Read Мукъаддес Китап къырымтатар тилинде, Фаалиет 5 Bible Online

Фаалиет 5 - Мукъаддес Китап къырымтатар тилинде, bible

Фаалиет 5

¹Анания адлы бир адам ве онынъ апайы Сапфира бар эдилер. Бу адам топрагъыны сатып,

²акъчанынъ бир къысмыны алып сакълады, апайы да буны биле эди, бир къысымыны исе кетирип эльчилернинъ аякълары тюбюне къойды.

³Пётр онъа: — Эй Анания, насыл олды да, сен Иблиске юрегинъни берип, Мукъаддес Рухкъа ялан айттынъ ве тарланынъ акъчасындан бир къысмыны алып сакъладынъ?

⁴Сатмаздан эвель эписи сенинъки эди. Сатылгъандан сонъ да акъчанынъ эписи сенинъ къолунъда эди. Не ичюн юрегинъде бойле ниет беслединъ? Сен адамларгъа дегиль, Аллагъа ялан айттынъ, — деди.

⁵Анания бу сёзлерни эшиткенинен джан берип ерге йыкъылды. Буны бильгенлернинъ эписини къатты бир къоркъу къаплап алды.

⁶Йигитлер олюни сардылар ве тышарыгъа чыкъарып дефн эттилер.

⁷Къарарнен учь саат кечкен сонъ, олып кечкен вакъиадан хабери олмагъан Ананиянынъ апайы да кельди.

⁸Пётр онъа: — Айт манъа, тарланъызны бойле фияткъа саттынъызмы? — деди. — Эбет, бойле фияткъа, — деди къадын.

⁹Пётр: — Сиз не ичюн Алланынъ Рухуны сынап бакъмагъа анълаштынъыз? Мына, шимди акъайынъны дефн эткенлернинъ адымлары къапу янында эшитилелер. Энди сени де тышарыгъа алып чыкъаджакълар, — деди.

¹⁰Шу ань къадын, джан берип, Пётрнынъ аякълары алдына йыкъылды. Йигитлер ичериге кирип, онынъ ольгенини корьдилер. Олюсини тышарыгъа чыкъарып, акъайынынъ янында дефн эттилер.

¹¹Бу вакъиаларны эшиткен бутюн иманлылар топлашувыны ве башкъаларнынъ эписини къатты бир къоркъу къаплап алды.

¹²Халкъ арасында эльчилернинъ къолларынен чокъ аджайип шейлер ве бельгилер яратыла эди. Эписи иманлылар бир-биринен разы олып Сулейманнынъ Эйванында топлаштылар.

¹³Халкъ эльчилерни шерефлеген олса да, тышарыдан ич кимсенинъ оларгъа къошулмагъа джесарети етмей эди.

¹⁴Раббиге иман эткенлернинъ исе, эркек ве къадынларнынъ сайысы эп арта эди.

¹⁵Пётр кечип кетеяткъанда, ич олмадым онынъ кольгеси биле базыларнынъ устюне тюшсюн деп, хасталарны сокъакъларгъа чыкъарып, сетлер ве тёшеклер устюне яткъызып къоя эдилер.

¹⁶Ерусалимнинъ этрафындаки шеэрлерден де чокъ адам келип, озьлерининъ хасталарыны ве арам рухлардан къыйналгъан адамларны кетирдилер. Чекишкенлернинъ эписи исе тедавийлендилер.

¹⁷О вакъыт баш руханий ве онен берабер саддукий фыркъасынынъ эписи азалары пахыллап,

¹⁸эльчилерни якъалап, девлет зинданына ташладылар.

¹⁹Лякин Раббининъ мелеги гедже зинданнынъ къапуларыны ачып, оларны тышарыгъа чыкъарды.

²⁰— Барынъыз да, Алланынъ Сарайында турып, бу омюр берген сёзлернинъ эписини халкъкъа айта беринъиз! — деди мелек.

²¹Эльчилер онынъ сёзлерини динълеп, саба эрте Алланынъ Сарайына келип адамларны огрете башладылар. Баш руханий ве онен берабер олгъанлар исе келип, Исраиль халкъынынъ эписи акъсакъалларыны ве Юксек Шураны топладылар да, эльчилерни кетирмек ичюн зиндангъа адамларны йибердилер.

²²Лякин хызметчилер барып, зинданда оларны тапмайып, къайтып кельдилер ве:

²³— Биз зинданны буюк мукъайтлыкънен килитленген ве къаравулларны къапулар алдында тургъан алда корьдик. Амма ачып бакъкъанымызда, ичинде ич кимсени тапмадыкъ, — деген хаберни бердилер.

²⁴Сарайнынъ къаравул башы ве баш руханийлер бу сёзлерни эшитип, шу вакъианынъ манасыны анъламайып, шаштылар.

²⁵О вакъыт бир адам хабер кетирип: — Мына, сизлер зиндангъа ташлагъан адамлар Алланынъ Сарайында халкъны огретелер, — деди.

²⁶Къаравул башы хызметчилеринен берабер барып, оларны алып кельди. Лякин, халкъ бизлерни ташларнен урар, деп, къоркъкъанлары ичюн оларны зорламайып кетирдилер.

²⁷Эльчилерни алып келип, Юксек Шура алдына турсаттылар. Баш руханий оларгъа суаль берди:

²⁸— Бу ад эсасында огретменъиз, деп, сизлерге къаттыдан ясакъ этмеген эдикми? Мына, огретювинъизнен бутюн Ерусалимни толдурдынъыз ве бу адамнынъ къаныны бизим бойнумызгъа юклемеге истейсиз, — деди.

²⁹Пётр ве башкъа эльчилер джевап берип: — Адамлардан эвель Аллагъа бойсунмакъ керек.

³⁰Сизлер агъачкъа асып ольдюрген Исаны баба-деделеримизнинъ Алласы тирильтти.

³¹Исраиль халкъы гуналарындан тёвбе этсин ве багъышлав алсын деп, Алла Исаны Озь къудретинен юксельтип, Укюмдар ве Къуртарыджы этип къойды.

³²Бизлер бу ишлернинъ шаатлары оламыз. Шунынънен, Алланынъ сёзюни туткъанларгъа берильген Мукъаддес Рух да шаат олды, — дедилер.

³³Шура азалары буны эшитип, пек ачувландылар да, эльчилерни ольдюрмеге истедилер.

³⁴Лякин о вакъыт бир ферисе, бутюн халкънынъ урьметини къазангъан Гамалиэль адлы Къанун оджасы, Шурада еринден турып, эльчилерни къыскъа вакъыткъа тышарыгъа чыкъармакъны буюрды.

³⁵Сонъ Шура азаларына: — Эй Исраиль акъайлары, бу адамларгъа не япаджагъынъызны яхшы этип тюшюнинъиз!

³⁶Мына, бундан эвель озюни бир буюк адам киби косьтерген Тевда пейда олды, ве онъа дёрт юз адам къошулды. О ольдюрильди, онъа къошулгъанларнынъ эписи исе даркъалып, ёкъ олып кеттилер.

³⁷Ондан сонъ, эалини джедвельге алув кечирильген вакъытта галилеялы Иуда пейда олып, баягъы халкъны озюнинъ артындан алып кетти. Лякин о да гъайып олды, ве онынъ артындан кеткенлер даркъалып кеттилер.

³⁸Энди сизлер бу адамлардан къол тартынъыз, дейим, оларны йиберинъиз! Чюнки, эгер бу къоюлгъан макъсат, я да бу арекет инсан иши олса, озь-озюнен гъайып оладжакъ.

³⁹Амма Алладан олса, сизлер оны бозып оламазсынъыз. Даа сиз де Аллагъа къаршы дженк эткенлерден олып къалманъыз! — деди. Шура азалары Гамалиэльнинъ сёзюне къандылар.

⁴⁰Эльчилерни чагъырып, оларны къамчыламагъа буюрдылар. Сонъ Иса адындан адамларны огретмеге ясакъ этип, оларны йибердилер.

⁴¹Эльчилер исе, Рабби Исанынъ ады ичюн масхара олдыкъ, деп къуванып, Шурадан чыкъып кеттилер.

⁴²Олар эр кунь Алланынъ Сарайында ве эвлерде адамларны огретип, Иса Месих акъкъындаки Къуванчлы Хаберни токътамайып даркъата эдилер.