Read daasanach Matááyo 10 Bible Online

Matááyo 10 - daasanach bible

Matááyo 10

¹Aaléka, Yíésu lalillé tomon a naamaká hol ˈdu gáá vie, gáál fargogint gaalí aryáán ubaa basham, tá fursam met lulle gálaat yiem gaa ˈdeđuoká shie.

²Gál láli tomon tikiˈde a naamáállá meetle hééllá: gál erkobká Símon giri gaalí Bétiro yegetká ubaa nyárlé Ánˈduru, Yákob giri iny Dhebeˈdayaká ubaa nyárlé Yuána,

³Fílib ubaa Bartolomáyo, Tómas ubaa Matááyo giri gálaat birm gaa gugusatká, Yákob giri iny Alfaayaká, ubaa Dhádias,

⁴Símon giri gál Rooma kansimle nebeneyká, tá Yúúˈdas Iskáryot máá waaséél Yíésu gál hí oos ˈgieká ˈdú eeyká.

⁵Yíésu gál tomon tikiˈde a naamáállá alb fie, gáál kieˈde, kieye, Haí lés gál gál Yuuˈdi muuninyká síen, héétí haí ˈjien Samaria é tikiˈd úba ki fáminy.

⁶Wala ˈbíl íl Yisirayel-, bađayká tákámle ˈdú seesemíe.

⁷Tá hí hol gaa seseennoká gálaat ki ˈdiiyimíe, Guch Waaˈgiet hé ká ˈjobonte, yiedhíe.

⁸Gál basham ˈguoká bisía, gál kufeká sidham geđi káa, gál nyókot hí faanneká ría, aryáán gálaat yiem gaa ˈdeeyyíe. Fargogintééllá hállééllá hí argiyye, hallééllá gálaat ki bisía.

⁹Hí seseennoká haí bíre horkiká ubaa bíre ííkarská, tá bíre sibilaam raagarká đafaraam af ki hísan.

¹⁰Tokolaam haí éen, kossam ubaa koiy nannam haí shúúnan, gasaram haí shúúnan. Máá hujich nannuoká hé ˈduuw máálle gálaat hé geer gaa aargiroká ˈguo.

¹¹Aaléka, ˈjien ubaa ény hí ki fafaannaká, máá hí uroká ebitíe, mú ˈbílle gaa yíéđía, ˈjíig af giri he hí kím yegetká.

¹²ˈBíl hí hillaká naanná naalle met naanatíe.

¹³Har gál ˈbil kinaalloká hí rokoˈd ki goleka, naannakícho hí gaal íín gaa yíéđiyyo. Har gaal hí rokoˈd ma ki golinyka, naannakícho itle hí hol ˈdu gáá naat.

¹⁴Tá har gálaat hí rokoˈd ki gogoloká điidhe-, ubaa gaal ˈdeenykícho nee ma kokonyka, af giri hí ˈbíl kinaal yíekaʼ, muuninyka, ény kinaal yíekaʼ hí yé gaa ˈdeˈdeennoká ˈgaskícho shére gaa ˈdodhdhíe.

¹⁵Yú hí hé ˈdúwaká geeye, kúlích gálaat Waag hí ˈdéé ki iđimichoká ali kí ˈdiiyyeka, gál eny kinaalloká manyjany il hí aargiˈdoká hé tág ˈdeew! Manyjany gál ˈjien Soˈdom ubaa gál ˈjien Gomora il hí aargiˈdoká úba ˈdiefiyya.

¹⁶Bá dhaayyíe, yú albo hí fafaa, hát wala đányar hursam gaa seseenká haí cheedhe. Aaléka, hát chárka ˈdaaliledhíe, hát hóleka sáa yiedhíe.

¹⁷Tá gálaat hol ˈdeeˈdemíe, gaal ar haí ˈdú egee, gaal énylé ˈdiiyiminyká haí gaa tuuna.

¹⁸ˈDaa giri itín hí lalichúká, gaal gál les met ki ˈgieká ubaa gál kaansúoká met haí siidha, tá gál kinaallá ubaa gál gál Yuuˈdi muuninyká metle ˈduuwchú haí gaa hogoto.

¹⁹Aaléka, gaalí ˈgiiliˈgayka, hé hí hogotoká tawunyle haí ˈgar aayáˈginy. Waag af kinaallá hé hí hogotoká a gerkícho haí ká fafiyya.

²⁰Af kinaallá ˈdeeny kíchia hí hogotoká hé itín dhúrkícho hí yé ma gáá ˈdeˈdeminy, Hím Naasan ˈJaa kíchia hí gaa iđoká in ˈdéé hogoto.

²¹Máádhat nyárlé hol ki ˈdalidheká ar gíl hai gaa kakaa, mú ha gaalí yeese. Héétí iny ˈjaalle ar gíl hai gaa kakaa, mú ha gaalí yeese. Um gállé hí ˈdaloká af hai ká điidhma, gáál kúfach mé hai ki kokoo.

²²Itín gálaat lulle ˈdaa meenychú ˈdugaka haí neebeedhe. Tá máá hééllá lulle mé ki chirsat-, ˈjíig he mé đig yeetká Waag haí rianna.

²³Ény gálle hí maanyjasuoká kar gaa ˈdóo, ény éíy taakaká mé náa. Tá yú hí hé ˈdúwaká geeye, itín ˈdaab yáá Iny Máádhátallá guchchú ma kí yímenká it ény Yisirayel lúl mé ma ki ˈdaraminy.

²⁴Máá láliká hé máállé hí he oonisuoká ma ˈdú ˈduwanany. Héétí gedech hé máállé he hujich ki nannuoká ma ˈdú ˈduwanany.

²⁵Máá láliká har hát máállé hí he oonisuoká yieka, hé kinaallá hí faagsuo. Héétí gedech har hát máállé he hujich ki nannuoká yieka, hé kinaallá geerle hí gaa meet. Gálaat har máá ˈbíl mé ki yaalká chacharo-, mú Belsebul yegetka, gál ˈbil kinaalloká chaarim gaalí ˈdú muuroká ebá súm ˈdéen! [32]

²⁶Tá gál hatallóóllá haí siermle ˈgíiny. Hé níínní gaalí kakaw-, Waag hí yé ma ká ˈdeđinyká mán. ˈDeeny gaalí les đireká yé hai ká ˈdeeme.

²⁷Hé yú hí tol egeet-, yú hí geđuoká, bííy mé édhká gaa hoogodhóo! ˈDeeny yú hí geey-, hí ye gaa maalleká é met ˈdug ˈdú ˈdée, ˈdiiyimíe.[33]

²⁸Haí gál gon yeges-, sidh ma yegesinyká kikían. Máá fargogínt ˈguo-, gálaat gónle ubaa sidhamle yeges-, gáál ˈjiet biiyoká ki lalaanká kiikiadhíe.

²⁹Húrúm niginiká naam hé bíre raar gaalí higiatká hí tikiˈd ma onnôny? Tá hurum hé húrmáách níínní úba hí úr gáá ˈjeˈjeen-, kufunanká mán, har ˈJaa kíchia Waag hí ma ká murinyka.

³⁰ˈDaakíchoka, metkícho dhúrlé hí gaa ˈgieká túóyle lulle hé Waag hí óg.

³¹Aaléka, sierm hayyíe, itín it húrúm burnayká súm ˈdú ˈdúwa.

³²Máá gálaat metle yú ye mááchú gaa yeetká, ˈJaa chia úr ijoká metle úba mááchú ha yú gaa yeedhe.

³³Tá máá gálaat metle ye gaa điidhoká, yú úba ˈJaa chia úr ijoká metle mú ha yú gaa điidhma.

³⁴Tawunykíchoka, haí kieye, Mu les ka yimíéllá naanná ká sidhe, haí chéen! Yáá naanná les ma ka sîn, yú oosó les ká sidhe.

³⁵Yú ka yimíéllá íny ubaa ˈjaallé, ini ubaa ˈjiellé, min ubaa suoglé hol eiy gaa ˈgiˈgidhia.

³⁶Tá máádhat gál hí súm neebeetká he mú gállé mú hol ˈbíl geer tikiˈd af ijoká.[34]

³⁷Máádhat har ye gielnítaka, hí gielmit ye ka ˈguo kinaallá hí gielmit muí ˈjaalle, ˈjielle, inyle, tá inille ka ˈguoká af ˈdú ˈderneyo. Har hát kinaal ma ˈdiinyka, hé mááchú muuniny.

³⁸Máá ˈgórlé đarám yaalká ma een-,[35] ye el ma gáá véérinyká, hé mááchú muuniny.

³⁹Máá sidh tág chiratká sídhle hai baađisia, máá sídhle ˈdaachúka bađisuoká sídhle hai riima.

⁴⁰Máá itín hí rokoˈd ki goloká yaa ye rokoˈd ki gole, tá máá yú dhúrchú ye rokoˈd ki goloká, máá kinaallá Máá ye ali gáá kaayká he rokoˈd ki gole.

⁴¹Máá máá Waag hí ˈdeem ka shigichoká rokoˈd ki goloká hé shiicho-, Waag hí gállé hí ˈdeem ka shigichoká shigichoká úba hai aargira. Héétí máá máá hé ˈdúwaká el gaa igiroká rokoˈd ki goloká hé shiicho-, Waag hí gállé hé ˈdúwaká el gaa igiroká shigichoká úba hai aargira.

⁴²Tá yú hí hé ˈdúwaká geeye, máá gál chia niginííllá mú tikiˈd ˈdaa giri mu he lalichúká mú úba bíé abunaká shuoká, máá mú bie shie kinaallá hé hé shiicho Waag ma gaa ˈdaabiny, Yíésu hí gáál yie.