Read Мукъаддес Китап къырымтатар тилинде, Фаалиет 4 Bible Online

Фаалиет 4 - Мукъаддес Китап къырымтатар тилинде, bible

Фаалиет 4

¹Пётрнен Юхан халкънен лакъырды этип тургъанда, оларгъа руханийлер, Алла Сарайынынъ къаравул башы ве саддукийлер якъынлаштылар.

²Олар халкъны огреткенлери ве Исанынъ ярдымынен олюлернинъ тирильгени акъкъында айткъанлары ичюн, кельген адамлар пек ачувлангъан эди.

³Пётрнен Юханны туттылар, ве энди вакъыт кеч олгъаны ичюн, сабагъадже оларны апске алдылар.

⁴Хаберни эшиткенлернинъ чокълары исе иман эттилер, ве бу адамларнынъ сайысы беш бинъге якъын олды.

⁵Эртеси куню еудийлернинъ башлыкълары, акъсакъаллары ве Къанун оджалары Ерусалимде топландылар.

⁶Баш руханий Аннас ве баш руханийнинъ союндан олгъан Каяфа, Юхан, Эскендер ве башкъалары шу ерде эдилер.

⁷Эки эльчини ортагъа турсатып, олардан: — Сизлер насыл къудретнен ве кимнинъ адындан бу шейлерни яптынъыз? — деп сорадылар.

⁸Мукъаддес Рухкъа толгъан Пётр оларгъа: — Эй, халкънынъ башлыкълары ве акъсакъаллары!

⁹Эгер бугунь бир хаста адамгъа япылгъан эйилик, онынъ насыл тедавийленгени акъкъында бизден джевап талап этсенъиз,

¹⁰эпинъизге ве бутюн Исраиль халкъына белли олсун ки, сизлер хачкъа мыхлап къойгъан, Алла исе тирильткен назаретли Иса Месихнинъ ады ярдымынен бу адам огюнъизде сап-сагълам тура.

¹¹Бу Иса — «сиз, къуруджылар, четке ташлагъан, лякин темель таш олгъан таштыр».

¹²Башкъа ич кимседен къуртарув ёкъ. Бизге къуртулмакъ ичюн, кокнинъ тюбюнде адамларгъа берильген тек бу ад бар, ич бир башкъа ад ёкъ, — деди.

¹³Руханийлер, Пётр ве Юханнынъ джесаретини корип, олар окъумагъан, адий адамлар олгъаныны билип, пек тааджиплендилер. Сонъ олар Исанен олгъанларыны анъладылар.

¹⁴Тедавийленген адамны да оларнен берабер тургъаныны корип, оларгъа къаршы ич бир шей айтып оламадылар.

¹⁵Эльчилерге Шурадан тышарыгъа чыкъмакъны буюрып, озьара музакере эттилер.

¹⁶— Бу адамларгъа не япайыкъ? Оларнынъ къолунен ачыкътан-ачыкъ бир аджайип шей япылгъаныны Ерусалимде яшагъанларнынъ эписи билип алды! Бизлер буны ред эталмамыз.

¹⁷Лякин халкъ арасында бу лаф даа чокъ даркъалмамасы ичюн, оларны къоркъузармыз, ве бу ад акъкъында башкъа ич кимсеге айтмасынлар, — дедилер олар.

¹⁸Сонъ оларны чагъырып, Исанынъ адыны тильге алып ич кимсени огретменъиз, деп буюрдылар.

¹⁹Лякин Пётр ве Юхан оларгъа джевап берип: — Озьлеринъиз къарар чыкъарынъыз, сизлерни Алладан зияде динълемеге Алланынъ огюнде догъру оладжакъмы?

²⁰Биз корьген-эшиткенлеримизни айтмайып оламамыз, — дедилер.

²¹Олар акъайларны джезаламакъ ичюн ич бир мана тапмагъан сонъ, оларны даа бир кере къоркъузып, йибердилер. Руханийлер халкътан къоркътылар, чюнки эписи адамлар олгъан шей ичюн Аллагъа шукюр эте эдилер.

²²Аджайип шей нетиджесинде тедавийленген адамнынъ яшы исе къыркътан кечкен эди.

²³Пётрнен Юхан азат олунгъан сонъ, достларынынъ янына барып, оларгъа баш руханийлернен акъсакъалларнынъ айткъанларыны хабер эттилер.

²⁴Олар буны эшиткенинен, бир агъыздан Аллагъа: — Эй Укюмдар, ерни, кокни, денъизни ве оларнынъ ичиндеки эр шейни яраткъан Алла!

²⁵Сен Мукъаддес Рухнен, Озь къулунъ олгъан бабамыз Давутнынъ агъзынен айткъансынъ: «Башкъа миллетлер не ичюн исьян котерелер? Халкълар не ичюн бош шейни уйдуралар?

²⁶Дюнья падишалары баш котерди, башлыкълар бирликте Рабби ве Месихке къаршы топлаштылар».

²⁷Эм акъикъатен, Ироднен Понтий Пилат бу шеэрде Исраиль халкъы ве башкъа миллетлернен берабер, Сен Месих деп тайинлеген азиз къулунъ Исагъа къаршы бирликте чыкътылар.

²⁸Олар, Сен Озь къудретинънен ве ираденънен эвельден бельгилеген ишлернинъ эписини беджердилер.

²⁹Энди, Рабби, оларнынъ къоркъузгъанларына бакъ ве Сенинъ сёзюнъни толу джесаретнен айтмакъ къуветини къулларынъа бер.

³⁰Азиз къулунъ Исанынъ адынен адамларны тедавийлемек ве тюрлю бельгилер, аджайип шейлер япмакъ ичюн къолунъны узат! — дедилер.

³¹Дува окъугъан сонъ, олар топлашкъан ер тепренди. Эписи Мукъаддес Рухкъа толып, Алланынъ сёзюни джесаретнен айта башладылар.

³²Инангъанларнынъ бутюн джемааты бир джан ве бир юрек эди. Ич бир адам мулькюнден ич бир шейге менимки демез, эписини умумий деп сая эди.

³³Эльчилер исе Рабби Исанынъ тирилюви акъкъында буюк кучьнен шаатлыкъ этти, ве оларнынъ эписине чокъ хайыр берильген эди.

³⁴Араларында мухтадж адам ёкъ эди. Чюнки топрагъы я да эвлери олгъанларнынъ мулькюни сатып, акъчасыны кетире

³⁵ве эльчилернинъ элине бере. Сонъ акъча эр кеске, ихтияджына коре дагъытыла эди.

³⁶Анда Юсуф адлы, Къыбрыста [2] догъгъан бир левийли бар эди. Эльчилер онъа Барнаба, яни «Гонъюль Алыджы» деген ад бергенлер.

³⁷Онынъ бир тарласы бар эди. Оны сатып, акъчасыны эльчилернинъ аякълары тюбюне кетирип къойды.