афу этильмесини сорап, Мукъаддес ве Инсафлы Олгъанындан ред эттинъиз.

¹⁵Аят Башлайыджысыны исе ольдюрдинъиз. Амма Алла Оны олюлер арасындан чыкъарды, ве биз бунъа шаатлыкъ этемиз.

¹⁶Бу, сизлер корьген ве бильген адам исе Исанынъ адынен, Онынъ адына инангъаны себебинден къавийлешти. Исадан кельген иманнен исе о, эпинъизнинъ козю огюнде сап-сагълам олып турды.

¹⁷Амма, дин къардашларым, башлыкъларынъыз киби сизлер де бу ишни бильмегенинъизден япкъанынъызны билем.

¹⁸Алла да эписи Озь пейгъамберлернинъ агъызлары иле Месихнинъ азап чекеджегини эвельден хабер эткен эди ве Озь сёзюни беджерди.

¹⁹Бунынънен, гуналарынъыз багъышланмасы ичюн тёвбе этинъиз ве Алланынъ ёлуна къайтынъыз.

²⁰Сонъ О сизлерге раатлыкъ вакътыны багъышласын ве эвельден тайинленген Иса Месихни алдынъызгъа ёлласын.

²¹Бутюн дюньяны янъыдан къурмагъа вакъыт кельмегендже, коклер Исаны алмакъ керек эди. Алла шуны азиз пейгъамберлернен къадимий вакъытлардан берли бильдирген эди.

²²Муса: «Раббинъиз олгъан Алланъыз сизлерге агъа-къардашларынъыз арасындан мен киби Пейгъамберни ёллайджакъ. Бутюн ишлерде сизлерге нени айтса, Онъа къулакъ асынъыз.

²³О Пейгъамберге къулакъ асмагъан эр бир джан озь халкъы арасындан къырылып кетеджек», — деди.

²⁴Бойледже, Смаил пейгъамберден башлап, ондан сонъ хабер эткен бутюн пейгъамберлер де бу куньлер акъкъында айткъанлар.

²⁵Сиз исе пейгъамберлернинъ эвлятларысынъыз ве Алла баба-деделеринъизге берген васиетнинъ мирасчыларысынъыз. Алла Ибраимге: «Сенинъ эвлядынъ ичюн ер юзюндеки бутюн халкълар яхшылыкъ кореджеклер», — деди.

²⁶Алла, Озюнинъ къулуны тирильтип, эр биринъизни яман ишлеринъизден къайтарып бойле яхшылыкъ япсын деп, Оны башта сизлерге ёллады.