Read Мукъаддес Китап къырымтатар тилинде, Фаалиет 6 Bible Online

Фаалиет 6 - Мукъаддес Китап къырымтатар тилинде, bible

Фаалиет 6

¹Исанынъ шегиртлери эп чокълашкъан вакъытта юнан тилинде лаф эткен еудийлер, оларнынъ арасында тул къадынларгъа куньделик ярдым башкъаларындан аз бериле, деп, ерли еудийлерге къаршы мемнюниетсизлигини косьтерди.

²Ана шу себептен, он эки эльчи Исанынъ эписи шегиртлерини чагъырып: — Биз Алланынъ Сёзюни огретюв ишини четке къалдырып, софрагъа хызмет этмеге яхшы дегиль.

³Эй дин къардашларымыз, энди озюни яхшы тарафтан косьтерген, эм де Мукъаддес Рух ве акъылгъа толып-ташкъан еди адамны аранъыздан сайлап алынъыз; оларны бу хызметке тайин этермиз.

⁴Бизлер исе дуваларнен ве Алланынъ Сёзюни огретюв хызметинен мешгъуль олайыкъ, — дедилер.

⁵Бу теклифни бутюн джемиет бегенди. Олар, иманы къатты ве Мукъаддес Рухкъа толгъан Стефан адлы адам иле, Филип, Прохор, Никанор, Тимон, Пармен ве еудий динини къабул эткен антиохиялы Николайны сайладылар.

⁶Оларны эльчилернинъ алдына турсатып къойдылар. Эльчилер исе оларнынъ башларына къолларыны къойып дува окъудылар.

⁷Бойледже, Алланынъ Сёзю даркъатылгъан сайын, Ерусалимде Исанынъ шегиртлерининъ сайысы эп арта эди. Руханийлернинъ де чокълары имангъа бойсундылар.

⁸О вакъыт Алланынъ хайырына ве къудретине толгъан Стефан халкъ арасында буюк бельгилер косьтере ве аджайип шейлер япа эди.

⁹Лякин Азат олгъанларнынъ синагогасындан [3] базылары, эм де Киренеден, Эскендериеден, Киликиядан ве Кучюк Асиядан олгъан адамлар Стефаннен дава этип башладылар.

¹⁰Амма онынъ сёзюндеки икмет ве Рухкъа къаршы чыкъып оламадылар.

¹¹Шунынъ ичюн олар базы адамларгъа: — Бу адам Муса ве Аллагъа къаршы куфюр сёзлер айткъаныны эшиттик, — дегенлери ичюн пара бердилер.

¹²Бойледже олар халкъны ве акъсакъалларнен Къанун оджаларыны къозгъалап, Стефангъа уджюм эттилер де, оны тутып Шуранынъ алдына кетирдилер.

¹³Ялан айткъан шаатларны ёллап, оларгъа буны айттырдылар: — Бу адам эр вакъыт бу мукъаддес ерни ве Къанунны яманлап юре.

¹⁴Назаретли Иса бу ерни виран этип, Мусанынъ бизлерге берген урф-адетлерини денъиштиреджек, дегенини эшиттик.

¹⁵О вакъыт Шурада отургъанларнынъ эписи Стефангъа тикилип бакътылар, ве онынъ бети бир мелекнинъ бетине ошап къалгъаныны корьдилер.