Read Мукъаддес Китап къырымтатар тилинде, Фаалиет 8 Bible Online

Фаалиет 8 - Мукъаддес Китап къырымтатар тилинде, bible

Фаалиет 8

¹Стефаннынъ ольдюрильмесине Саул разы эди. О куннинъ озюнде Ерусалимдеки иманлыларнынъ джемаатыны пек къуваламагъа башладылар. Эльчилерден гъайры эписи иманлылар Еудие ве Самариенинъ эр тарафына дагъылып кеттилер.

²Диндар адамлар Стефанны дефн этип, онынъ артындан пек агълаштылар.

³Саул исе иманлылар топлашувыны тар-мар эте эди. Эв-эвден юрип, акъаймы, къадынмы, эписини сюйреклеп зиндангъа ташлады.

⁴Шу арада дагъылып кеткенлер Къуванчлы Хаберни даркъатып юрдилер.

⁵Филип бир Самарие шеэрине келип, онынъ сакинлерине Месих акъкъында айта эди.

⁶Филипнинъ сёзюни эшитип ве о косьтерген бельгилерни корип, бутюн халкъ бир джан олып оны динъледи.

⁷Чюнки арам рухларгъа огърагъан чокъ адамлардан рухлар кучьлю сеснен къычырып чыкъты, не къадар паралич ургъанлар ве сакъатлар тедавийлендилер.

⁸Бойледже, о шеэрде буюк къуванч бар эди.

⁹Бу шеэрде тылсымджылыкъ япкъан, озюни буюк бир адам киби туткъан, Самарие мемлекетининъ халкъыны шашырып къалдыргъан Симон адлы бир адам бар эди.

¹⁰Буюктен кучюгинедже эписи оны дикъкъатнен динълеп: «О — Алланынъ къудрети, о, „Балабан Къудрет” дениле!» — дей эдилер.

¹¹Симон чокъ вакъыттан берли озюнинъ тылсымларынен халкъны шашыргъаны ичюн, эписи оны динълей эди.

¹²Лякин Алланынъ Падишалыгъы ве Иса Месих акъкъындаки Къуванчлы Хаберни кетирген Филипни динълеп, акъай ве къадынлар онынъ сёзюне инанды ве сувгъа батырылып чыкътылар.

¹³Симоннынъ озю де инанып, сувгъа батырылып чыкъты. О, Филип косьтерген бельгилерини ве къудретнен япкъан аджайип шейлерини корьген сайын шашып, Филипнинъ янындан кетмей эди.

¹⁴Ерусалимде къалгъан эльчилер исе, Самарие сакинлери де Алланынъ Сёзюни къабул эткенлерини эшиткенде, Пётрнен Юханны оларнынъ алдына ёлладылар.

¹⁵Олар о ерге келип, самариелилер Мукъаддес Рухны къабул этмек ичюн дува окъудылар.

¹⁶Чюнки оларнынъ ич бирисине Мукъаддес Рух тюшмеген эди. Олар тек Рабби Исанынъ адына сувгъа батырылып чыкътылар.

¹⁷Сонъ эльчилер оларнынъ башына къол тийдирдилер, ве олар Мукъаддес Рухны къабул эттилер.

¹⁸Эльчилернинъ къол тийдиргенинен Мукъаддес Рух берильгенини корип, Симон оларгъа акъча кетирди де:

¹⁹— Манъа да бу къудретни беринъиз, кимнинъ башына къолларымнен тийсем, Мукъаддес Рухны къабул этсин! — деди.

²⁰Лякин Пётр онъа: — Кумюшинъ сеннен берабер гъайып олсун, чюнки сен Алланынъ бахшышыны парагъа алмакъ мумкюн, деп беллей эдинъ!

²¹Бу иште сенинъ не акъкъынъ бар ве не къысметинъ бар, чюнки Алланынъ огюнде юрегинъ догъру дегиль.

²²Энди бу яманлыгъынъдан тёвбе этип Аллагъа ялвар, бельки юрегинъдеки ниетинъни багъышлар.

²³Чюнки сенинъ аджджы зеэрге толгъанынъны ве адалетсизлик зынджырына багълангъанынъны корем, — деди.

²⁴Симон бунъа джевап берип: — Мен ичюн сизлер Раббинъизге ялварып дува окъунъыз, даа айткъанларынъыздан бириси башыма тюшмесин! — деди.

²⁵Сонъ олар о ерде Раббининъ Сёзюни илян этип, шаатлыкъ берген сонъ, Ерусалимге таба кеттилер ве Самариенинъ чокъ койлеринде Къуванчлы Хаберни даркъаттылар.

²⁶Сонъ Раббининъ мелеги Филипке: — Еринъден тур ве дженюп тарафкъа, Ерусалимден Гъазагъа баргъан сахра ёлуна бар! — деди.

²⁷Филип турып, ёлгъа чыкъты. О вакъыт Эфиопия къыраличеси Кандакенинъ везири, къыраличенинъ бутюн хазинелерине мудир олгъан эфиопиялы бир хадим озь ветанына къайтып кетеяткъан эди. О, Аллагъа бель букмек ичюн Ерусалимге барып кельген.

²⁸Арабасында отурып Ешая пейгъамбернинъ китабыны окъуй эди.

²⁹Мукъаддес Рух Филипке: — Бу арабагъа якъынлашып, янында кет! — деди.

³⁰Филип эфиопнынъ янына чапып барды. Онынъ Ешая пейгъамбернинъ китабыны окъуп отургъаныны эшитип: — Окъугъанынъны анълайсынъмы? — деп сорады.

³¹— Манъа ёл косьтерген адам олмаса, насыл анълайым? — деди эфиоп. Сонъ Филипни озь янына чыкъып отурмагъа давет этти.

³²Онынъ Языдан окъугъан ери бу эди: «Оны къой киби соймагъа айдап кетирдилер, къозу юнь къыркъкъан адамнынъ алдында индемейип тургъан киби, О да Озь агъзыны ачмады.

³³Оны масхараладылар. О, акъикъаттан къуру къалды, оны ашалап къабаатладылар. Онынъ несилини ким анъаджакъ? Ер юзюндеки омрю узюльди».

³⁴Везир Филипке бакъып: — Риджа этем, пейгъамбер буны ким акъкъында айта? Озю акъкъындамы, я да башкъа адам акъкъындамы? — деди.

³⁵Филип исе агъзыны ачып, шу язылгъан парчадан башлап, Иса акъкъындаки Къуванчлы Хаберни онъа анълатты.

³⁶[36-37] Ёлны девам этип кетеяткъанларында, сув олгъан бир ерге кельдилер. Везир: — Мына, сув! Меним сувгъа батырылып чыкъкъаныма не кедер эте? — деди.

³⁸О вакъыт арабаны токътатмагъа буюрып, Филипнен везир экиси сувгъа кирдилер, ве Филип оны сувгъа батырып чыкъарды.

³⁹Олар сувдан чыкъкъанда, Мукъаддес Рух Филипни котерип кетти. Везир оны бир даа корьмеди ве къуванып озь ёлуны девам этти.

⁴⁰Филип исе Ашдод шеэринде пейда олды ве Кайсареягъа баргъандже, эписи шеэрлерде Къуванчлы Хаберни даркъатып кельди.